ازاي تستخدمي اللبن للحصول على شعر ناعم وصحي
علاجات بسيط للشعر باستخدام اللبن ، ولكن مفعولها رائع جدا للشعر الهايش والتالف ، لان الدهون الطبيعية, البروتينات, الفيتامينات, والمعادن الموجودة في اللبن ليها قدرة على تقوية الخلايا وحمايتها ، بما فيها خلايا الشعر ، لتحفيز الشعر على النمو بشكل صحي ، تابعي معانا السطور الجايه واتعرفي على علاجات طبيعية للشعر باللبن لتنعيمه وترطيبه والحفاظ عليه صحي.
1- ماسك اللبن والعسل:
هتحتاجي:
- 2 كوباية لبن كامل الدسم.
- 2 معلقة صغيرة عسل.
الطريقة:
سخني اللبن وضيفي له العسل ، وقلبيه لحد ما العسل يدوب تماما ، دلكي الخليط ده على شعرك بالكامل من الجذور للاطراف ، غطيه بطاقية دش او كيس بلاستيك ، سيبيه لمدة 15 – 20 دقيقة ، وبعدها اغسليه بماية دافية.
2- ماسك اللبن والعسل والموز:
هتحتاجي:
- 1 موزة مستوية.
- 2 معلقة كبيرة من زيت جوز الهند.
- 2 معلقة كبيرة عسل.
- ½ كوباية لبن.
- 1 معلقة كبيرة زبدة.
- 1 معلقة صغيرة عصير ليمون.
- 1 صفار بيضة.
الطريقة:
قطعي الموزة واهرسيها كويس ، وبعدين ضيفي لهه باقي المكونات لعمل عجينة سميكة ، قسمي شعرك اقسام صغيرة ووزعي الخليط بفرشة على شعرك كله بالتساوي من الجذور للاطراف ، سيبيه لمدة 20 دقيقة ، وبعدها اغسليه بماية باردة وشامبو وبلسم.
كرري الماسك مرة واحدة في الاسبوع لافضل النتايج.
3- ماسك الافوكادو والموز واللبن والعسل:
هتحتاجي:
- 2 معلقة صغيرة افوكادو مهروسة.
- ½ كوباية موز مهروس.
- 2 معلقة كبيرة عسل.
- 1 كوباية لبن.
الطريقة:
امزجي كل المكونات مع بعض واضربيها في الخلاط كويس لعمل عجينة سميكة ، قسمي شعرك اقسام صغيرة ، وزعي الخليط على الشعر كله من الجذور للاطراف ، سيبيه لمدة 30 دقيقة تقريبا ، وبعدها اغسليه بماية فاترة وشامبو وبلسم.
كرري الماسك مرة واحدة في الشهر للحصول على اقصى قدر من الفوايد.
4- ماسك البابايا واللبن والعسل:
هتحتاجي:
- 1 موزة مستوية مهروسة.
- 2 معلقة صغيرة بابايا مهروسة.
- ½ كوباية لبن.
- 1 معلقة كبيرة عسل.
الطريقة:
اضربي المكونات مع بعض في الخلاط لعمل عجينة ، ولو حسيتي ان الخليط سميك اوي خففيه باللبن لحد ما يوصل لقوام مناسب ، قسمي شعرك اقسام صغيرة ، وزعي الخليط على الشعر من الجذور للاطراف ، سيبيه لمدة 20 دقيقة تقريبا ، بعدها اغسليه بالماية الباردة والشامبو والبلسم.
كرري الماسك مرتين في الاسبوع لافضل النتايج.
5- ماسك العسل والزبادي:
هتحتاجي:
- ½ كوباية زبادي.
- ¼ كوباية عسل.
الطريقة:
اخلطي الزبادي مع العسل كويس ، وزعي الخليط على شعرك من الجذور للاطراف ، سيبيه لمدة 20 دقيقة ، وبعدها اغسليه.
تقدري تكرريه 3 – 4 مرات في الاسبوع.
6- بلسم عميق بالافوكادو واللبن:
هتحتاجي:
- 1 حبة افوكادو مهروسة.
- ½ كوباية لبن.
- 1 معلقة كبيرة زيت زيتون.
- 1 معلقة كبيرة عسل.
الطريقة:
اضربي كل المكونات مع بعض في الخلاط ، بلي شعرك بالماية ووزعي الخليط على شعرك كله من الجذور للاطراف ، لفي شعرك بكيس بلاستيك او فوطة ، وبعدها سيبيه لمدة 30 دقيقة ، بعدها اغسليه بالشامبو.
تقدري تكرري الماسك ده اكتر من مرة في الاسبوع.
7- ماسك اللبن والبيض:
هتحتاجي:
- 1 كوباية لبن.
- 1 بيضة.
- 1 معلقة عصير ليمون.
- 2 معلقة كبيرة زيت زيتون.
- 1 معلقة كبيرة عسل.
الطريقة:
اخفقي البيضة وضيفي لها باقي المكونات وامزجيهم كويس مع بعض ، بعدها بلي شعرك ووزعي الخليط على الشعر كله من الجذور للاطراف ، لفي شعرك بكيس بلاستيك او فوطة ، سيبيه لمدة 15 دقيقة تقريبا ، وبعدها اغسليه بماية باردة وشامبو وبلسم.
تقدري تكرري الماسك ده اكتر من مرة في الشهر.
