فوايد البخار لعلاج حب الشباب: وازاي تعمليه خطوة بخطوة

ريهام محمود

في

واحدة من طرق ازالة حب الشباب عن طريق العلاج المنزلي هي تبخير الوجه ، تبخير البشرة يعتبر طريقة فعالة جدا للتخلص من حب الشباب ، تعالوا نتعرف في السطور الجاية على فوايد البخار لعلاج حب الشباب ، وازاي تعمليه.

فوايد البخار للبشرة:

1- ازالة الرؤوس السودا:

بخار البشرة بيساعد على تنعيم البشرة وتخفيف تراكم الزيوت في المسام.

2- ازالة السموم من البشرة:

تبخير الوجه بيساعد على ازالة السموم من البشرة ، لان العرق ممكن يسبب تراكم الشوائب على بشرتك مع مرور الوقت ، البخار بيساعد على ازالة كل الشوائب دي والسموم والحفاظ على صحة بشرتك.

3- تحسين الدورة الدموية:

حرارة البخار بتساعد على توسيع الاوعية الدموية في الجلد ، وبالتالي تحسين الدورة الدموية ، وده بدوره هيوفر الاكسجين والمواد المغذية للبشرة بشكل اكبر.

4- الاسترخاء:

بصرف النظر عن ازالة حب الشباب وازالة الرؤوس السودا ، عملية تبخير الوجه بتساعد على توفير الاسترخاء للبشرة ، البخار الدافي بيقلل من التوتر.

5- السيطرة على حب الشباب:

البخار بيساعد على فتح المسام ، وتنضيفها بعمق ، وازالة البكتيريا المسببة لحب الشباب ، بالاضافة لسهولة اختراق المنتجات للبشرة.

6- الترطيب:

البخار بيساعد على ترطيب البشرة ، وتجديد الرطوبة واستعادة صحة البشرة.

7- تعزيز الكولاجين في البشرة:

بعد التبخير ، البشرة بيوصلها كمية كبيرة من الدم والعناصر الغذائية والاكسجين ، وده بدوره بيساعد على تعزيز انتاج الكولاجين وبيزود من مرونة الجلد.

طريقة عمل البخار للبشرة:

- هاتي طبق كبير امليه بالماية السخنة.

- اربطي شعرك او ارفعيه.

- استخدمي غسول خفيف على بشرتك اتنضيفها.

- هاتي فوطة كبيرة وحطيها على راسك.

- خلي بشرتك فوق البخار.

- حافظي على المسافة بين بشرتك والبخار بحيث تكوني مرتاحة ، والبخار مايكونش قريب اوي وبشرتك تتعرض لاحمرار او حروق ، وغمضي عينيكي اثناء جلسة البخار عشان ماتتعرضش للتهيج.

- ممكن تضيفي بعض الزيوت والاعشاب الاساسية للماية لزيادة فايدته.

- وسيبي بشرتك معرضة للبخار لمدة 10 دقايق.