سيروم الالوفيرا لعلاج ندبات حب الشباب

ندبات حب الشباب اسوأ من حب الشباب تفسه ، لانها بتخلي لون البشرة غير متساوي وباهت ، بدل ما تجربي الكريمات والمستحضرات المختلفة اللي في كتير منها بيحتوي على مواد كيميائية ضارة ، الافضل تستخدمي علاج طبيعي وهيديكي نتايج فعالة جدا ، والنهاردة من خلال المقال بتاعنا هنشارك معاكم سيروم الالوفيرا لعلاج ندبات حب الشباب.

المكونات:

- 2 معلقة كبيرة جلسرين.

- 2 معلقة كبيرة من جل الالوفيرا.

- ½ معلقة كبيرة من زيت الزيتون.

- 1 معلقة كبيرة من ماء الورد.

طريقة التحضير والاستخدام:

1- هاتي بوله نضيفة اخلطي فيها كل المكونات ، امزجيهم كويس مع بعض ، وكده يبقى السيروم جاهز.

2- خدي كام نقطة من السيروم وزعيهم على بشرتك.

3- دلكي البشرة في حركات دائرية لمدة 4 – 5 دقايق لحد ما بشرتك تمتصه تماما.

4- سيبيه طول الليل على بشرتك.

5- الصبح اغسلي بشرتك بماية باردة.

6- ممكن كمان تستخدمي السيروم ده الصبح قبل الخروج من البيت للحصول على نتايج افضل.

7- كرري استخدام السيروم كل يوم قبل النوم بانتظام.

8- وخزنيه في زجاجة نضيفة واحفظيه في التلاجة للاستخدام اليومي.

جل الصبار بيحتوي على خصائص مهدئة ومرطبة هتساعد على ازالة الندبات بشكل فعال ، كمان مضادات الاكسدة الموجودة في السيروم ده هتساعد على شفاء الاضرار اللي حصلت لخلايا الجلد وبتساعد على تجديد البشرة.

السيروم كمان هيساعد على تغذية بشرتك بفضل كل العناصر الغذائية الاساسية الموجودة فيه اللي هتساعدك على الحصول على بشرة صحية.

كمان بيساعد على توحيد لون البشرة ، وتنعيمها ، كمان هيساعدك على علاج حب الشباب ومنع حدوث حب الشباب اكتر.

بعض العلاجات الطبيعية البسيطة التانية اللي ممكن تساعد على علاج الندبات:

1- حطي كمية بسيطة من زيت جوز الهند على بشرتك كل يوم قبل النوم.

2- اخلطي معلقة كبيرة من خل التفاح مع معلقة عسل ، ووزعي الخليط على الندبات وسيبيه لمدة 10 دقايق وبعدها اغسلي بشرتك بماية باردة.

3- او ببساطة حطي العسل مباشرة على بشرتك ، كرريه يوميا لافضل النتايج.

4- انقعي قطعة قطن في عصير البطاطس ، وادهني الندبات ، سيبيه لحد ما ينشف لمدة 10 دقايق تقريبا وبعدها اغسلي بشرتك بماية باردة.

5- ممكن كمان تخلطي عصير البصل مع عصير الليمون ووزعي الخليط على بشرتك ، وسيبيه لحد ما ينشف وبعدها اغسليه.

6- بعض الزيوت الاساسية زي زيت اللافندر, زيت شجرة الشاي, زيت الورد, زيت المشمش ، ممكن تبقى علاج فعلا جدا لندبات حب الشباب ، ضيفي كام نقطة من اي زيت اساسي ل 1 معلقة كبيرة من اي زيت ناقل زي زيت جوز الهند, زيت الزيتون ، واستخدميه بانتظام على بشرتك.