شوربة البطاطس والكرات من فيلم راتاتوي
من فينا ماتفرجش على فيلم راتاتوي او خلطبيطة بالصلصة كلنا شوفناه وبنحبه ، وبنحب الاطباق اللذيذة اللي اتعملت فيه ، واحنا سبق وشاركنا معاكم طريقة عمل الراتاتوي ، النهاردة هنعرف مع بعض وصفة مختلفة من الفيلم وهي طريقة عمل شوربة البطاطس والكرات اللي بوظها لينجويني وريمي صلحهاله ببعض الاضافات البسيطة.
المكونات:
- 2 معلقة كبيرة زبدة.
- 1 كوباية بطاطس متقطعة مكعبات.
- 4 كوبايات شوربة.
- 3 اوراق غار (ورق لوري).
- 1 معلقة كبيرة فلفل اسود.
- ½ كوباية خل تفاح.
- 1 معلقة كبيرة ملح.
- 1 كوباية كريمة ثقيلة.
- 1 كوباية جبنة بارميزان مبشورة
- 1 كوباية بصل مفروم.
- 1 كوباية مشروم متقطع.
- 2 معلقة كبيرة ثوم مفروم.
- 1 كوباية كرات متقطع.
- 2 معلقة كبيرة بقدونس طازة مفروم.
- 2 معلقة كبيرة زعتر طازة منزوع السيقان مفروم ، او 1 معلقة كبيرة زعتر مجفف.
- 2 معلقة كبيرة ثوم معمر طازة مفروم + ثوم معمر اضافي للتزيين.
- 2 معلقة كبيرة بردقوش طازة او ممكن تستبدليه بزعتر طازة.
طريقة التحضير:
1- في حلة كبيرة وعميقة ، دوبي الزبدة على نار متوسطة لحد ما تعمل رغوة وتبدأ تتحول للون البني ، ضيفي البطاطس وقلبيها في الزبدة لحد ما تتحول للون البني ، حوالي 5 – 10 دقايق.
2- صبي الشوربة وسيبيها تغلي مع البطاطس لمدة 5 دقايق ، وضيفي لها ورق اللوري.
3- ضيفي خل التفاح, البصل, المشروم, الثوم ، وسيبي الخليط يغلي لحد ما البصل يطرى ويبقى لونه شفاف ، حوالي 10 دقايق تقريبا ، ضيفي الكريمة الثقيلة وسيبيها تغلي على نار خفيفة.
4- ضيفي الكرات, الملح, البقدونس, الثوم المعمر المفروم ، وسيبي الشوربة تغلي على نار خفيفة لمدة 10 دقايق كمان ، او 5- لحد ما لون الكرات يظهر ولكن مايبقاش طري اوي تبقى لسه في شوية قرمشة ، بعدها ضيفي الزعتر والبردقوش ، والجبنة البارميزان.
6- سيبي الشوربة تغلي على نار خفيفة لحد ما الجبنة تدوب تماما ويبقى قوامها سميك شوية ، بعدها خلي النار متوسطة لمنخفضة وسيبيها تغلي لمدة 10 دقايق كمان تقريبا ، وقلبيها من وقت للتاني.
7- ارفعي الشوربة من على النار ، سيبيها تبرد شوية ، واضربيها في الخلاط لحد ما تبقى كريمي وناعمة من غير اي كتل ، 8- وممكن تقدميها زي ما هي من غير ما تضربيها في الخلاط حسب الرغبة.
9- قدميها في الاطباق وزينيها بالثوم المعمر وكرات متقطع ، مع خبز مقرمش.
