طريقة تركيب الضوافر المضغوطة Press-On Nails ونصايح تخليها تدوم فترة اطول
لو اول مرة تركبي ضوافر ، او مش بتعرفي تركبيها بشكل صح ، موضوعنا النهاردة ليكي ، النهاردة هنشارك معاكم طريقة تركيب الضوافر المضغوطة ، وازاي تخليها تدوم لفترة اطول.
طريقة تركيب الضوافر المضغوطة:
1- اول حاجة شيلي اي مانيكير قديم او اي منتج موجود على ضوافرك.
2- باستخدام عصاية البشرة الخشبية زقي جلد الضوافر لورا.
3- ابردي ضوافرك الطبيعية باستخدام مبرد صغير.
4- اغسلي ايدك بالماية والصابون كويس وجففيها ، وممكن كمان بعد غسلها تمسحي الضوافر بقطنة بكحول.
5- لمعي الضوافر بأداة تلميع الضوافر ، عشان الضوافر الصناعية تلزق بشكل افضل.
6- افتحي مجموعة الضوافر وحددي مقاسات الضوافر الصحيحة.
7- حطي طبقة رقيقة من الغرا اما على ضوافرك الطبيعية ، او على الجزء الخلفي من الضوافر الصناعية ، او اختاري لاصقات الضوافر سريعة اللزق لو عايزة غرا اخف ، وبعد ما تحطي اللزق ركزي عليه حرارة السيشوار لمدة كام ثانية.
8- حطي كل ضوفر واضغطي عليه لمدة 30 ثانية ، وممكن تركزي عليه حرارة السيشوار مرة كمان لمدة ثواني.
نصايح تخلي الضوافر تدوم فترة اطول:
- اتأكدي من تحضير ضوافرك قبل وضع الضوافر الصناعية ، لان كتير من الاشخاص بيهملوا الخطوة دي ولكن هي مهمة لو عايزة الضوافر تدوم معاكي فترة اطول.
- تلميع الضوافر الطبيعية مهم لانه بيقلل الرطوبة من الضوافر ، وبيساعد ان الغرا ينشف اسرع ويلزق بشكل افضل.
- حطي كمية كافية من الغرا لتجنب الجيوب الهوائية ، وده كمان بيساعد ان الضوافر الصناعية تدوم فترة اطول على ضوافرك الطبيعية.
- اتأكدي من الضغط على كل ضوفر لمدة 30 ثانية ، لتثبيته بشكل اقوى والحفاظ عليه لفترة اطول.
- اتجنبي ملامسة الماية خلال الساعة الاولى من تركيب الضوافر لضمان جفاف الغرا تماما.
