وصفة الفراخ بالثوم والليمون مع البطاطس والبصل على الطريقة اللبنانية
لو عايزة وصفة بسيطة وسهلة التحضير ، هتحبي الطبق اللبناني ده المكونات من الفراخ بالثوم والليمون مع البطاطس والبصل ، تابعي معانا السطور الجاية واتعرفي على الطريقة بالخطوات.
وصفة الفراخ بالثوم والليمون مع البطاطس والبصل:
المكونات:
- 1 كيلو دبابيس فراخ.
- ½ معلقة صغيرة ملح.
- 4 حبات بطاطس ، متقطعين شرايح رفيعة.
- 1 حبة بصل كبيرة ، متقطعة ودجيز.
- 1 معلقة صغيرة فلفل اسود.
- 1 حبة ليمون ، متقطعة شرايح للتقديم.
- 1 راس ثوم كاملة (قطعي الجزء اللي فوقق منها).
مكونات صوص الثوم والليمون:
- ¼ كوباية عصير ليمون.
- 1/3 كوباية زيت زيتون.
- 5 فصوص ثوم مفرومين.
- 1 معلقة صغيرة ملح.
- 1 معلقة صغيرة فلفل اسود.
طريقة التحضير:
1- سخني الفرن على درجة حرارة 180 درجة مئوية.
2- هاتي صينية مستطيلة بمقاس 8 في 11 وادهنيها بشوية زيت.
3- رصي شرايح البطاطس, البصل, وراس الثوم في قاع الصينية ، وتبيلهم بالملح.
4- رصي فوقيهم دبابيس الفراخ وخلي الجنب اللي فيه الجلد لفوق.
5- حضري صوص الثوم والليمون ، في طبق اخلطي عصير الليمون, الملح, زيت الزيتون, والثوم المفروم ، وقلبيهم كويس مع بعض.
6- صبي الصوص فوق الفراخ بالتساوي ، واتأكدي من تغطية الفراخ كلها بالصوص.
7- دخلي الصينية الفرن لمدة 50 دقيقة تقريبا ، او لحد ما الفراخ والبطاطس تستوي.
8- حطي الصينية تحت الشواية لمدة 5 – 8 دقايق اضافية لحد ما الفراخ تاخد لون دهبي.
9- خرجيها من الفرن وزينيها بالبقدونس المفروم وشرايح الليمون ، واضغطي على راس الثوم هيخرج معاكي من القشر بسهولة وزعيه على الصينية كلها.
10- قدميها مع الارز الابيض والسلطة المفضلة ليكي.
