ازاي تخليه ياخد خطوة الجواز بيكي في 7 خطوات محسوبة

ريهام محمود
ريهام محمود
في
حب
203

لما تكوني في حالة حب اكيد طبيعي جدا بيكون كل حلمك انك تكملي مع الشخص ده ، وتقضي باقي حياتك معاه ، كل بنت تقريبا بتكبر بحلم انها تقابل فارس احلامها اللي تعيش معاه حياة زوجية سعيدة ، ولكن في مشكلة ممكن تقابلك انه ممكن يكون الشخص اللي انتي مرتبطة بيه بطيء في انه ياخد خطوات في العلاقة وينقلها للمستوى التاني زي ما انتي عايزة ، ولكن مش عارفة تخليه يطلب منك الجواز وياخد الخطوة دي بشكل اسرع من غير ما تباني قدامه انك انتهازية او يائسة ، النهاردة من خلال موضوعنا هنساعدك في المهمة دي وهنشارك معاكم نصايح تخليه يطلب منك الزواج.

قبل ما ندخل في التفاصيل والنصايح ، لازم تعرفي انك مش هتقدري تجبري شخص انه يعمل حاجة ضد ارادته ، وبالتالي تطبيق النصايح دي هيكون مفيد بس في حالة ان الشخص اللي انتي مرتبطة بيه شايفك فعلا الشخص المناسب اللي ممكن يكمل معاها حياته ، ولكن محتاج بس شوية تحفيز او "زقه" لتحريك العلاقة عشان ياخد خطوة الجواز.

ياللا بينا نبتدي.

1- اظهار الاستعداد للزواج:

بيني له انك مستعدة للجواز ولكن مش بشكل صريح ، يعني مثلا بيني له انك عندك نضج عاطفي ومالي ، اظهري انك بالفعل عندك حياة خاصة بيكي ، خليكي لطيفة مع الناس ، عدلي من الصفات والحاجات السلبية اللي محتاجة تغيير فيكي ، ابني شخصيتك وطوريها ، هو لما يشوف كل ده هيحس انك مستعدة فعلا للحياة الزوجية.

2- خليكي شخص مايستغناش عنه وداعمه ليه:

دي نصيحة فعالة عشان تخليه ياخد خطوة الجواز ، في الفترة الاخيرة اتحول تركيز الرجالة عن اختيار الست اللي عايز يتجوزها هي هتقدم له ايه ، وهنا مش بنتكلم عن الاستقلال المالي او الفلوس ، ولكن هيبص على الست اللي ممكن تشاركه نصايح مفيدة, بتعرف تعمل محادثة ذكية, بتدعمه, وحتى كمان الخبرة في عمل طبقه المفضل ، من خلال توفير الحاجات دي ، هتخلي نفسك الشخص الاكتر اهمية في حياته ، ولما يفكر في الجواز والاستقرار ، هتكوني انتي الشخص الوحيد اللي هيفكر فيها لانك اثبتي انك جزء مهم في حياته.

كمان في طريقة فعالة عشان تخليه خطوة الزواج ، وهي انك تكوني شخص ليكي قيمة عالية في العلاقة ، وشخص داعم باستمرار ، الحقيقة ان بعض الشباب بيبقى صعب عليهم ياخدوا خطوة الجواز ، ومانقدرش نلومهم لان الجواز خطوة كبيرة ولازم تكون محسوبة كويس ، ولكن مع ذلك لو انتي شخص ليكي قيمة عالية في العلاقة ووجودك مهم في حياته ، ده هيخليه ياخد خطوة الجواز بسرعة.

3- ماتضغطيش عليه:

كتير من الرجالة عندهم تردد شديد من ناحية خطوة الجواز ، بمجرد ما تبدأ العلاقة بيبقى متحمس للجواز ، ولكن مع الوقت هتلاقيه بيتجنب الكلام عن الجواز لانه خايف ومتردد ، اكيد لما الكلام عن الجواز يكون هو محور محادثتكم دايما ده هيخليه يحس انه مضغوط وهيخاف ويهرب ، فلو عايزة فعلا الشخص اللي بتحبيه ياخد خطوة الجواز منك اعرفي ان الضغط عليه باستمرار هيجيب نتايح عكسية ، عشان كده ماتخليش ده محور كلامكم على طول عشان مايحسش بالتوتر ويخاف ، ماتقعديش مثلا تبعتي له فيديوهات وحاجات خاصة بالافراح وكل حاجة خاصة بالجواز ، اتجنبي الكلام باستمرار عن موضوع الجواز ، وهنقولك في النقطة الجايه ازاي تقوليها بطريقة غير مباشرة.

4- بيني وماتقوليش:

الافعال صوتها اعلى من الكلمات ، في افعال بتبين ان الست مستعدة لتكوين عيلة ، شاركي مثلا في رحلات عائلية وبيني له قد ايه انتي بتعرفي تتعاملي مع الاطفال والتجمعات العائلية ، اقعدي مثلا مع بنات وولاد اخواتك لو موجودين ، وخليه يعرف ده وانك مبسوطة وانتي بتعملي ده معاهم ، بيني له جزء الامومة اللي جواكي ، اظهري له انك "زوجة مثالية" من خلال مدى حبك واهتمامك وعاطفتك للاشخاص اللي حواليكي.

نصايح لتشجيعه على خطوة الزواج.1
نصايح لتشجيعه على خطوة الزواج.1

5- خليه يعرف ان في خاطبين تانيين:

شوية غيرة مش هتضر ، خليه يعرف ان في خاطبين تانيين بيطلبوا ايدك ، لان في اشخاص كتير مش بيفكروا ياخدوا خطوة لانهم يعتبروا الشخص اللي معاهم مضمون من وجهة نظرهم ، لحد ما يجي تهديد يقوله انك ممكن يخسرك ، لو حس انه الشخص الوحيد اللي بيدق بابك ومافيش عندك اختيارات تانية ، ممكن يفضل يماطل معاكي ، ولكن لما يحس ان في اشخاص تانيين بيعرضوا عليكي الجواز ، ده ممكن يحسسه بالتهديد ويدفعه انه يطلب الجواز منك.

6- استثمري في علاقاتك:

ماتفقديش نفسك في خلال سعيك ان الشخص اللي بتحبيه يطلب الجواز منك ، الجواز مافيش شك انه جزء مهم من الحياة ، ولكن مع ذلك ولكن مش بيحددك بشكل كامل كفرد ، انتي في النهاية قيمتك بتاخديها من نفسك مش من اي شخص تاني ، ممكن في البداية الكلام كتير معاه يكون ممتع ليه ولكن مع الوقت هيحس انك شخص يائس ومافيش حاجة في حياتك غيره ، عشان كده لازم تحطي خطط للتركيز على نفسك ، شاركي في انشطة خاصة بيكي بعيدا عنه ، عشان صورتك قدامه ماتبقاش انك عايشة بس بتستجدي الحب منه ، استثمري في علاقاتك في حياتك, عيلتك, اصحابك ، اطلعي رحلة مع اصحابك ، غيبي عنه لان ده هيخليه يشتاقلك ويحس بأهمية وجوده في حياته ، استثمري في نفسك واهتمي بنفسك ، ده هيخليكي بالنسبة لك شخص هو هيسعى انه ياخد خطوة الجواز معاها.

7- ارمي تلميحات انك هتبعدي:

ابدأي بالكلام انك بتفكري تسافري تشتغلي في اي بلد تانية وانك هتبدأي وظيفة جديدة وحياة جديدة ، فلو هو مهتم بيكي فعلا فكرة بعدك هتخليه يفكر انه ياخد العلاقة لمستوى اعلى ، وياخد خطوة الجواز بسرعة.

في النهاية خلينا واضحين ان النصايح دي ممكن ماتبقاش مناسبة للكل او في كل المواقف ، لما الراجل يبقى بطيء في خطوة الجواز ، ده ممكن يرجع لاسباب مختلفة ، الجواز خطوة كبيرة ، ومهم ان الراجل يكون مؤمن بالحاجات المشتركة بينكم ، ولو حسيتي ان الراجل اللي مرتبطة بيه يضيع وقتك ومش مستعد ، انهي العلاقة وماتضيعيش وقتك ومشاعرك ، لان الموضوع مايستحقش ابدا انك تفرضي نفسك على شخص عشان يتجوزك ، افتكري ان الجواز حياة كاملة ماينفعش انك ترتبطي بشخص بتحبيه وهو مش بيحبك بنفس المقدار ، لازم تختاري بحكمة.

مقالات متعلقه

لو شريكك مش رومانسي: اعملي ال 6 حاجات دول

لو شريكك مش رومانسي: اعملي ال 6 حاجات دول

8 علامات تقولك انه مش هيتوقف عن حبك ابدا

8 علامات تقولك انه مش هيتوقف عن حبك ابدا

50 سؤال تسألهم لحبيبتك عشان تعرفها بشكل افضل

50 سؤال تسألهم لحبيبتك عشان تعرفها بشكل افضل