ماسك يومي لمدة 7 ايام للحصول على بشرة نضرة خالية من العيوب
هنشارككم النهاردة من خلال المقال بتاعنا ماسك بسيط جدا للبشرة ، ومع مرور كل يوم ، هتلاحظي تغيير كبير في نضارة بشرتك ، واحسن حاجة في الموضوع هو انتي مش هتحتاجي غير 3 مكونات بس لتحضير الماسك ده المتوفر بسهولة في مطبخك ، تابعي معانا السطور الجايه واتعرفي على روتين لمدة 7 ايام مع الماسك ده ، اللي هيساعدك في الحصول على بشرة صحية وبتلمع بشكل طبيعي.
لتحضير الماسك هتحتاجي:
- 1 معلقة كبيرة زبادي.
- ½ معلقة عسل.
- ¼ معلقة صغيرة كركم مطحون.
طريقة التحضير:
- في طبق نضيف اخلطي كل المكونات مع بعض ، امزجيهم كويس ، وكده الماسك يبقى جاهز للاستخدام ، وبننصحك انك تحضري ماسك جديد كل يوم ، يعني ماتعمليش كمية كبيرة وتحطيها في التلاجة ، اعملي الكمية دي على قد اليوم بس.
طريقة استخدام الماسك على بشرتك لمدة 7 ايام:
- في اليوم الاول ، اغسلي بشرتك كويس ، ووزعي عليها الماسك ، وسيبيه لمدة 5 دقايق بس ، وبعدها اغسليه بماية باردة.
كرري نفس الشيء في اليوم التاني.
- في اليوم التالت والرابع ، وزعي الماسك وسيبيه لمدة 7 – 8 دقايق.
- في الايام الباقية ، اليوم الخامس والسادس والسابع ، تقدري تسيبي الماسك لمدة 15 دقيقة ، وبعدها اغسليه بماية باردة.
لو الماسك ساب اي لون اصفر من الكركم على بشرتك ، اغمسي قطعة قطن في اللبن وامسحي بيها بشرتك.
فوايد مكونات الماسك:
- الزبادي: بيحتوي على حمض اللاكتيك اللي بيعمل تقشير خفيف للبشرة عن طريق اذابة خلايا الجلد الميتة ، بيساعد على نضارة البشرة, منع حب الشباب, تقليل الخطوط الرفيعة, وتقليل تغير اللون والتصبغات.
- الكركم: بيساعد على تنقية البشرة وعلاج العيوب ، وتفتيح البشرة ، ومعروف ان الكركم بيقلل الاحمرار, الانتفاخ, والتهيج.
- العسل: يعتبر مرطب طبيعي للبشرة ، وخصائصه المضادة للبكتيريا بتساعد على تغذية البشرة ومنع حب الشباب.
