طرق علاج انسداد مسام البشرة في البيت بمكونات طبيعية

المسام المسدودة بتحصل بسبب الافراط في انتاج الزهم (الزيت) في الغدد ، وده بدوره بيتسبب في ظهور الرؤوس السودا والبيضا وبتدمر نسيج البشرة وبتسيب الجلد باهت ، والنهاردة من خلال موضوعنا هنتعرف على طرق علاج المسام المسدودة وتنضيفها.

طرق علاج المسام المسدودة:

1- خل التفاح:

خل التفاح بيساعد على التخلص من الجراثيم وتنضيف المسام ، حمض الاسيتيك الموجود في خل التفاح بيساعد على ازالة خلايا الجلد الميتة ، والخصائص القابضة لخل التفاح بتحافظ على البشرة نضيفة ونقية.

اخلطي خل التفاح مع الماية بكميات متساوية ، امزجيهم مع بعض كويس ، وادهني بشرتك بالخليط باستخدام قطنة ، سيبيه على البشرة لمدة دقايق ، وبعدها اغسليه بماية فاترة.

2- العسل:

العسل مفيد للبشرة الدهنية والجافة ، بيساعد على تفتيح لون البشرة وازالة الشوائب من الجلد ، وخصائصه الطبيعية المضادة للبكتيريا بتساعد على منع حب الشباب والبثور.

اخلطي العسل مع عصير الليمون بكميات متساوية ، امزجيهم كويس ، ادهني بشرتك بالخليط باستخدام قطنة ، سيبيه لمدة 15 – 20 دقيقة ، وبعدها اغسليه بماية فاترة.

3- اللبن ودقيق السميد:

السميد يعتبر مقشر فعال للبشرة ، بيساعد على ازالة خلايا الجلد الميتة وبيفتح المسام ، واللبن منظف طبيعي بيزيل شوائب البشرة وبيساعد على اضافة لمعان للبشرة.

هاتي ¼ كوباية من السميد وضيفي له اللبن لحد ما تتكون عندك عجينة سميكة ، وزعي الخليط على بشرتك ودلكيه في حركات دائرية لمدة دقايق ، وبعدها اغسلي شرتك بماية باردة.

4- جل الالوفيرا:

الصبار يعتبر علاج فعال للبشرة الدهنية ، بيساعد على تهدئة المسام المنتفخة ، بيقلل من حجم المسام ، بيحافظ على المسام نضيفة ونقية ، جل الالوفيرا يعتبر من افضل العلاجات المنزلية لتنضيف المسام المسدودة.

هاتي ورقة صبار افتحيها واستخرجي منها الجل ، قطعيه لقطع واضربيه في الخلاط ، وزعي الجل على بشرتك ، وسيبيه لحد ما ينشف ، وبعدها اغسليه بماية باردة.

5- صودا الخبز:

صودا الخبز (الكربوناتو) واحد من اسهل الطرق لتنضيف بشرتك من غير مواد كيميائية قاسية ، بيحتوي على خصائص مضادة للبكتيريا ومضادة للالتهابات ومضادات اكسدة ، بيساعد على تقشير خلايا الجلد الميتة والحفاظ على البشرة نضيفة ونقية.

اخلطي ½ كوباية من صود الخبز مع 2 كوباية ماية سخنة ، ادهني بشرتك بالخليط ، سيبيه ينشف ، وبعدها اغسليه بماية باردة.

6- طين البشرة والشوفان:

الطين فعال جدا في علاج المسام المسدودة ، ويعتبر من افضل المكونات الطبيعية اللي بتساعد على ازالة خلايا الجلد الميتة والشوائب من البشرة ، بيساعد على تهدئة مسام الجلد وتصغيرها ، والشوفان بيحتوي على خصائص مضادة للاكسدة بتساعد على ازالة خلايا الجلد الميتة وتجديد شباب الجلد.

خدي 2 معلقة كبيرة من الطين ، ضيفي له 1 معلقة كبيرة من الشوفان المطحون ، اعجني الخليط بماية الورد ، وضيفي له كام نقطة من عصير الليمون ، وزعي الخليط على البشرة ، سيبيه ينشف ، بعدها رشي بشرتك بالماية لترطيب الماسك ، وافركيه من على البشرة واغسليه بماية فاترة.

7- بياض البيض:

بياض البيض مش بس بيساعد على تنضيف المسام ، ولكن كمان بيشد الجلد وبيمنع الشيخوخة ، والليمون في الماسك بيعمل كمادة قابضة ، بيمنع انسداد المسام وبيقلل من حجمها.

خدي بياض بيضة ، وضيفي لها كام نقطة من عصير الليمون ، امزجيهم كويس ، وزعي الخليط على البشرة وسيبيه لمدة 15 دقيقة ، وبعدها اغسليه بماية باردة.

8- الطماطم:

الطماطم من افضل المكونات الطبيعية للحفاظ على البشرة نضيفة ونقية ، الطماطم بتحتوي على جزيئات صغيرة بتساعد على الحفاظ على صحة الجلد وتنضيف المسام ، بالاضافة ان الطماطم بتحتوي على خصائص تبييض للبشرة وبتساعد على تحسين نسيج البشرة.

هاتي 1 حبة طماطم اضربيها في المطحنة ، وزعي معجون الطماطم على بشرتك ، وسيبيه لحد ما ينشف ، بعدها اغسلي بشرتك بماية فاترة وبعدين ماية باردة.

9- البابايا والقهوة:

البابين هو انزيم مقشر موجود في البابايا ، بيساعد على ازالة خلايا الجلد الميتة وتقشير الجلد ، بيساعد على ازالة الاوساخ والزيوت من الجلد ، وتنضيف المسام المسدودة ، القهوة كمان تعتبر مقشر طبيعي فعال بتساعد على الحفاظ على بشرتك صحية.

خدي ½ حبة بابايا قطعيها قطع صغيرة واهرسيها ، ضيفي لها 2 معلقة كبيرة قرع مهروس ، و 2 معلقة كبيرة قهوة مطحونة ، اخلطيهم مع بعض للحصول على عجينة ، وزعي الخليط على بشرتك وسيبيه لمدة 20 دقيقة ، وبعد ما ينشف اغسليه بماية باردة.

10- زيت الزيتون:

بيحتوي على تركيز عالي من مضادات الاكسدة وخصائص مضادة للالتهابات ، واضافة السكر البني ليه يعتبر طريقة فعالة لتقشير خلايا الجلد الميتة وتنضيف المسام المسدودة.

خدي 2 معلقة كبيرة من السكر ، امزجي معاها 1 معلقة كبيرة زيت زيتون ، لحد ما يبقى عندك عجينة خشنة ، وزعيها على بشرتك وافركيها بلطف في حركات دائرية لمدة 5 دقايق ، بعدها اغسليه بماية باردة.

11- الكركم:

الكركم بيساعد على تنضيف وتنقية البشرة ، بيحتوي على خصائص مضادة للميكروبات ومضادة للالتهابات بتساعد على تقليل المسام وتصغير حجمها ، بيساعد على الحفاظ على بشرة صافية وبيزيل الزيوت الزيادة من الجلد ، استخدام معجون الكركم كل يومين هيساعدك على التخلص من المسام المسدودة بسرعة.

خدي 1 معلقة كبيرة من الكركم المطحون ، ضيفي له شوية من اللبن او ماية الورد ، امزجيهم للحصول على عجينة ناعمة ، وزعي العجينة على بشرتك وسيبيها لمدة 10 دقايق ، وبعدها اغسليه بماية فاترة.