11 طريقة مختلفة لوضع الايلاينر الابيض
الايلاينر او الكحل الاسود هو دايما المتصدر وعنصر اساسي في المكياج ، ولكن الايلاينر الابيض من الحاجات اللي بتضيف وسع للعين وبتظهرها ، والنهاردة من خلال موضوعنا هنشوف مع بعض 11 طريقة مختلفة لوضع الايلاينر الابيض.
1- وضعه على خط الماء:
ممكن تستخدمي محدد العيون الابيض على خط الماء لرفع العين بشكل فوري وتكبيرها ، لما بيتحط على خط الماء بيخلي مقلة العين تبان اكبر ، ولو انتي عيونك مبطنة الكحل الابيض هيكون مفيد ليكي جدا لانه هيساعد على توسيع العين وهيظهرها ، وللحصول على مظهر متوازن للعين حددي خط رموشك العلوي باستخدام كحل اسود واملي خط الماء بكحل ابيض.
2- الزاوية الداخلية للعين:
استخدمي الكحل الابيض في الزاوية الداخلية للعين في منطقة القناة الدمعية لاضافة اضاءة فورية للعيون الباهتة والتعبانة ، حددي العين بالكحل الابيض على شكل حرف V في الزاوية الداخلية للعين.
3- قاعدة اساسية للايشادو:
عشان تظهري لون الايشادو اكتر وتخليه يدوم فترة اطول ، استخدمي الكحل لابيض كقاعدة اساسية على الجفن قبل وضع الايشادو ، حطيه على كامل الجفن وزعيه بصوباعك على الجفن كله بشكل متساوي وبعدها حطي الايشادو بتاعك.
4- رفع عضمة الحاجب:
ممكن تستخدمي الكحل الابيض لرفع عضمة الحاجب ، عشان ترسميه مظبوط امشي على رسمة حواجبك الطبيعية ، وممكن تحطي الكحل الابيض اسفل اعلى نقطة في عضمة الحاجب بس عشان تبرزيها بشكل طبيعي.
5- على قوس كيوبيد:
ممكن تحطي الكحل الابيض على منطقة قوس كيوبيد فوق الشفايف ، لتسليط الضوء على شفايفك لابراز شكل الشفايف واظهارها بحجم اكبر.
6- تحت خط الرموش السفلي:
حطي الكحل الابيض على خط الرموش السفلي لمظهر جريء ، ابدأي بسحب خط الرموش السفلي بالراحة عشان تظهري خط الماء ، واداي ارسمي خط رفيع على طول خط الماء ، ومديه شوية لبره في شكل مجنح ، امزجيه وخليه Smudge ، للحصول على مظهر ناعم ، او ارسمي خط سميك للحصول على مظهر جريء اكتر ومحدد اكتر للعين.
7- زاوية مجنحة:
هاتي فرشة تكون بزاوية واغمسيها في محدد عيون ابيض كريمي او جل ، وارسمي جناح صغير على زاوية العين الخارجية لكل عين ، ابدأي من نص جفونك ده هيضيف لوك طبيعي وغير مبالغ فيه ، ولو عايزة تحديد اكتر حددي باقي عينك باللون الاسود او اي لون تاني تفضليه ، ومكن كمان ترسمي جناح صغير بالكحل الابيض على الزاوية الداخلية للعين ، تقدري انتي تجربي اكتر من طريقة واكتر من رسمة لحد ما توصلي لاكتر رسمة لايقة على عينك.
8- على تنية الجفن:
ارسمي خط سميك على الزاوية الخارجية للعين ومديه لبره ولفوق على طول تنية الجفن ، واملي الرسمة بايشادو نيود للوك ناعم ، او املي الرسمة بايشادو بالوان جريئة او ايشادو لامع للوك جريء وانهي اللوك برسم خط على خط الماء السفلي.
9- حوالين العين:
حطي حدد العين الابيض على طول تنية الجفن ، وامشي على شكل خطوط رموشك العلوية ، وكرري نفس الطريقة تحت خط الرموش السفلية ، دلوقتي وصلي الزوايا الخارجية ببعض ، ومددي الخطوط لبره لعمل جناح ، الرسمة دي بتدي اضاءة للعين وبتوسعها ، اللوك ده مناسب للخروجات النهارية او التجمعات الخارجية ، ممكن كمان يبقى مناسب لحفلة صيفية او على الشاطيء.
10- جناح على شكل كروس:
ارسمي الزوايا الداخلية للعين بالكحل الابيض ، دلوقتي ارسمي خط سميك من نص الجفون ومديه لبعد الزوايا الخارجية للعين لتكوين شكل مجنح ، وبعدها ارسمي خط رأسي يتقاطع ع الجناح ، ضيفي لمسة من الايشادو النيون على الزوايا الداخلية والخارجية لتسليط الضوء على العيون وتكبيرها.
11- فوق تنية الجفن:
استخدمي محدد العيون الابيض السائل وارسمي بيه خط رفيع فوق تنية الجفن بحركة واحدة سلسة ، وحافظي ان الخط يكون رفيع للحصول على مظهر دقيق وحاد ومحدد ، ممكن تضيفي ايشادو لامع اسفل الحواجب مباشرة وفوق خط الايلاينر الابيض.
نصايح عند استخدام الكحل الابيض:
- استخدمي الوان ايشادو دافية زي البني, الاصفر, الخردل, الزيتوني, الذهبي لموازنة برودة الكحل الابيض.
- للحصول على مظهر جريء مع الكحل الابيض ، استخدمي روج احمر ، وللحصول على مظهر مكياج يومي ، استخدمي روج نيود.
- الكحل الابيض هيدي مظهر اكبر واكتر حيوية للعين ، وبيرفع وبيوسع العيون العميقة والمبطنة والمترهلة بشكل فوري.
افكار لرسم الايلاينر الابيض:
