دخلي مشروب الريتينول في روتينك اليومي واتخلصي من كل مشاكل بشرتك
كلنا عارفين اهمية الريتينول للبشرة ، بيساعد على تجديد خلايا البشرة, تفتيح لونها, تقليل ظهور حب الشباب, ازالة خلايا الجلد الميتة, تحفيز انتاج الكولاجين وبالتالي تقليل التجاعيد والخطوط الرفيعة ، والريتينول من كل المكونات اللي بتدخل في كتير من منتجات العناية بالبشرة ، ولكن وضع الريتينول بشكل موضعي مش هو بس الطريقة الوحيدة للاستفادة منه ، لكن كمان تقدري تدخليه جوه الجسم بشكل طبيعي ، من خلال مشروب الريتينول الطبيعي ، تابعي معانا السطور الجايه واتعرفي على مكوناته.
لعمل المشروب هتحتاجي:
- 4 حبات جزر.
- 2 حبة برتقان.
- 1 حبة تفاح.
- 1 معلقة كبيرة جنزبيل طازة متقطع.
- معلقة كركم مطحون.
- رشة فلفل اسود.
- 2 كوباية ماية.
طريقة التحضير:
1- ضيفي كل المكونات في الخلاط ، واضربيهم مع بعض كويس.
2- صفي الخليط ، وصبيه في ازازة كبيرة واحفظيه في التلاجة.
3- اشربي منه كوباية يوميا قبل الاكل ، وهتلاحظي بعد وقت قصير نتايج ملحوظة على بشرتك.
فوايد المكونات:
- الجزر ، غني بفيتامين A,C ، اللي بيساعدوا على تحفيز انتاج الكولاجين, تجديد خلايا البشرة, وتقليل ظهور التجاعيد ، كمان الجزر غني بالبيتا كاروتين اللي بيتحول في الجسم لفيتامين A ، اللي بيساعد على تقليل تصبغات البشرة, بيقلل من البقع الغامقة الناتجة عن التعرض للشمس او التقدم في السن, علاج حب الشباب, تنظيم افراز الزيوت في البشرة وده بدوره بيقلل من انسداد المسام وتكون الحبوب.
- البرتقان ، غني بفيتامين سي المضاد للاكسدة ، اللي بيساعد على تعزيز انتاج الكولاجين.
- التفاح ، كمان بيحتوي على فيتامين سي المضاد للاكسدة ، وده بيخليه عامل وقائي ضد الاشعة فوق البنفسجية ، بيساعد على تعزيز انتاج الكولاجين والايلاستين اللي بيحافظ على مرونة الجلد.
- الجنزبيل ، بيحتوي على مضادات اكسدة قوية بتحمي البشرة من الاضرار الناتجة عن الجذور الحرة.
الكركم ، بيحتوي على الكركمين ، وهو مضاد قوي للاكسدة والالتهابات.
- الفلفل الاسود ، بيساعد على زيادة امتصاص الكركمين في الجسم.
