تحدي ال 21 يوم لبشرة كريستالية صافية بشكل طبيعي
كلنا عارفين ان جمال البشرة بيبدأ من جوه قبل بره ، واكيد قرينا جملة "انت ما تأكله" ، وده صحيح 100% لان كل حاجة بتاكليها ليها تأثير مباشر على بشرتك ، والنهاردة من خلال موضوعنا هنشارك معاكم مشروبين من مشروبات الجمال اللي هتساعدك للحصول على بشرة صافية.
المشروب 1:
المكونات:
- 1 حبة بنجر صغيرة.
- 2 حبة جزر صغيرة.
- 1 حبة تفاح.
- ½ كوباية ماية.
ضيفي كل المكونات في الخلاط واضربيهم مع بعض وبعدين صفيه ، وكده المشروب جاهز.
اشربي كوباية من المشروب ده كل يوم مع وجبة الفطار.
البنجر واحد من الخضروات المعروف انه مليان بالعناصر الغذائية اللازمة لبشرة صافية ، ومكونات العصير كلها بتساعد على تحسين الدورة الدموية ، بالاضافة انه مصدر غني بالفيتامينات A, C ، وده هيدي بشرتك نضارة وتوهج صحي.
المشروب 2:
المكونات:
- 1 حبة رمان.
- 1 حبة تفاح اخضر.
- ½ كوباية ماية
في الخلاط ضيفي الرمان وتفاحة خضرا متقطعة والماية ، اضربيهم مع بعض كويس ، وبعدين صفيه ، وكده المشروب جاهز معانا.
اشربي منه كوباية كل يوم الصبح.
الرمان والتفاح الاخضر بيحتوا على كمية عالية من فيتامين سي, الانزيمات, مضادات الاكسدة اللي بتساعد على شفاء البشرة وتحسينها ، بالاضافة ان الفيتامين ده بيشتغل كمضاد للالتهابات وده بدوره بيقلل من حب الشباب والبقع الغامقة.
تقدري تختاري اي مشروب تفضليه من الاتنين ، ولكن اتأكدي من شرب كوباية واحدة منه كل يوم.
