طريقة عمل الكريب سوزيت
الكريب سوزيت هي وصفة حلويات لذيذة وخفيفة ، ومثالية لوجبة الفطار, العشا, او حتى سناك ، ومثالية كمان لاي مناسبة ، ولو عايزة تعملي حاجة حلوة سريعة ولذيذة ، تابعي معانا السطور الجايه واعرفي الطريقة بالخطوات.
مكونات الكريب:
- ¾ كوباية لبن كامل الدسم (180 مل).
- ½ كوباية ماية باردة (120 مل).
- 2 بيضة كبيرة بدرجة حرارة الغرفة.
- 3 معلقة كبيرة زبدة غير مملحة سايحة.
- 1 معلقة كبيرة سكر.
- ½ معلقة صغيرة من قشر البرتقان المبشور.
- 1/8 معلقة صغيرة ملح.
- 1 كوباية دقيق متعدد الاستخدامات (120 جرام).
مكونات الصوص:
- 2 معلقة صغيرة بشر برتقان.
- 1 كوباية عصير برتقان طازة (حوالي 2 برتقانة كبيرة).
- ½ كوباية زبدة غير مملحة (113 جرام).
- ½ كوباية سكر حبيبات (100 جرام).
طريقة التحضير:
1- لتحضير خليط الكريب ، في الخلاط اخلطي اللبن, الماية, البيض, الزبدة السايحة, السكر, بشر البرتقان, الملح ، امزجي المكونات مع بعض كويس ، لمدة 15 ثانية تقريبا ، اثناء تشغيل الخلاط على سرعة متوسطة ، ضيفي الدقيق بالتدريج لحد ما المكونات تمتزج مع بعض كويس ، لمدة 15 ثانية كمان ، وممكن تخلطي خليط الكريب بالمضرب اليدوي لو مش متوفر بلندر ، سيبي العجينة في درجة حرارة الغرفة تستريح شوية ، لمدة 20 دقيقة ، واثناء الوقت ده هنحضر الصوص.
2-لتحضير الصوص ، في طاسة كبيرة ، اخلطي بشر البرتقان, عصير البرتقان, الزبدة, السكر لحد ما يغلي على نار متوسطة لعالية ، مع التقليب من وقت للتاني ، خفضي الحرارة لمتوسطة منخفضة ، سيبيه يغلي على نار خفيفة مع التقليب من وقت للتاني لحد ما يتقل شوية لمدة 15 دقيقة تقريبا ، قللي الحرارة على قد ما تقدري للحفاظ على الصلصة دافية ، لحد ما نسوي الكريب.
3-لعمل الكريب ، ادهني صينية الكريب او اي طاسة صغيرة بالزبدة السايحة على نار متوسطة منخفضة ، ضيفي حوالي ¼ كوباية من خليط الكريب وحركيه عشان الخليط يتوزع في طبقة رقيقة متساوية ، وسيبيه لحد ما ياخد لون بني دهبي فاتح حوالي من دقيقة لدقيقتين ، اقلبي الكريب على الناحية التانية لحد ما لونه يبقى بني دهبي فاتح ، حوالي 30 ثانية كمان ، طلعيه من الطاسة ، وطبقية ارباع على شكل مثلث وحطيه على صينية او طبق ، كرري مع باقي الخليط الباقي ، وبين كل قطعة كريب امسحي الطاسة بمنديل وضيفي زبدة سايحة.
4-تجميع المكونات ، ضيفي كل قطع الكريب لصوص البرتقان في الطاسة ، وسيبيه على نار متوسطة منخفضة ، حوالي 3 دقايق.
قدميه وضيفي عليه صوص البرتقان الاضافي ، ممكن كمان تضيفي فوقيه بولة من الايس كريم او كريم شانتيه حسب رغبتك.
