7 عادات ممكن تبينك اكبر من سنك

ريهام محمود
ريهام محمود
في
صحة
116

"العمر مجرد رقم" الجملة دي على الرغم من انها صح ، الا ان المقصود بيها ان العمر مجرد رقم لما الموضوع بيتعلق بتحقيق الاهداف او التطور عقليا واجتماعيا ، الحاجات دي مالهاش سن ، ولكن لما الموضوع يتعلق بالمظهر الجسدي ، العمر مش مجرد رقم ، لان كل الناس هيجي عليهم وقت ويبان عليهم العمر ، لانها عملية طبيعية ، من المهم قبول فكرة ان التقدم في السن امر لا مفر منه ، ولكن مع ذلك ، مهم جدا انك تعرفي ان بعض الاختيارات واسلوب الحياة ممكن تضيف سنين لعمرك وتبينك اكبر من سنك الحقيقي ، وده اللي هنعرفه النهاردة من خلال المقال بتاعنا.

1- التعرض لاشعة الشمس:

التعرض المفرط لاشعة الشمس فوق البنفسجية واحد من اكتر الحاجات اللي ممكن تبينك اكبر من سنك ، ممكن تضر جلدك جدا ، وتسبب التجاعيد المبكرة, والبقع الغامقة, وترهل الجلد ، وده هيخليكي تباني اكبر من عمرك بكتير ، ولتجنب الاثار الضارة لاشعة الشمس ، ضروري استخدام واقي من الشمس ، مهم كمان لبس القبعات ونضارات الشمس لمنع اشعة الشمس انها تضر عينك.

2- الاجهاد:

التوتر اتكلمنا عنه كتير انه من الحاجات اللي بتأثر على الصحة العامة ، ولكن يمكن منعرفش بشكل كافي اثاره على الجلد ، اثار الاجهاد والتوتر على الجلد مش بتظهر بشكل فوري ، ولكنها بتتراكم بمرور السنين ، فجأة هتبصي لنفسك في المرايا وهتشوفي تأثير الاجهاد ده على وشك وهتلاقي نفسك شكلك اكبر من سنك.

الاجهاد المزمن ممكن يسبب بشرة باهتة, ظهور حب الشباب, تساقط الشعر ، عشان كده لازم تدي الاولوية انك تاخدي فترة راحة واجازة حقيقية وتبعدي عن الضغوطات والتوتر ، فكري في ممارسة انشطة اللي بتساعد على تخفيف التوتر زي اليوجا, ممارسة الهوايات اللي بتحبيها, او حتى مجرد الراحة من غير عمل حاجة معينة.

3- عدم النوم بشكل كافي:

قلة النوم كمان من الحاجات اللي بتأثر علينا صحيا وكمان في مظهرنا وشكلنا ، اي نوم اقل من 6 ساعات يوميا هيأثر على كفاءتك وهيخليكي تشتغلي بكفاءة بنسبة 50% بس طول اليوم ، ضروري النوم مايقلش عن 6 – 8 ساعات كل يوم ، لصحة جسمك وبشرتك.

قلة النوم ممكن تأدي لظهور الاكياس والانتفاخات تحت العين, الهالات السودا, شحوب الجلد, وشكل الوش بشكل عام هيكون مرهق ، عشان كده انتي محتاجة لجدول نوم ثابت واتأكدي انك نايمة في بيئة نوم مناسبة من حيث الاضاءة والتهوية ودرجة الحرارة عشان تقدري تاخدي راحتك في النوم ، لان النوم في بيئة مش مناسبة مش هيساعدك بغض النظر عن عدد ساعات النوم ، انتي محتاجة لنوم طويل وجيد عشان تباني اصغر من سنك.

عادات ممكن تبينك اكبر من سنك.1
عادات ممكن تبينك اكبر من سنك.1

4- سوء التغذية:

من الحاجات اللي ممكن تبينك اكبر من سنك هو سوء التغذية ، اللي بتاكليه بيلعب دور مهم في في صحة بشرتك ، الوجبات السريعة والاطعمة غير الصحية بتأثر على صحة الجلد ، ممكن تسبب لك جفاف الجلد, الهالات السودا, وحب الشباب.

ولكن اكل الاطعمة الصحية الغنية بمضادات الاكسدة والفيتامينات والدهون الصحية هيدي بشرتك توهج وشباب ، اكل الفواكة والخضروات الطازة هيساعدك على تغذية بشرتك وهيبطء من الشيخوخة.

5- اسلوب حياة غير صحي:

اسلوب الحياة غير الصحي وعدم الحركة هيبينك اكبر من سنك ، دوري دايما على طرق ممتعة للحفاظ على لياقتك البدنية ، خصوصا لو انتي بتشتغلي في وظيفة بتخليكي قعدة لساعات طويلة.

مرني جسمك ممكن تمارسي اليوجا, الرقص, التمشية, الجري, او ممارسة تمارين رياضية بسيطة ، وبغض النظر عن الطريقة اللي اختارتيها ، الحفاظ على اللياقة البدنية هو المفتاح عشان تحافظي على شبابك او حتى كمان تباني اصغر من سنك.

6- اهمال العناية بالبشرة:

اتباع نظام ثابت مناسب للعناية ببشرتك ، امر ضروري للحفاظ على شباب بشرتك ، حاجات زي التنضيف, التقشير, الترطيب, استخدام السيروم مهمة للحفاظ على بشرتك صحية.

7- العقلية والنظرة السلبية:

في مثل صيني بيقول "كل ابتسامة تجعلك اصغر بيوم" ، فلو الابتسامة هتخليكي اصغر ، البديهي ان التكشير والتشاؤم والنظرة السلبية هتعملك العكس وهتبينك اكبر من سنك ، عقليتك السلبية ونظرتك للحياة ليها تأثير على مظهرك ، لو انتي متشائمة ودايما بتقلقي على كل حاجة فانتي كده بتجهزي نفسك انك تباني اكبر من سنك ، حاولي انك تبقي ايجابية ومبتسمة دايما حتى لما تحسي ان مافيش حاجة تبتسمي بسببها ، كمان دوري في يومك دايما على حاجة تكوني شاكرة ليها دي طريقة رائعة جدا لتحسين مظهرك ، لو بتحسي بالايجابية والرضا ، هتلاقي نفسك بتشعي توهج داخلي هيخلي العمر مجرد رقم فعلا.

في النهاية ، لازم تعرفي انك مش هتقدري ترجعي عقارب الساعة لورا ولا توقفي الشيخوخة ، ولكن اتجنبي الحاجات اللي قولناها في المقال بتاعنا عشان ماتظهريش اكبر من سنك بدري ، وتحافظي على شكلك شباب وصحي بقدر الامكان.

مقالات متعلقه

7 عادات قوية هتحافظ على شبابك لفترة اطول

7 عادات قوية هتحافظ على شبابك لفترة اطول

8 طرق سهلة لتحسين جسمك من غير ما تصرفي فلوس

8 طرق سهلة لتحسين جسمك من غير ما تصرفي فلوس

7 نصايح هندية هتساعدك تحافظي على شبابك وصحتك

7 نصايح هندية هتساعدك تحافظي على شبابك وصحتك