طرق مختلفة لعمل ليموناضة منعشة تنقذك من حر الصيف
في الصيف مع درجة الحرارة العالية ، بنبقى محتاجين نشرب باستمرار مشروبات باردة ترطب علينا حرارة الصيف ، ومن اكتر المشروبات المنعشة هو الليموناضة او عصير الليمون ، ولكن عصير الليمون نقدر نعمله بطرق كتير مختلفة ، تابعي معانا السطور الجاية واتعرفي على طرق مختلفة لعمل الليموناضة.
- الليموناضة البرازيلية:
المكونات:
- 5 ليمونات متقشرين ومتقطعين.
- 1 كوباية ماية.
- ½ كوباية حليب مكثف
طريقة التحضير:
- في الخلاط ضيفي الليمون والماية واضربيهم مع بعض ، وبعدها صفي الخليط ورجعيه في الخلاط تاني وضيفي عليه الحليب المكثف ، واضربيهم تاني مع بعض.
- وممكن تضربي الخليط في الخلاط او بالهاند بلندر ، كده العصير جاهز للتقديم ضيفي مكعبات تلج في الكوبايات وصبي عليه عصير الليمون.
- عصير ليمون بالشاي المثلج:
المكونات:
- 2 ليمونة متقطعين.
- ½ كوباية ماية.
- 1 معلقة سكر.
- 1 معلقة كبيرة عسل نحل.
- ½ كوباية شاي احمر بارد
طريقة التحضير:
- في الخلاط ضيفي الليمون مع الماية والسكر واضربيهم مع بعض ، وبعدين صفي الخليط.
- صبي عصير الليمون في الكوباية وضيفي عليه العسل والشاي ومكعبات التلج.
- الليموناضة الامريكية:
المكونات:
- سيرب سكر.
- 5 ليمونات.
- 1 كوباية ماية + 3 كوبايات ماية.
طريقة التحضير:
- هنحضر الاول سيرب السكر ، في حلة على نار متوسطة ضيفي 1 ½ كوباية سكر مع 1 كوباية ماية ، وسيبي الخليط على النار لحد ما السكر يدوب تماما ويغلي غلوة ، ضيفي له بشر ليمونة وسيبيه يغلي لمدة 5 دقايق ، وبعدها ارفعيه من على النار.
- هنحضر الليمون ، في الخلاط ضيفي الليمون مع كوباية الماية واضربيهم مع بعض ، وبعدين صفي الخليط وصبيه في شفشف كبير ، وضيفي له سيرب السكر ومكعبات تلج و 3 كوبايات ماية ، وقلبي الخليط ، وكده يبقى العصير جاهز للتقديم.
- عصير الليمون مع البرتقان:
المكونات:
- ليمون.
- ماية.
- عصير برتقان.
طريقة التحضير:
حضري الليمون بالطريقة العادية زي ما حضرناه في الوصفات اللي فاتت اضربي الليمون مع الماية في الخلاط وصفيه ، وصبيه في الكوباية وضيفي له عصير البرتقان مع مكعبات التلج.
- عصير الليمون مع الاناناس:
المكونات:
- 4 ليمونات متقطعين.
- ورق نعناع طازة.
- 1 كوباية عصير اناناس.
- ½ كوباية سكر.
طريقة التحضير:
في الخلاط ضيفي الليمون مع النعناع وعصير الاناناس والسكر ، اضربيهم مع بعض ، وصفي العصير وصبيه في الكوباية مع مكعبات التلج.
- عصير الليمون باللبن:
المكونات:
- 3 ليمونات متقطعين.
- ¼ كوباية سكر.
- ½ كوباية لبن.
- ورق نعناع طازة.
- 2 كوباية ماية.
طريقة التحضير:
اخلطي كل المكونات مع بعض في الخلاط ، وصفيه ، وصبيه في الكوبايات مع مكعبات التلج.
- تخزين عصير الليمون:
الطريقة دي هتسهل عليكي انك تعملي عصير ليمون في دقيقة واحدة في اي وقت.
المكونات:
- حوالي 7 ليمونات.
- 1 كوباية سكر + 2 معلقة كبيرة سكر.
- ورق نعناع طازة.
- ½ كوباية ماية.
طريقة التحضير:
- هاتي الليمون قشرية ، حطي القشر في طبق وضيفي عليه كوباية السكر وقلبيه وسيبيه على جنب.
هاتي الليمون نفسه قطعيه ، وضيفي الليمون مع القشر ، وضيفي لهم ورق نعناع طازة و 2 معلقة كبيرة سكر والماية ، اضربي الخليط ده كله مع بعض ، وبعدين صفيه ، وكده يبقى الليمون جاهز حطيه في علبة محكمة الغلق وخزنيه في الفريزر ، او ممكن تخزنيه في قوالب التلج.
- اي وقت عايزة تعملي عصير ليمون خدي منه معلقتين او مكعبين ليمون وزودي عليهم ماية سقعة ، وكده يبقى حضرتي عصير ليمون في دقيقة واحدة بكل سهولة.
