سيروم ليلي طبيعي لتغذية واصلاح البشرة

النهاردة هنشارك معاكم سيروم ليلي لتغذية البشرة واصلاحها ، بمكونات طبيعية بسيطة ، المكونين الاساسيين فيه وهما ماء الورد والجلسرين ، من افضل المكونات للعناية بالبشرة اللي ممكن تعتمدي عليها لعلاج كل مشاكل بشرتك.

لعمل السيروم هتحتاجي:

- 2 معلقة كبيرة جلسرين.

- 1 معلقة كبيرة من ماء الورد.

- 2 معلقة كبيرة من جل الصبار.

- ½ معلقة كبيرة زيت لوز.

- 5 نقط من اي زيت عطري تفضليه.

- زجاجة قطارة زجاجية.

طريقة التحضير والاستخدام:

1- صبي كل المكونات في الزجاجة باستخدام قمع.

2- رجي الزجاجة لمزج المكونات كويس.

3- خزني السيروم في مكان بارد وضلمة ، ويفضل تخزنيه في التلاجة.

4- بالليل قبل النوم ، خدي كام نقطة من السيروم ، وافركيه بين ايديكي ، ودلكي بشرتك في حركات دائرية تصاعدية.

5- استخدمي السيروم كل يوم قبل النوم.

6- وتقدري كمان تستخدميه الصبح ، لكن ماتنسيش تستخدمي واقي شمس قبل الخروج.

فوايد المكونات:

- جل الصبار ، ممتاز جدا لحماية البشرة من اضرار اشعة الشمس فوق البنفسجية ، بيرطبها ، بيحسن مرونة الجلد ، بيأخر التجاعيد.

- زيت اللوز ، من الزيوت الغنية بالعناصر المفيدة للبشرة ، بيساعد على ترطيب البشرة وشدها ، وده بدوره بيقلل من ظهور التجاعيد.

- مزيج ماء الورد والجلسرين ، يعتبر مرطب مثالي ، وبيساعد على تعزيز نضارة البشرة ، هو مش بيساعد بس على ابطاء الشيخوخة ، ولكن كمان بيعكس اضرار الجذور الحرة ويضيف اشراق للبشرة.

استخدام السيروم ده هيوفرلك العناصر الغذائية الضرورية والترطيب اللي محتاجه بشرتك.