لو شريكك مش رومانسي: اعملي ال 6 حاجات دول

الرومانسية هي سكر والتوابل في العلاقة ، واكيد كلنا عايزين نعيش تجربة الرومانسية مع الشخص اللي بنحبه ، الكلمات الحلوة, الهدايا, المواعيد المفاجئة, الحنية, القبلات, الحضن والقايمة طويلة مالهاش حصر ، ولكن في حالة ان الراجل مش بيعرف يعبر برومانسية؟ وانتي عارفة انه بيحبك ولكن بتتمنى انه يظهر اكتر من كده ، النهاردة من خلال موضوعنا هنقولك تعملي ايه لو شريكك مش رومانسي بما فيه الكفاية.

1- حاولي تفهمي دوافعه:

اكيد مهم انه شريكك يقولك كلام حلو ورومانسي ، لكن انه يكون معاكي راجل بيحبك بصدق هو الاهم ، واحنا بنقولك ده لان بالفعل في كتير من الرجالة بيتقنوا الكلام الحلو واظهار الايماءات الرومانسية ، ولكن مش بيحبوا بصدق ، وبالتالي الراجل ممكن يكون رومانسي لكن مش بيحبك.

اول حاجة المفروض تعمليها انك تفهمي حالة قلب شريكك ، هل بيحبك فعلا بصدق واخلاص ولكن مش بيعرف يعبر عن ده كويس او بالطريقة اللي بتحبيها؟ او هو مش رومانسي عشان مش مهتم بيكي اصلا ، لازم تلاحظي وتعرفي وتقولي الحقيقة لنفسك.

فلو شريكك مش بيهتم بيكي اصلا ، يبقى ماتعلقيش ده على شماعة "انه مش رومانسي" وتخدعي نفسك ، ولكن لو بيحبك ومهتم بيكي ولكن هو مش راجل رومانسي ، في الحالة دي تقدري تعملي حاجة.

وجود راجل بيديكي كل المشاعر اللي انتي محتاجاها ، وبيعمل كل حاجة عشانك ، وفي نفس الوقت بيحبك بصدق ، الاتنين مايتعارضوش مع بعض ابدا وممكن يبقوا في نفس الشخص.

ولكن في حالة ان الجانب الرومانسي عنده مش احسن حاجة ، اعرفي انك تقدري تشتغلي على ده وتحسنيه مادام هو منفتح على التعلم.

2- اتكلمي معاه في الموضوع:

الكلام مع بعض مهم جدا ، التواصل ممكن يغير حياتكم وعلاقتكم بشكل جذري ، وفي الموقف ده انتي محتاجة للتواصل ، اتكلمي معاه على اللي انتي عايزاه واللي انتي حاسه بيه.

لازم تعرفي كويس جدا ان زوجك مش هيقرا افكارك وماتتوقعيش انه هيعمل اللي انتي عايزاه من نفسه ، لانك لما هتلاقيه مش بيعمل اللي انتي عايزاه هتصيبك خيبة امل وهتفكري انه مش بيحبك كفاية.

ممكن يكون زوجك بيعمل حاجات كتير حلوة ليكي ، ولكن لمجرد انه مش بيعمل اللي في خيالك واللي انتي متوقعاه منه هتفضلي حاسه بالاحباط.

عشان كده حاولي انك تعبري عن مشاعرك وتوقعاتك وكل الحاجات اللي انتي عايزاها ، لانه ممكن جدا التعبير عن مشاعرك لشريكك في محادثة بسيطة وصادقة هو كل المطلوب ، لانه ممكن يكون مش واخد باله او مشتت ومحتاج بس انك تنبهيه.

وبالتالي لازم تقولي لزوجك انك هتقدري جدا لو عبر برومانسية اكتر في العلاقة.

3- اظهري له طرق عملية عشان يكون رومانسي:

في بعض الاحيان انتي محتاجة اكتر من مجرد محادثة بينكم ، محتاجة انك تديه نصايح ، لان ممكن جدا يكون سمع اللي انتي قولتيه ولكن ماعندوش اي فكرة يبدأ منين ، عشان كده عليكي انك توريه.

اقترحي عليه طرق عشان يبقى رومانسي معاكي من خلال المشاركة في الانشطة المشتركة اللي ممكن تستمتعوا فيها مع بعض ، زي انكم تشوفوا فيلم مع بعض, حضور حفلة, التمشية مع بعض, ارقصوا سوا, او حتى الطبخ مع بعض.

ممكن تطلبي منه انه يقرا من مصادر كويسة, يراقب الرجالة الرومانسيين بيعملوا ايه, والفرجه على الافلام الرومانسية ، كل ده هيديه فكرة ازاي يبقى رومانسي اكتر.

والحاجات دي مش بس هتزود رومانسيته ، ولكن كمان هتقوي الروابط بينكم وهتديكم وجهات نظر جديدة عن تحسين علاقتكم.

4- خليكي قدوة:

بعد ما تقولي له وتعبري عن مشاعرك ، اظهري ده ، لو عايزاه يبقى رومانسي اكتر اظهري له الرومانسية شكلها ايه ، اتواصلي معاه بلغة الحب الخاصة بيه واتأكدي انه يلاحظ ده.

انك تاخدي المبادرة انك تكوني رومانسية هي واحدة من الطرق المؤكدة للتأثير على زوجك ، مش شرط تبدأي بحاجة كبيرة ، ممكن تبدأي بالايماءات البسيطة, زي مسك الايد او تحطي ايدك على رجله بشكل غير متوقع وهو سايق العربية, او سيبي له رسالة حب, ابعتي له رسالة نصية لطيفة في نص اليوم, خططي لمفاجأة, ابدأي انتي بلحظات حميمية ، اخلقي جو رومانسي في علاقتكم.

خططي لسهرة خاصة حلوة بينكم على ضوء الشموع وعشا رومانسي وديكورات بسيطة ولبس حلو.

الحاجات دي هتساعد في ظبط الحالة المزاجية وهتدخله في مود رومانسي وهتتشعل شرارة الحب بينكم تاني ، وده هيخلي شريكك متصل بالجانب الرومانسي فيه اكتر.

5- ركزي على الجوانب التانية الكويسة فيه:

اثناء العمل على النصايح اللي قولناها فوق ، ركزي على حاجات تانية كمان ، لو شريكك بيحبك فعلا ، فأكيد انه بيعمل حاجات تانية بيظهر بيها ده.

ممكن يكون مش بيعمل اللي انتي عايزاها بالظبط ، ولكن اكيد انه بيعمل حاجات تانية لطيفة بيعبر بيها عن حبه ليكي ، حددي الحاجات دي وركزي عليها.

افهمي انه ممكن يكون مش بيتكلم بلغة الحب الخاصة بيكي انتي ، ولكن بينقل لك حبه بطرق ايجابية تانية ، اشرحي له لغة حبك ، ولكن في نفس الوقت اظهري له تقديرك للحاجات اللي بيعملها ، التقدير يعتبر طريقة تشجيع للاشخاص عشان يدوا اكتر.

6- اديه الوقت:

الراجل اللي ماتعودش يكون رومانسي اكيد مش هيقوم بين يوم وليلة وهيبقى ملك الرومانسية ، مادام هو منفتح على التعلم ، هيتعلم ، ولكن ده مش هيحصل بين يوم وليلة.

خليكي صبورة واديه وقته ، لان الموضوع محتاج وقت وجهد منكم انتوا الاتنين لبناء علاقة رومانسية ، ماتستهونيش بجهودك ولكن خليكي صبورة ولاحظي التحسينات والتغيرات الصغيرة بمرور الوقت.

كمان خليكي واقعية عن توقعاتك منه ، ماتحاوليش انك تقارني شريكك او علاقتك بشخص تاني ، لان دي بداية التعاسة في العلاقة ، وحاولي تكوني منفتحة اكتر لان الرومانسية ليها معاني مختلفة باختلاف الاشخاص ، عشان كده لازم تفكري في ده كمان.

اتكلمي معاه عن معنى الرومانسية بالنسبة لك ، وبعدها تقدروا انتوا الاتنين تلاقوا حل وسط ، ومع ذلك النصايح دي ممكن تكون مش فعالة في حالة ان في مشكلة اساسية في العلاقة.

وممكن بعد تنفيذ النصايح دي لو احتاجتوا ممكن تستشيروا اي متخصص علاقات ، هيساعدكم على التعبير عن نفسكم بشكل اسهل والتعامل مع مشاعركم والحصول على منظور افضل وتحسين علاقتكم.

في النهاية ممكن تعلم الرومانسية والتعبير عنها بشكل مثالي جدا.