شامبو العسل الطبيعي لعلاج مشاكل الشعر

مافيش شك ان المنتجات الطبيعية افضل من كتير من المنتجات المتوفرة في السوق لانها غير سامة وخالية من المواد الكيميائية ، ولما الموضوع يتعلق بالشعر لازم تكوني حذره جدا قبل اختيار اي منتج ، ولكل انواع الشعر وفروة الراس ، النهاردة هنعرف مع بعض طريقة عمل شامبو العسل الطبيعي.

مميزات استخدام شامبو العسل:

- درجة حموضة العسل هي 4 ودرجة حموضة فروة الراس بين 4 – 7 ، وطبيعة العسل الحمضية بتوازن فروة الراس وبتمنع القشرة.

- العسل الخام مضاد للبكتيريا والفطريات بشكل طبيعي ، وبالتالي العسل هيساعدك على علاج المشكلات البكتيرية والفطرية في فروة الراس.

- العسل مش هيجرد الشعر وفروة الراس من الزيوت الطبيعية اللي بتحميه ، ونتيجة لده الشعر مع مرور الوقت هيبقى اقل دهنية لان فروة الراس هتتوقف عن التعويض الزائد عن طريق انتاج الزيت (وده اللي بيحصل لما الشامبو العادي بيجرد فروة الراس من كل الزيوت).

- العسل بيساعد على ترطيب الشعر ، وبما انه مش بيجرد الشعر من زيوته الطبيعية ، الشعر بيبقى اكتر نعومة واقل هيشان.

هتقدري تطولي الفترات ما بين غسلات الشعر ، لان انتاج زيت فروة الراس هيرجع لطبيعته ، هتحتاجي لغسل الشعر كل 4 ايام او حتى لحد اسبوع.

طريقة تحضير شامبو العسل:

هتحتاجي:

- 1 معلقة كبيرة عسل.

- 3 معالق كبيرة ماية.

- 2 – 3 نقط اي زيت عطري (اختياري).

تقدري تضاعفي الكمية حسب طول وكثافة شعرك.

الطريقة:

1- اخلطي العسل مع الماية وضيفي لهم الزيت العطري لو هتستخدميه ، وامزجي كل المكونات مع بعض كويس.

2- كده الشامبو يبقى جاهز للاستخدام ، على الشعر المبلول دلكي الشامبو على فروة الراس ، وبعدها اشطفيه بالماية بنفس طريقة استخدام الشامبو العادي.

ومافيش داعي تعملي كمية كبيرة وتخزنيها ، اعملي كل مرة على قد الغسلة ، لان تحضيره سهل ومش محتاج يتخزن.

بشكل عام شامبو العسل مناسب لكل انواع الشعر ، ولكن بعد تبديل الشامبو العادي بتاعك لشامبو العسل في البداية هتحسي ان شعرك دهني ، وممكن الموضوع ياخد شهر او شهرين لحد ما يرجع انتاج زيت فروة راسك لطبيعته ، عشان كده في الاسبوع الاول ممكن تحتاجي تغسلي شعرك بشامبو العسل كل يوم ، وبالتدريج هتلاقي نفسك محتاجة تغسليه كل يوم ويوم وبعدها كل يومين وهكذا لحد ما توصلي للمعدل الطبيعي ، ولو ما وصلتيش للنتايج المطلوبة حتى بعد شهرين من الاستخدام ، ده معناه ان شامبو العسل مش مناسب ليكي.

شامبو العسل والصبار:

هتحتاجي:

- ¼ كوباية من جل الصبار.

- 2 معلقة كبيرة عسل.

الطريقة:

1- اخلطي العسل مع جل الصبار واضربيهم مع بعض في الخلاط.

2- لاستخدام الشامبو بلي شعرك وحطي الشامو على الشعر وفروة الراس ودلكيه.

3- بعدها اشطفيه بماية باردة.

4- استخدمي الشامبو ده كبديل للشامبو العادي كل 3 – 4 ايام.

فوايد الشامبو:

الصبار مليان بالفوايد للشعر وفروة الراس ، ممكن يساعد في علاج الحكة, الالتهاب, القشرة ، بالاضافة انه هيرطب الشعر وهيديه لمعان وهيقويه ويعزز نموه لشعر اطول ، كمان بيحتوي على خصائص قوية مضادة للالتهابات, مضادة للاكسدة, ومضادة للميكروبات.