9 جمل بسيطة هتقوي علاقتك الزوجية لو قولتيهم كل يوم

الكلمات ليها تأثير قوي جدا ، الكلمات ممكن تقرب الناس من بعض وممكن تفرقهم ، وفي الزواج بشكل خاص الكلمات ليها وزن وليها القدرة على تشكيل علاقتنا ، الحفاظ على العلاقة الزوجية بيحتاج مجهود من الطرفين وتواصل وكتير من مشاعر الحب ، وفي حين ان التواصل مش بيقتصر على الكلمات بس ، الا انها مازالت بتلعب دور اساسي وحاسم في تقوية العلاقة الزوجية ، والنهاردة من خلال المقال بتاعنا هنقولك 9 جمل بسيطة ممكن تستخدميها كل يوم لبناء علاقة زوجية قوية.

1- انا بحبك:

مهم جدا انك تعبري لفظيا عن حبك لشريكك كل يوم ، لان الحب هو مش مجرد قرار لمرة واحدة وخلاص ، ولكن هو اختيار والتزام مستمر ، لما تقولي "انا بحبك" كل يوم ده هيفكر زوجك قد ايه هو محبوب ومتقدر ، وماتقوليش الكلمة دي لما بس تحسي بالرغبة انك عايزة تقوليها ، او لما شريكك يخليكي سعيدة ، او لما تكون الامور بينكم كويسة بس ، ولكن قوليها في كل وقت حتى لو انتي غضبانة او متضايقة او مش في المود ، لان مهما كان اللي بيحصل في العلاقة فالحب لسه موجود ، والحقيقة ان ده كمان يعتبر افضل وقت لسماع الكلمة دي اكتر من غيره ، وبيوضح له ان حبك مش معتمد على الظروف ، ولكن هو موجود بشكل دايم في العلاقة.

2- شكرا ليك:

التقدير حاجة قوية في العلاقة ، كلنا عايزين نحس بالتقدير ، وخصوصا من الشريك ، ولكن اللي بيحصل انه مع الوقت اننا بنشوف ان وجودنا في حياة بعض امر مفروغ منه فبنبطل نعمل مجهود وبننسى ان الكلمات البسيطة زي "شكرا" مهمة في العلاقة ، كلمة "شكرا" بتقول لشريكك انك مش معتبراه امر مسلم بيه وانك بتقدري اللي بيعمله ، سواء كان كبير او صغير ، خلي الكلمة دي يومية في زواجك.

3- انا اسفة:

مافيش حد مثالي وكلنا بنعمل غلطات ، وفي الجواز بتحصل خلافات وممكن مشاعرنا تتأذي ، ولكن مفتاح العلاقة القوية مش بتجنب الخلافات تماما ، ولكن بتعلم كلمة الاعتذار عند الحاجة ، الاعتراف بالغلط هو علامة على الصدق والاحترام في الزواج ، بتظهر انك بتقدري مشاعر شريكك وانك مستعدة لتحمل مسؤولية افعالك ، والاعتذار مش دايما بيكون سهل ، ولكن بيقطع شوط كبير في شفاء اي اذى او جرح او توتر في العلاقة ، والاهم ان الاعتذار مايكونش بالكلمات بس ولكن بيحتاج كمان الاخلاص والتكفير عن الغلطة ، لان مافيش فايدة من الاعتذار لو مافيش نية لتغيير السلوك ، الاعتذار الحقيقي هو تغيير السلوك اللي بيضايق الشريك.

4- انا هنا عشانك:

اساس الزواج هو الشخص اللي يكون معانا في الحلو والوحش ، "انا موجودة هنا عشانك او انا جنبك" بتظهر لزوجك انه ممكن يعتمد عليكي مهما كان الامر ، وبيوضح له انك ملتزمة بدعمه في الحلو والوحش وانه مش لوحده في رحلة الحياة ، ومش شرط تقولي له "انا هنا عشانك" في المشاكل الكبيرة بس ، ولكن كمان في الحاجات البسيطة زي لما يكون حاسس بالارهاق او التوتر او بيمر بيوم سيء او محتاج بس لحد يتكلم معاه.

5- انا فخورة بيك:

كلنا جوانا مشاعر عدم الامتنان والشك في نفسنا ، واحيانا بنحتاج بس ان شريكنا يطمنا ، مهم جدا اننا الزوجين يكونوا اكبر الداعمين والمشجعين لبعض ، لما شريكك يحقق اي انجاز كبير او صغير ، خليه يعرف انك فخورة بيه ، ممكن تكون وظيفة جديدة ، او مشروع جديد ، او ببساطة خلص اللي وراه في اليوم ده ، شجعيه ووضحي له انك فخورة بيه ، الاعتراف بانجازه بيظهر له انك مؤمنة بقدراته ، وفي الايام الصعبة لما يبقى عنده شعور بالاحباط او الاستسلام ، لما تبيني له انك فخورة بيه ده هيبقى محفز ليه وهيرفع من معنوياته فوق ما تتخيلي.

6- يومك كان ازاي/ قولي عملت ايه النهاردة:

بعد يوم شغل طويل ، خصصي وقت اسأليه عن يومه واسمعي بحماس واهتمام كل اللي هيقوله ده هيفرق جدا في العلاقة ، وماتنشغليش بأي حاجة تانية وانتي بتسمعيه ولكن اديه كل اهتمامك ، التواصل البسيط ده مع شريكك هيحسسه انك بتقدريه وده هيخلق تواصل اعمق بينكم ، وكمان هيدي شريكك فرصة للتنفيس عن اي حاجة حصلت في يومه ، وده هيساعده يتخلص من اي ضغوط في يومه والاحتفال بنجاحاته معاكي.والافضل كمان انك ما تسأليش سؤال عام زي "يومك كان ازاي" ، ولكن اسأليه اسألة محددة اكتر زي "ايه اهم حاجة حصلت معاك النهاردة؟" ، او "هل حصل حاجة النهاردة مثيرة للاهتمام؟".المرة الجايه لما شريكك يرجع البيت من شغله ، سيبي تليفونك وسيبي اي حاجة في ايدك ، وابذلي مجهود لسماعه والتفاعل معاه ، ممكن الموضوع يبان بسيط ولكن ليه تأثير كبير على الصحة العامة لعلاقتك.

7- وحشتني:

اه انتوا عايشين مع بعض وبتشوفوا بعض كل يوم ، ولكن مازال الاشتياق بينكم موجود ، ومش غلط التعبير عنه ، المره الجاية لما شريكك يرجع البيت من شغله ، قولي له "وحشتني" او " انا مبسوطة برجوعك البيت" ، الكلمات البسيطة دي هتخلي شريكك يحس بالتقدير والحب ، وهيحس انك لسه مقدره وجوده في حياتك على الرغم انكم عايشين مع بعض.

8- ياللا نعمل حاجة مختلفة سوا:

مع صخب الحياة اليومية والضغوطات ، من السهل اننا ننشتغل بالروتين وننسى نقضي وقت ممتع مع شريك حياتنا ، خصوصا لو في اطفال ، ولكن مهم جدا تخصيص وقت ليكم تعملوا فيه حاجة تستمتعوا بيها انتوا الاتنين ، عشان تحافظوا على شرارة الحب في العلاقة ، ومش ضروري ابدا تكون حاجة مكلفة ، ممكن تكون حاجة بسيطة زي عشا رومانسي ، او التمشية سوا في اي مكان ، او حتى تلعبوا مع بعض اي لعبة تحبوها ، ده مش بس هيقوي الروابط في العلاقة ، ولكن هيرجع كمان الاثارة والاستمتاع اللي ممكن يكون قل مع الوقت ، ممكن تخصصوا مثلا يوم كل اسبوع تفطروا فيه بره مع بعض ، او تخلوا الاطفال عند اي حد من العيلة وتتعشوا بره مع بعض في مكان حلو او حتى تقضوه في البيت لوحدكم ، العلاقة بتحتاج للرعاية والاهتمام ، زي ما النبات بيحتاج للماية والضوء عشان يكبر ، عشان كده ماتقلليش من اهمية الاستمتاع او عمل حاجة ممتعة مع بعض كزوجين.

9- انا فاهماك:

في بعض الاحيان ، كل اللي محتاجه شريكك انه يسمع انك فاهماه ، الاستماع لمخاوفه والحاجات اللي بتقلقه حاجة ، وفهمه والتعاطف معاه حاجة تانية ، لما شريكك يحس انك فهماه هيحس بدعم اكتر من ناحيتك ، ولتقوية زواجك ماتخليش كلمة "انا فهماك" نادرة في كلامك ، حتى لو مش متفقة تماما مع وجهة نظره ، ولكن الاعتراف بمشاعره وتبيني له انك فهماه هيحسسه انك فعلا فهماه وحاسه بيه بجد ، الفهم مختلف عن الموافقة او الاستسلام ، لانه معناه ببساطة الاعتراف بوجهة نظر شريكك من غير اصدار احكام عليه.