ازاي تستخدمي خل التفاح كبلسم للشعر

بلسم الشعر يعتبر خطوة مهم للترطيب بعد غسل الشعر بالشامبو ، وانواع البلسم الموجودة في السوق معظمها بتحتوي على مواد كيميائية بتضر الشعر ، لكن انتي تقدري بسهولة تستبدلي البلسم بخل التفاح وهتوصلي لنفس النتايج ، حمض الاسيتيك الموجود في خل التفاح بيساعد على ازالة بقايا تراكم المنتجات وبيساعد في الحصول على خصلات شعر مترطبة وبتلمع ، تابعي معانا السطور الجايه واتعرفي على طريقة استخدام خل التفاح كبلسم للشعر ، وكمان وصفة شامبو وماسك بخل التفاح.

فوايد استخدام خل التفاح للشعر:

- بيضيف لمعان للشعر.

- بيزيل تراكم المنتجات من على الشعر ، وده واحد من الاسباب الرئيسية لانسداد بصيلات الشعر اللي محتاجة لازالتها لتسريع عملية نمو الشعر.

- بيساعد في علاج مشكلة انحسار الشعر.

- بيساعد على منع تساقط الشعر.

وصفة بلسم خل التفاح:

- اخلطي جزء واحد من خل التفاح من 3 اجزاء من الماية ، يعني كمية خل الماية تكون قد كمية خل التفاح 3 مرات.

- والنسبة دي بتختلف من شخص للتاني حسب نوع شعرك كل ما كان الشعر دهني اكتر قللي نسبة الماية لنسبة خل التفاح ، نسبة الماية تكون قد نسبة خل التفاح او اكتر.

- بعد غسل الشعر بالشامبو بالطريقة العادية وشطفة ، حطي عليه خليط خل التفاح وسيبيه كام دقيقة وبعدها اشطفيه بالماية.

ولو عندك زجاجة بخاخ هيكون افضل انك تحطي فيه الخليط وترشيه على الشعر بالتساوي.

- ممكن كمان تستخدمي الخليط ده لفك تشابك الشعر ، لو رشتيه على شعرك وهو ناشف هيسهل عليكي عملية تمشيط الشعر وفك التشابك.

وصفة شامبو خل التفاح:

- هاتي كوبايتين ماية مقطرة ، معلقة كبيرة من صودا الخبز ، ومعلقة كبيرة من خل التفاح.

- اخلطي صودا الخبز مع الماية وقلبيها لحد ما تدوب تماما في الماية وتتخلصي من اي تكتلات.

- ضيفي خل التفاح للماية وقلبيه كويس.

- استخدمي الشامبو الطبيعي ده كبديل للشامبو العادي ، اغسلي شعرك بيه بالطريقة العادية زي الشامبو العادي وبعدها اشطفيه بالماية ، واستخدمي البلسم واشطفيه بالماية.

ماسك خل التفاح للمعان الشعر:

المكونات:

- 1 ½ معلقة كبيرة من خل التفاح.

- 1 معلقة صغيرة زيت زيتون.

- 2 معلقة كبيرة عسل.

الطريقة:

- في طبق اخلطي كل المكونات وقلبيها مع بعض كويس.

- قسمي شعرك اقسام صغيرة ، خدي من الخليط بالفرشة ووزعيها على خصلات الشعر من الجذور للاطراف.

- لمي شعرك كحكة ، وسيبيه لمدة 30 دقيقة تقريبا.

- بعدها اغسلي شعرك بالشامبو والبلسم بالطريقة العادية.

- كرري الماسك مرتين في الاسبوع.

وصفة صفار البيض وخل التفاح لتنعيم الشعر:

المكونات:

- صفار بيضة.

- 1 معلقة صغيرة زيت خروع.

- 1 معلقة صغيرة خل تفاح.

الطريقة:

- في طبق اخلطي كل المكونات ، وامزجيهم مع بعض كويس.

- قسمي شعرك خصلات صغيرة ووزعي الماسك باستخدام فرشة على الشعر كله من الجذور للاطراف.

- لمي شعرك كحكة ، وسيبيه لمدة 30 دقيقة تقريبا.

- بعدها اغسلي شعرك بالشامبو والبلسم بالطريقة العادية.

- كرري الماسك مرة واحدة كل اسبوعين.