فوايد الشبة الجمالية للبشرة
الشبة او المعروفة بأسم "الصابون الكريستالي" ليها فوايد طبية كتير بالاضافة انها مفيدة للبشرة ، الشبة تم استخدامها من العصور القديمة لشفاء الجروح, وكمزيل طبيعي للعرق, لتنقية الماية ، والنهاردة من خلال موضوعنا هنتعرف اكتر على الشبة وفوايدها الجمالية للبشرة وازاي تستخدميها على البشرة.
فوايد الشبة للبشرة:
1- بتحتوي على خصائص مطهرة:
الشبة غنية بالخصائص المطهرة ، وده معناه انها بتتحكم في نمو البكتيريا على الجلد ، الشبة بتساعد على تنضيف البشرة وتقليل خطر الاصابة بالعدوى.
2- ليها خصائص قابضة:
الشبة غنية بالخصائص القابضة ، اللي بتساعد على تنضيف البشرة بشكل صحيح وتقليل حجم المسام ، الخصائص القابضة بتساعد كمان على تقليل الدهون في الجلد.
3- بتساعد على موازنة الرقم الهيدروجيني للبشرة:
واحدة من افضل استخدامات الشبة ، انه بيساعد على الحفاظ على مستوى الرقم الهيدروجيني للبشرة.
4- توحيد لون البشرة وشدها:
لان الشبة زي ما قولنا بتحتوي على خصائص قابضة ، ده بيساعد على توحيد لون البشرة وتضييق المسام ، والفايدة دي بتدي البشرة مظهر اكتر نعومة ونقاء.
5- علاج الرؤوس السودا:
الشبة بتساعد كمان على علاج الرؤوس السودا على الانف.
6- غسول بعد الحلاقة:
ممكن تستخدمي الشبة كغسول بعد الحلاقة ، بيساعد على التئام الجروح وبيدي توهج للبشرة.
7- ازالة حب الشباب:
السبب الرئيسي لحب الشباب هو البشرة الدهنية ، الشبة بتساعد على التحكم في الغدة الدهنية المسؤولة عن افراز الدهون ، وده بدوره بيقلل من افراز الزهم وبيمنع انسداد المسام.
طرق دمج الشبة في روتين العناية بالبشرة:
- مزيل عرق:
لاستخدام الشبة كمزيل عرق افركي قطعة شبة رطبة على الابطين ، او اطحنيها وحطي البودر بتاعها على منطقة الابطين كمزيل عرق طبيعي.
- لحب الشباب والبثور:
خدي شوية من الشبة المطحونة وضيفي لها كام نقطة ماية لحد ما تتكون عندك عجينة ناعمة ، حطي العجينة على حب الشباب ، سيبيها لمدة 10 دقايق ، وبعدها اغسليها بالماية.
- ماسك لشد الجلد وتقليل حجم المسام:
خدي 2 معلقة كبيرة من الشبة المطحونة ، ضيفي لها شوية من طين البشرة ، واخلطيهم مع بعض بالماية لتكوين عجينة ، حطي العجينة دي على بشرتك ، سيبيها لمدة 10 – 15 دقيقة ، وبعدها اغسليها بماية فاترة.
- مقشر للبشرة:
خدي 2 معلقة كبيرة من الشبة المطحونة ، ضيفي لها شوية من دقيق الشوفان او السكر ، و 1 معلقة كبيرة عسل ، اخلطي المكونات كويس ، وزعي الخليط على بشرتك وافركيه بلطف بحركات دائرية ، وبعدها اشطفيه بالماية.
- تقليل التجاعيد والخطوط الرفيعة وتوحيد لون البشرة:
هاتي حجر الشبة بليه بالماية ، ومشيه على المناطق اللي فيها تجاعيد وخطوط رفيعة ، سيبي البلورات بتاعته على بشرتك لمدة 5 – 10 دقايق ، ولما تحسي ان جلدك مشدود اشطفيه واستخدمي مرطب.
تأثير الشبة على انواع البشرة المختلفة:
- البشرة الدهنية: بتساعد على التحكم في الزيوت الزيادة وتقليل ظهور حب الشباب.
- البشرة الجافة: لو بشرتك جافة الافضل تجنب استخدام الشبة ، لانها ممكن تجرد بشرتك من الزيوت الطبيعية وتسبب ظهور الحبوب.
- البشرة المختلطة: اللي بتكون خليط من البشرة الجافة والدهنية ، اتجنبي وضع الشبة على المناطق الجافة لانها ممكن تزود من جفاف الجلد وتسبب له تهيج.
- البشرة الحساسة: لو بشرتك حساسة اوي الافضل تتجنبي استخدام الشبة لانها ممكن تسبب حساسية وتهيج الجلد ، قبل استخدامها اعملي اختبار على جزء صغير من البشرة لو ماحصلش اي تهيج او احمرار منها تقدري تستخدميها.
مافيش عدد مرات معينة لاستخدام الشبة ، ده بيعتمد على نوع الجلد وحساسية الجلد ، عشان كده بننصحك تستخدميها باعتدال زي اي مكون طبيعي الافراط في استخدامه ممكن يسبب ضرر للبشرة اكتر ما ينفعها.