صغري حجم المسام بقشر الموز

كلنا محتاجين مسام على بشرتنا ، المسامات حاجة طبيعية في اي بشرة لانتاج الزهم والحفاظ على ترطيب البشرة بشكل طبيعي ، المسامات دي تعتبر نظام تهوية طبيعية لبشرتنا ، ولكن احيانا بيحصل ان المسامات بتوسع زيادة عن الطبيعي وبتشوه شكل البشرة ، ولكن مع العلاجات المنزلية البسيطة تقدري انك تقللي حجم المسام ، والنهاردة هنشارك معاكم 5 علاجات منزلية تقدري تعمليهم بسهولة لتصغير المسام والحصول على بشرة ناعمة وخالية من العيوب.

علاجات منزلية لتصغير المسام:

- العلاج 1: دقيق الحمص وقشر الموز

1- في بوله خدي معلقة كبيرة من دقيق الحمص.

2- ضيفي لها معلقة كبيرة زبادي ، وشوية كركم وكام نقطة من زيت الزيتون.

3- امزجيهم مع بعض كويس ، كده الخليط جاهز للاستخدام.

4- وزعي الخليط على بشرتك ، وسيبيه ينشف لمدة 15 دقيقة.

5- بعدها اشطفي بشرتك بماية باردة.

6- دلوقتي بعد ما جففتي بشرتك ، خدي قشرة موزة واحدة وافركي بيها بشرتك.

7- افركي الجزء الداخلي من قشر الموزة بلطف على بشرتك ، واغسلي بشرتك بعد 10 دقايق.

8- كرري الطريقة دي كل يوم ويوم.

- العلاج 2: الطماطم

1- خدي حبة طماطم واحدة وطلعي اللب بتاعها.

2- ضيفي له ½ معلقة صغيرة عسل ، واخلطيهم مع بعض كويس.

3- دلكي بشرتك بالخليط لمدة 5 دقايق.

4- سيبيه لمدة 10 دقايق كمان ، وبعدها اغسليه.

- العلاج 3: طين البشرة

1- لو بشرتك دهنية اخلطي طين البشرة مع ماية الورد ، ولو بشرتك جافة اخلطي الطين مع اللبن.

2- وزعي طبقة رقيقة من الخليط على بشرتك ، وسيبيه لمدة 15 دقيقة.

3- بعدها اغسلي بشرتك بماية باردة.

- العلاج 4: خل التفاح

خل التفاح معروف انه بيساعد على تصغير المسام ، ويعتبر تونر طبيعي للبشرة وبيشدها.

1- في بوله صغيرة خففي معلقة كبيرة من خل التفاح بمعلقة كبيرة ماية.

2- باستخدام اطراف صوابعك دلكي المحلول ده على المسام الواسعة وسيبيه لحد ما ينشف بشكل طبيعي.

3- بعدها اغسلي بشرتك بالماية ، وتأكدي من ترطيبها بكريم مرطب او سيروم او الاتنين مع بعض ، لان خل التفاح ممكن يجفف البشرة شوية.

- العلاج 5: بياض البيض

1- في بولة اخفقي بياض بيضة مع معلقة كبيرة من دقيق الشوفان ونقطتين من عصير الليمون.

2- وزعي الخليط على بشرتك.

3- سيبيه لمدة 10 دقايق وبعدها اغسليه بماية باردة.