طريقة عمل ايس كونو بسيرب الفواكة
لو عايزة حاجة سقعة ومنعشة تواجهي بيها حر الصيف ، مافيش افضل من الايس كونو ، حلى سهل وسريع وبسيط وفي نفس الوقت منعش جدا للصيف.
المكونات:
- 750 مل (3 ¼ كوباية ناقصين 2 معلقة كبيرة) من عصير البرتقان الطازة او المركز.
- 750 مل (3 ¼ كوباية ناقصين 2 معلقة كبيرة) من عصير الاناناس الطازة او المركز.
- 750 مل (3 ¼ كوباية ناقصين 2 معلقة كبيرة) من عصير الكرز طازة او مركز.
- 750 مل (3 ¼ كوباية ناقصين 2 معلقة كبيرة) من عصير التفاح طازة او مركز.
- 200 جرام (1 كوباية) سكر حبيبات.
- الوان طعام – احمر, اخضر, اصفر (اختياري).
- تلج مجروش.
طريقة التحضير:
1- اول حاجة اغلي كل نوع عصير فاكهة لوحده مع كمية من السكر حسب ذوقك ، وقلبيه لحد ما السكر يدوب ، وقوام العصير يتقل ويبقى سميك شوية.
2- تقدري تضيفي الوان طعام للعصير عشان يديكي لون اقوى ، ولكن ده اختياري.
3- حطي التلج المجروش او مكعبات التلج في محضرة الطعام ، واضربيه لحد ما التلج يبقى ناعم.
4- حطي التلج في كاسات او كوبايات التقديم وصبي فوقيه العصير ، لحد ما يغطي التلج كله ، وممكن تزينيه بقطع فاكهة.
5- وكده يبقى عندك ايس كونو منعش بنكهات مختلفة.
