11 وصفة طبيعية للحصول على بشرة كريستالية صافية
للحصول على بشرة صافية خالية من اي علامات, بثور, ورؤوس سودا ، ده محتاج عناية ، ومش لازم ابدا عشان تحققي ده انك تستخدمي منتجات غالية بس ، لكن انتي تقدري توصلي لنفس نتيجة المنتجات بوصفات طبيعية بسيطة ، والنهاردة من خلال موضوعنا هنشارك معاكم وصفات طبيعية لبشرة كريستالية صافية خالية من العيوب.
وصفات طبيعية لبشرة كريستالية:
1- ماية الديتوكس:
الديتوكس ليه فوايد كتير لجسمنا وبشرتنا ، وعشان تحضري ماية الديتوكس هتحتاجي.
- خيار.
- ليمون.
- اوراق نعناع طازة.
- ماية.
قطعي الليمون والخيار لشرايح وحطيهم في 2 لتر ماية ، وضيفي لهم اوراق النعناع ، واشربي من الماية دي على مدار اليوم ، هتساعد على ازالة السموم من الجسم والبشرة ، الخيار بيساعد على تجديد البشرة ، الليمون بيعيد توازن الجهاز الهضمي وكمان يعتبر مصدر لفيتامين سي المفيد للبشرة ، واوراق النعناع بتعالج عسر الهضم والالتهابات.
2- زيت جوز الهند:
دفي زيت جوز الهند على النار شوية ، وخدي منه على اطراف صوابعك ودلكي بيه البشرة في حركات دائرية ، سيبي البشرة تمتص الزيت كام دقيقة وبعدها امسحي الزيت الزيادة بوسادة قطنية او قطعة قماش قطن.
زيت جوز الهند مرطب طبيعي للبشرة ، وبيحتوي على خصائص مضادة للميكروبات ، وبيدي توهج ونضارة طبيعية للبشرة.
3- خل التفاح:
اخلطي كميات متساوية من خل التفاح والماية ، وباستخدم قطعة قطن ، ادهني بشرتك بالخليط ده ، وسيبيه طول الليل ، واغسليه الصبح ، خل التفاح يعتبر مقشر طبيعي للبشرة ، وقابض للبشرة ، وبيمنع انتشار العدوى والالتهاب.
4- الليمون:
هاتي ليمونة واقطعيها نصين ، خدي نص منها وافركيه مباشرة على البشرة في حركات دائرية لمدة 4 – 5 دقايق بعدها اشطفي بشرتك بماية باردة ، الليمون مصدر لحمض الستريك او فيتامين سي اللي بيساعد على تفتيح البشرة والتخلص من البقع والعيوب.
ملحوظة: لو بشرتك حساسة اتجنبي استخدام الليمون تماما.
5- جل الالوفيرا:
جل الالوفيرا يعتبر علاج فعال لحب الشباب ، هاتي ورقة صبار وافتحيها واستخرجي منها جل الصبار ، وزعي الجل مباشرة على بشرتك مع التدليك ، سيبيه لمدة 8 – 10 دقايق ، وبعدها اغسليه ، وممكن تسيبيه على البشرة طول الليل.
6- العسل:
هاتي كمية صغيرة من العسل ، ودلكي يها بشرتك في حركات دائرية ، وسيبيه على البشرة 10 – 15 دقيقة وبعدها اغسليه ، العسل بيساعد على حبس الرطوبة في الجلد ، وبيمنع تلف الجلد وبيحميه من الالتهابات والعدوى الناتجة عن البكتيريا ، لانه بيحتوي على خصائص مضادة للميكروبات والبكتيريا.
7- الخيار:
الخيار بيحتوي على فيتامين سي وحمض الكافيك ، ولما بيتم استخدامه على البشرة بيساعد على تهدئتها وتجديدها ، الخيار بيتكون من 96% ماية وده بيخليه مرطب عالي للبشرة ، وآمن جدا للبشرة الحساسة ، اعملي ماسك الخيار لتهدئة البشرة وعلاج حب الشباب.
وممكن تفركي شريحة خيار مباشرة على البشرة ، او تحطيها فوق الحبوب مباشرة ، او حتى تحطيها تحت الشيت ماسك.
8- زيت الخروع:
زيت الخروع ممكن تستخدميه كغسول زيتي لطيف للبشرة او مزيل لمكياج العيون ، زيت الخروع بيحتوي على مركب معروف بأسم حمض الونسيليك اللي بيساعد على تطهير الجلد من البكتيريا المسببة لحب الشباب.
9- الاسبرين:
المادة النشطة في الاسبرين هي حمض اسيتيل الساليسيليك ، اللي ليه خصائص مطهرة ، والخصائص دي بتساعد على علاج الحبوب والبثور, بتقلل التورم, وتقفل المسام ، وبتنضف البشرة وبتديها نعومة بشكل عام.
اطحني الاسبرين واخلطيه مع الماية لتكوين عجينة ، وزعي الخليط على بشرتك ، سيبيه لمدة 10 – 15 دقيقة ، وبعدها اغسليه بالماية.
10- الكاموميل:
شاي الكاموميل او البابونج معروف انه ليه تأثير مهديء ، ولكن ليه فوايد كمان للبشرة ، يعتبر مضاد للاكسدة, مضاد للاتهابات, قابض خفيف للبشرة ، وبيستخدم في علاج التهابات الجلد.
اعملي شاي الكاموميل بالطريقة العادية ، وباستخدام قطعة قطن ادهني بشرتك ، وسيبيه لمدة 10 – 15 دقيقة ، وبعدها اغسليه.
11- الشاي الاخضر:
اثبتت الدراسات ان الشاي الاخضر باستخدامه مرتين في اليوم بيساعد على علاج حب الشباب ، لانه غني بمضادات الاكسدة اللي بتساعد على حماية الجلد وبتحارب الجذور الحرة اللي ممكن تسبب تلف البشرة.
اعملي الشاي الاخضر بالطريقة العادية ، باستخدام قطنة ادهني بشرتك ، سيبيه لمدة 10 – 15 دقيقة ، وبعدها اغسليه.
