وصفة الفراخ بالبصل المكرمل والجبنة

ريهام محمود
ريهام محمود
33

وصفة الفراخ بالبصل المكرمل والجبنة السايحة ، من الوصفات اللذيذة والبسيطة ، اللي مش هتاخد منك اكتر من 30 دقيقة لتحضيرها ، تابعي معانا السطور الجايه واتعرفي على الطريقة بالخطوات.

المكونات:

- 2 حبة بصل حلو كبيرة, متقطعة.

- 4 معلقة كبيرة زبدة.

- 4 فصوص ثوم مفرومين.

- 1 ¾ كوباية شوربة لحمة.

- 4 صدور فراخ, بحجم واحد.

- 2 معلقة كبيرة زيت زيتون.

- 1 – 2 معلقة صغيرة ملح.

- 1 معلقة صغيرة فلفل اسود.

- 1 معلقة صغيرة زعتر.

- 1 ½ معلقة كبيرة نشا او دقيق.

- 4 شرائح جبنة موتزاريلا.

- 4 شرائح جبنة شيدر (وممكن تستخدمي نوع واحد بس من الاتنين حسب المتوفر عندك).

- بقدونس او اي اعشاب طازة للتزيين.

- ½ كوباية جبنة بارميزان مبشورة (اختياري).

وصفة الفراخ بالبصل المكرمل والجبنة.1
وصفة الفراخ بالبصل المكرمل والجبنة.1

طريقة التحضير:

1- سخني الفرن على درجة حرارة 200 درجة مئوية ، وفي طاسة كبيرة ممكن تحطيها في الفرن او صينية ، حطيها على نار متوسطة لعالية وضيفي الزبدة ، لما تدوب ضيفي البصل وقلبيه في الزبدة كويس لمدة 15 دقيقة تقريبا او لحد ما البصل يبقى طري وياخد لون بني دهبي غامق ، لما البصل يتكرمل ضيفي له الثوم المفروم وقلبيه معاه لمدة 30 ثانية ، وبعدها طلعي خليط البصل من الطاسة في طبق على جنب.

2- في خلال ما البصل بيتكرمل ، تبلي صدور الفراخ ، رشي عليها زيت الزيتون, الملح, الفلفل الاسود, الزعتر ، وادعكيها كويس بخليط الزيت والتوابل ، حطي الفراخ في نفس الطاسة مكان البصل لمدة 5 دقايق على كل جنب لحد ما تاخد لون دهبي من الجانبين.

3- طلعي الفراخ من الطاسة في طبق على جنب ، وغطيه بمناديل مطبخ عشان تفضل دافية ، رجعي البصل للطاسة تاني وضيفي النشا او الدقيق على البصل وقلبيهم مع بعض ، وبعدين ضيفي شوربة اللحمة وقلبي واتأكدي ان النشا او الدقيق داب كويس.

4- سيبي الخليط يغلي على النار لحد ما يبقى قوامه سميك ، رجعي الفراخ مرة تانية للطاسة ، وبالمعلقة وزعي الصوص فوق الفراخ كلها ، حطي فوق كل قطعة فراخ شريحة جبنة موتزاريلا وشريحة جبنة شيدر ، وبعدها دخلي الطاسة للفرن اللي سخناه في البداية ، سيبيها لمدة 8 – 10 دقايق ، او لحد ما الفراخ تستوي كويس والجبنة تدوب.

5- طلعي الفراخ من الفرن ، حطيها على طبق التقديم ، وفوقيها الصوص والبصل المكرمل ، وزينيها بالبقدونس او الاعشاب الايطالية والجبنة البارميزان.

وصفة الفراخ بالبصل المكرمل والجبنة.2
وصفة الفراخ بالبصل المكرمل والجبنة.2

مقالات متعلقه

وصفة طاجن السبانخ الكريمي

وصفة طاجن السبانخ الكريمي

وصفة الفراخ بالثوم والعسل

وصفة الفراخ بالثوم والعسل

وصفة الكفتة بالبطاطس في الفرن

وصفة الكفتة بالبطاطس في الفرن