احصلي على تفتيح فوري ونضارة للبشرة بكريم البنجر

في السوق موجود كتير من كريمات البشرة اللي ممكن تديكي تأثير تفتيح فوري ونضارة لبشرتك ، ولكن في معظم الاحيان المنتجات دي بتحتوي على مواد كيميائية ممكن تضر الجلد مع المداومة على استخدامها ، عشان كده النهاردة هنتعرف مع بعض على كريم البنجر لتفتيح ونضارة البشرة ، طبيعي 100% وغني بالفوايد.

المكونات:

- 1 حبة بنجر صغيرة.

- 1 كوباية ارز.

- كام نقطة عصير ليمون.

طريقة التحضير والاستخدام:

1- هاتي الارز اغسليه كويس من 2 – 3 مرات.

2- حطي الارز في حلة او طاسة كبيرة وضيفي له 2 كوباية ماية.

3- اطبخي الارز كويس لحد ما يستوي وخلي يبقى فيه شوية ماية.

4- ارفعيه من على النار وسيبيه يبرد.

5- هاتي البنجر قشريه ، وقطعيه قطع صغيرة.

6- حطي الارز والبنجر في الخلاط واضربيهم مع بعض كويس ، لحد ما الخليط يبقى ناعم.

7- انقلي الخليط في عبوة نضيفة وضيفي له كام نقطة ليمون ، وامزجي كويس ، وكده الكريم جاهز للاستخدام.

8- ادهني منه على وشك ورقبتك ، سيبيه لمدة 15 – 20 دقيقة ، وبعدها اغسليه بالماية العادية.

البنجر بيحتوي على نسبة عالية من فيتامين سي ، وده فعال لتفتيح البشرة ، كمان بيحمي البشرة من علامات الشيخوخة ، زي التجاعيد والخطوط الرفيعة ، انتظمي على استخدام الكريم ده وهتتفاجئي بالنتيجة.