وصفة الكفتة بالبطاطس في الفرن

لو عايزة وصفة سهلة وسريعة وفي نفس الوقت متكاملة ، حضري معانا وصفة الكفتة بالبطاطس في الفرن ، الطبق متكامل فيه خضار ولحمة وهتحضريهم كلهم في صينية واحدة ، تابعي معانا واعرفي الطريقة بالخطوات.

وصفة الكفتة بالبطاطس في الفرن:

مكونات الكفتة:

- ½ كيلو لحمة مفرومة (بنسبة دهون 10 – 15%).

- 1 بصلة كبيرة مفرومة.

- 1 ½ - 2 كوباية بقدونس مفروم.

- 1 معلقة صغيرة من خليط البهارات المفضلة عندك.

- 1 معلقة صغيرة قرفة مطحونة (اختياري).

- ½ معلقة صغيرة فلفل اسود.

- 1 معلقة صغيرة ملح.

مكونات الصينية:

- 2 معلقة كبيرة زيت زيتون.

- 4 حبات بطاطس ، متقطعة شرايح.

- 2 حبة طماطم ، متقطعة شرايح.

- 1 بصلة ، متقطعة شرايح.

- 4 معالق كبيرة صلصة طماطم.

- 1 كوباية ماية.

الطريقة:

تحضير الكفتة:

1- في محضرة الطعام ضيفي البصل, البقدونس, الملح ، واضربيهم لحد ما يتفرموا كويس.

2- انقلي الخليط لطبق كبير وضيفي له اللحمة المفرومة والبهارات واخلطيهم مع بعض كويس بايدك لحد ما يمتزجوا.

3- خدي 1 – 2 معلقة كبيرة من خليط اللحمة وشكليها على شكل قرص زي البرجر ، واتأكدي انها مش سميكة اوي عشان تستوي كويس.

4- كرري مع باقي كمية الكفتة ، ورصيها في طبق وسيبيها على جنب.

تحضير البطاطس:

1- سخني الفرن على درجة حرارة 200 درجة مئوية ، وادهني الصينية بالزيت.

2- اغسلي البطاطس وقشريها وقطيعها شرايح بحجم ¼ بوصة.

3- رتبي شرايح البطاطس على صينية عليها ورق زبدة ورشيها 2 – 3 معالق زيت زيتون.

4- دخليها الفرن لمدة 20 دقيقة ، مع التقليب في نص المدة.

5- بعدها خرجيها من الفرن وسيبيها على جنب.

تحضير الصينية:

1- سخني الفرن على درجة حرارة 180 درجة مئوية ، وادهني الصينية بالزيت.

2- في الصينية ابدأي رصي بالطول شريحة كفتة, بعدها شريحة بصل, وشريحتين بطاطس, وبعدين شريحة طماطم ، وهكذا لحد ما الكمية كلها تخلص.

3- في كوباية او طبق دوبي صلصة الطماطم في كوباية الماية.

4- صبي صوص الطماطم على الصينية كلها ، واتأكدي من تغطية كل الخضار والكفتة بصوص الطماطم.

5- غطي الصينية بورق فويل ، ودخليه فرن سخن لمدة 40 – 60 دقيقة ، او لحد ما تستوي البطاطس والكفتة.

6- كده يبقى طبقنا جاهز قدمي جنبه الارز الابيض.