لون شفايفك بيقولك ايه عن صحتك؟

الشفايف هي واحدة من اول سمات الوجه اللي بيلاحظها معظم الناس من النظرة الاولى ، والشفايف ممكن لونها يختلف من شخص للتاني حسب الحاجات اللي بتاكليها او المنتجات اللي بتستخدميها او حتى كمان بسبب الشوائب الموجودة في الجو حوالينا ، وفي المقال ده هنشارك معاكم الوان الشفايف المختلفة وايه اللي بيقوله كل لون عن صحتك ، بالاضافة لبعض الوصفات البسيطة لعلاج الشفايف الغامقة.

- الشفايف الشاحبة:

الشفايف الشاحبة او البيضا هي علامة واضحة على الاصابة بفقر الدم ، وده معناه ان جسمك يعاني من نقص في خلايا الدم الحمراء او الهيموجلوبين.

في الحالة دي اضافة الاطعمة الغنية بالحديد زي السبانخ, الفواكة المجففة, الخبز طريقة فعالة لزيادة الهيموجلوبين في الجسم.

- الشفايف الحمرا:

الشفايف الحمرا بشكل مبالغ او الحمرا النارية ممكن تبقى علامة ان جسمك محموم ، لان جلد الشفايف رقيق جدا ، وبالتالي بتعكس اللون الاحمر بشكل واضح اكتر ، وفي علامات تانية ممكن تظهر مع الشفايف الحمرا زي ريحة الفم الكريهة والرغبة في اكل الوجبات السريعة ، وده ممكن يكون معناه ان في خلل في الكبد بيأدي لاطلاق الحرارة اللي بينتج عنه اللون الاحمر للشفايف.

- الشفايف الزرقا:

الشفايف الزرقا من اكتر العلامات المخيفة على الاطلاق ، ولكن مع ذلك خلال فصل الشتا الشفايف ممكن يبقى لونها ازرق بسبب البرد ، الشفايف الزرقا معناها ان الجسم الدورة الدموية فيه مش شغالة بشكل مناسب.

ولو عندك خط اخضر حوالين اللون الازرق ، ده معناه ان الدورة الدموية ضعيفة حوالين الطحال والكبد.

الشفايف الزرقا ممكن تكون علامة كمان ان الشخص ده بيعاني من مشكلة في الجهاز التنفسي.

- الشفايف الوردي:

الشفايف الوردي هي علامة على صحة الجسم ، وده معناه ان جسمك في حالة توازن مع عقلك ، ومعناه كمان ان كل اللي بتاكليه مفيد لجسمك ، مع اتباع نظام غذائي سليم ونظام لياقة بدنية هتقدري تحافظي على ده للابد.

دلوقتي تعالوا نشوف بعض المكونات الطبيعية اللي ممكن تستخدميها للتخلص من الشفايف الغامقة:

- الليمون:

الليمون بيحتوي على خصائص مبيضة بتساعد على تفتيح الشفايف وازالة التتصبغات منها ، كمان بيحتوي على فيتامين سي اللي بيساعد على تحسين الدورة الدموية في الشفايف.

اخلطي 1 ½ معلقة صغيرة من عصير الليمون ، 1 معلقة صغغيرة عسل ، 1 معلقة صغيرة جلسرين ، امزجيهم كويس ، ووزعي الخليط على الشفايف ، دلكيه 1 – 2 دقيقة ، وسيبيه على الشفايف طول الليل ، والصبح اغسليه بماية فاترة ورطبي شفايفك ، استخدمي العلاج ده يوميا لافضل النتايج.

- الكركم:

الكركم بيساعد على اصلاح تلف الشفايف ، ومعروف كمان انه مثبط للميلانين وبالتالي بيعالج التصبغات وبيرجع الشفايف للونها الاصلي.

اخلطي 1 معلقة كبيرة من الكركم المطحون مع كمية كافية من اللبن لعمل معجون كريمي ، وزعي طبقة من الخليط ده على شفايفك وسيبيها لمدة 5 دقايق ، بعدها اغسليه ورطبي شفايفك ، كرري العلاج ده من 1 – 2 مرة في الاسبوع.

- الالوفيرا:

الصبار معروف بخصائصة المطهرة والمرطبة ، ومعروف كمان انه بيمنع انتاج الميلانين.

وضع طبقة رقيقة من الالوفيرا على الشفايف كل يوم هيعمل طبقة واقية هتمنع تلف الشفايف.

- زيت جوز الهند:

زيت جوز الهند بيحتوي على خصائص مضادة للجراثيم اللي بتساعد على قتل البكتيريا اللي بتسبب تلف الشفايف ، بالاضافة انه غني بالاحماض الدهنية اللي بتغذي الشفايف وبتعالج الشفايف الغامقة والمتشققة.

ادهني شفايفك بطبقة رقيقة من زيت جوز الهند كل يوم قبل النوم ، للحصول على شفايف ناعمة ولونها وردي بشكل طبيعي.