سيروم طبيعي لتطويل وتكثيف الشعر بسرعة
اغلب المنتجات الموجودة في السوق بتكون مليانة بمواد كيميائية ضارة ومواد سامة بتضرنا اكتر ما بتنفعنا ، على سبيل المثال ، كتير من منتجات العناية بالشعر بتحتوي على السيليكون ، وهو في البداية بالفعل هيدي الشعر نعومة وشكل صحي ، ولكن السيليكون بيغطي جذع الشعرة ، وده مع الوقت بيسد بصيلات الشعر, بيمنع الرطوبة ، وده هيأدي في النهاية لشعر جاف وباهت مع مرور الوقت ، وعشان تتجنبي المواد الضارة وتحسني صحة شعرك ، النهاردة هنشارك معاكم طريقة عمل سيروم طبيعي لتطويل وتكثيف الشعر.
سيروم طبيعي لنمو الشعر:
المكونات:
- ½ كوباية من زيت الخروع.
- ½ كوباية من زيت جوز الهند.
- 8 – 10 نقط من زيت الروزماري.
طريقة التحضير والاستخدام:
1- في عبوة زجاجية اخلطي زيت الخروع, زيت جوز الهند, زيت الروزماري ، ورجيها كويس لخلط المكونات ، كده السيروم جاهز للاستخدام.
2- للاستخدام ، خدي من الخليط ودلكي بيه فروة راسك ، لمدة 2 – 3 دقايق.
3- اتأكدي من تغطية فروة راسك كلها بالسيروم ، سيبيه لمدة ساعة ، او الافضل انك تسيبيه طول الليل وتغسليه الصبح.
4- بعدها اغسليه بالماية الفاترة والشامبو بالطريقة العادية.
5- خزني السيروم في مكان جاف وضلمة ، واستخدميه 2 – 3 مرات في الاسبوع لافضل النتايج.
فوايد مكونات السيروم:
- زيت الخروع بيحتوي على احماض اوميجا 6 الدهنية الاساسية اللي بتساعد على تعزيز الدورة الدموية ، وبتحفز نمو الشعر ، بالاضافة انه بيقوي الجذور, بيغذي فروة الراس, بيحمي بصيلات الشعر من التساقط.
- تركيبة الدهون الطبيعية الموجودة في زيت جوز الهند بتسمح ان الزيت يتغلغل بعمق في جذور الشعر ، تحفيز نمو الشعر ، تغذية البصيلات ، تقليل الهيشان ، وده هيأدي لتحسين صحة ولمعان الشعر.
- زيت الروزماري (اكليل الجبل) بيعزز نمو الشعر ، بيحسن الدورة الدموية ، بيمنع الشيب المبكر ، وبيساعد على التحكم في قشرة الراس.
من خلال دمج السيروم ده في روتين العناية بشعرك ، هتغذي شعرك بشكل طبيعي وهتتجنبي الآثار الضارة المحتملة للمنتجات التجارية.
