مشروب الكولاجين الطبيعي لجمال البشرة والشعر والاظافر
اكيد كلنا عارفين ايه هو الكولاجين وفوايده للبشرة والشعر والضوافر ، واحنا سبق اتكلمنا عنه قبل كده في مقالاتنا ، باختصار لو انتي بتدوري على حاجة ليها فوايد جمالية, تحسين قوة العضلات والعضم, المساعدة في انقاص الوزن, تعزيز صحة القلب, والمساعدة في الهضم بشكل افضل ، الكولاجين هو المكمل المناسب ليكي ، تقدري تاخدي الكولاجين على شكل كبسولات او بودر ، لكن احنا النهاردة هنشارك معاكم مشروب كولاجين طبيعي ، تقدري تعمليه بنفسك في البيت بمكونات طبيعية.
انواع الكولاجين:
في نوعين من الكولاجين في الجسم.
- الكولاجين الداخلي: وده موجود بشكل طبيعي في الجسم وبيتم تصنيعه من خلال اجسامنا نفسها.
- الكولاجين الخارجي: وده بيجي من مصادر خارج الجسم ، زي الاطعمة الغنية بالكولاجين ومكملات الكولاجين.
والكولاجين مش بس مفيد للبشرة والشعر والاظافر ، ولكن كمان للصحة العامة للجسم.
مشروب الكولاجين الطبيعي:
هتحتاجي:
- 2 معلقة كبيرة من الحنطة السودا المحمصة (متوفرة عند العطار).
- 2 معلقة كبيرة من بذور القرع (متوفرة عند العطار).
- ½ كوباية مانجا متقطعة.
- ½ كوباية كيوي.
- ماية (حسب الحاجة).
الطريقة:
في مطحنة الخلاط ضيفي كل المكونات الجافة واطحنيها لبودرة ناعمة ، وبعدين ضيفي لها الفواكة وشوية ماية للخلط وامزجي لحد ما القوام يبقى سايل ، صبيه في كوباية وكده مشروب الكولاجين جاهز للشرب.
كولاجين بودر:
هتحتاجي:
- 25 جرام من بذور القرع (غني بالجليسين).
- 25 جرام من فول الصويا المحمص (غني بالبرولين).
- 1 معلقة كبيرة املا / مسحوق عنب الثعلب الهندي (غني بفيتامين سي), (وهتلاقيه متوفر عند العطار).
- 50 جرام من الشوفان المحمص.
- 1 معلقة صغيرة كركم (غني بمضادات الاكسدة).
- 25 جرام من الشوكولاتة الغامقة او مسحوق الكاكاو (غنية بالنحاس).
الطريقة:
في مطحنة الخلاط ضيفي كل المكونات واطحنيها لمسحوق ناعم ، خزنيه في برطمان محكم الغلق ، تقدري تضيفي معلقة كبيرة من المسحوق ده لكوباية ماية دافية, او في اي نوع عصير, او مع اللبن الدافي ، واشربيه يوميا.
