طريقة عمل زيت ملمع للجسم Shimmer Body Oil
الصيف دايما مرتبط معانا بالبشرة الجلو المضيئة المناسبة لاجواء ولبس الصيف ، والنهاردة من خلال موضوعنا هنشارك معاكم طريقة عمل زيت ملمع للجسمShimmer Body Oil ، تقدري تعمليه بنفسك في البيت بمكونات بسيطة.
والملمع ده مش بس وظيفته انها يدي لمعة حلوة للجسم ، ولكن كمان هو مرطب مثالي خفيف ، خصوصا مع تعرض البشرة للشمس فترات طويلة في الصيف ، بتأدي لجفاف وتشقق البشرة ، وبالتالي زيت الجسم هيكون هو الاختيار المثالي ليكي في الصيف ، كل اللي هتعمليه بس انك هتضيفي لمعان للمرطب ، للحصول على مرطب ملمع للجسم.
الطريقة 1:
المكونات:
- 30 مل من زيت جوز الهند او اي نوع زيت تفضليه واحنا بنشرحلك (زيت السمسم, زيت الجوجوبا, زيت اللوز الحلو, زيت بذور العنب, زيت عباد الشمس).
- ½ معلقة صغيرة برونزر او هايلايتر ابيض او لؤلوي او ايشادو لامع برونزي (تقدري تختاري لون الايشادو اللي تفضليه ممكن تستخدمي فضي, روز جولد).
الطريقة:
1- في طبق حطي الايشادو او البرونزر وفتتيه كويس بضهر المعلقة لحد ما يبقى بودر ناعم من غير اي كتل ، بعدها ضيفي الزيت وامزجي المكونات كويس.
2- صبي الزيت في اي ازازة عندك باستخدام قمع صغير ، كده الزيت الملمع جاهز للاستخدام ، رجيه قبل كل استخدام.
3- ممكن تضيفي من 10 – 12 نقطة من اي نوع زيت عطري (اختياري) ولكن اتجنبي استخدام الزيوت الحمضية لانها مع الشمس ممكن تسبب تهيج للبشرة ، الافضل تستخدمي زيوت لطيفة على البشرة زي زيت اللافندر, زيت الكاموميل, زيت الياسمين.
الطريقة 2:
المكونات:
- ½ كوباية من زيت جوز الهند.
- ¼ كوباية زيت زيتون.
- 1/8 معلقة صغيرة زيت فيتامين E (تقدري تستخدمي اي نوع زيت تفضليه او تستخدميهم كلهم).
- 1 – 2 نقطة من اي زيت عطري (اختياري).
- بودرة الميكا باللون الدهبي الوردي او اي لون تفضليه (متوفرة اون لاين على مواقع التسوق).
الطريقة:
في طبق اخلطي كل الزيوت مع بعض ، وضيفي لها كمية صغيرة من بودرة الميكا ، وامزجي المكونات مع بعض كويس ، صبي الخليط في ازازة باستخدام قمع صغير ، وكده يبقى الزيت جاهز رجيه قبل كل استخدام.
