طريقة عمل سيروم طبيعي لتطويل وتكثيف الرموش

في كتير من انواع السيرم المتوفرة في السوق ، وهي مصممة لتقوية وتعزيز الرموش والحواجب كمان ، ومع ان في كتير من انواع السيروم ممكن تكون ليها نتايج فعالة الا انه ممكن يكون اسعارها غالية شوية ، ولكن الخبر الحلو انك تقدري بسهولة تعملي سيروم فعال بمكونات بسيطة لتطويل وتكثيف الرموش.

سيروم طبيعي لتطويل وتكثيف الرموش:

هتحتاجي:

- بودرة حمض الهيالورونيك (متوفرة في مواقع التسوق على الانترنت) ، والميزة انك تقدري تستخدميها كمان لعمل سيروم الهيالورونيك للبشرة في البيت.

- ماية مقطرة (من الصيدلية).

- جل صبار.

- جليسرين.

- زيت اللوز الحلو.

- فيتامين E.

طريقة التحضير:

1- حضري انبوبة زجاجية نضيفة لتخزين السيروم ، ممكن تستخدمي عبوة ماسكارا قديمة فاضية.

2- في بوله صغيرة اخلطي بودرة حمض الهيالورونيك مع الماية المقطرة وقلبيهم لحد ما البودرة تدوب.

3- ضيفي الصبار والجليسرين للخليط ، وقلبيهم كويس لحد ما المكونات تمتزج.

4- ضيفي زيت اللوز وزيت فيتامين E وقلبيهم.

5- كده السيروم جاهز ، باستخدام قمع صغير صبيه في العبوة.

6- قبل كل استخدام رجي السيروم.

7- استخدمي السيروم كل يوم بالليل باستخدام عصاية الماسكارا ، وتقدري تستخدميه للحواجب كمان.