طريقة عمل وصفة ميلون بان Melon pan اليابانية
الMelon pan هي من الحلويات اليابانية الكلاسيكية البسيطة ، وهي مزيج ما بين البسكويت الرقيق المقرمش والخبز ، تابعي معانا السطور الجايه واتعرفي على طريقتها بالخطوات والفيديو.
وصفة Melon Pan اليابانية:
مكونات عجينة البسكويت:
- 30 جرام زبدة غير مملحة.
- 55 جرام سكر.
- بيضة مخفوقة.
- 95 جرام دقيق متعدد الاغراض.
- ½ معلقة صغيرة فانيليا.
مكونات عجينة الخبز:
- 160 جرام دقيق خبز.
- 40 جرام دقيق متعدد الاغراض.
- 4 جرام خميرة فورية.
- 30 جرام سكر.
- بيضة مخفوقة.
- 105 – 115 مل لبن.
- 2 جرام ملح.
- 30 جرام زبدة غير مملحة.
- سكر للتزيين.
طريقة التحضير:
تحضير عجينة البسكويت:
1- في طبق كبير ضيفي الزبدة والسكر بدرجة حرارة الغرفة واضربيهم مع بعض لحد ما الخليط يبقى كريمي ، ضيفي البيضة المخفوقة والفانيليا واخلطي المكونات لحد ما تمتزج.
2- انخلي الدقيق على على خليط الزبدة والسكر وقلبيهم مع بعض بخفه باستخدام معلقة لحد ما الدقيق يمتزج كويس بالتساوي ، وماتبالغيش في العجن.
تحضير عجينة الخبز:
3- في طبق كبير ضيفي نص كمية دقيق الخبز, كل كمية الدقيق متعدد الاغراض, الخميرة الفورية, السكر, البيضة المخفوقة, اللبن ، امزجي العجينة كويس باستخدام معلقة ناعمة ، بس نصيحة لما تنزلي البيضة نزليها في الجنب التاني من الطبق بعيد عن الخميرة لان صب البيضة فوق الخميرة هيمنعها من الدوبان ، عشان كده اتأكدي اضافة البيضة بعيد عن الخميرة.
4- بمجرد ما المزيج يبقى ناعم, ضيفي باقي كمية دقيق الخبز, الملح, الزبدة ، واستمري في خلط العجينة ، بعدها انقلي العجينة على سطح نضيف واعجنيها بايدك ، في البداية هتبقى لزجه شوية ولكن بمجرد امتصاص الزبدة بالكامل في العجينة هتبقى ناعمة ، هتاخد حوالي 10 دقايق عجن.
5- لما العجينة تبقى ناعمة ، امسكيها وشديها عشان تعرفي ان الجلوتين اتعجن كويس ، لما تشديها وماتتقطعش معاكي كده يبقى العجينة تمام.
ملحوظة: لو هتستخدمي مضرب كهربائي لخفق المكونات ، يبقى ضيفي الدقيق والخميرة والسكر والملح والبيض ، وشغلي المضرب على سرعة منخفضة ونزلي اللبن ببطء ، بعد حوالي دقيقة ونص من العجن ، ضيفي الزبدة واعجني حوالي 2 – 3 دقايق.
استراحة عجينة الخبز:
6- شكلي العجينة على شكل كورة وحطيها في طبق كبير ، وغطيها بغطا بلاستيك وحطي العجينة في مكان دافي تخمر لمدة 25 – 35 دقيقة او لحد ما حجم العجينة يتضاعف.
تقطيع وتشكيل العجينة:
7- بعد ما العجينة ترتاح ، رشي صوباعك السبابة الدقيق واغرسيه في العجينة ، لو الخرم مارجعش تاني ، كده العجينة تبقى جاهزة للتشكيل.
8- اخرمي العجينة عشان تطلعي منها الهوا المتراكم اثناء استراحة العجينة.
9- خرجي العجينة من الطبق وحطيها على سطح نضيف ، وقطيعها ل 6 قطع متساوية (بحيث كل قطعة يكون وزنها 65 – 66 جرام).
10- اعجني كل قطعة كويس وشكليها على شكل كورة ناعمة بشكل متساوي.
11- غطي العجينة بعد التشكيل بغطا بلاستيك وسيبيها ترتاح لمدة 15 دقيقة كمان في درجة حرارة الغرفة.
عجن وتشكيل عجينة البسكويت:
12- افردي عجينة البسكويت وقطيعها ل 6 قطع.
13- اعجنيها كويس لحد ما تبقى ناعمة ومطاطية شوية ، شكلي كل قطعة على شكل دايرة ، بحيث عرض كل قطعة يكون حوالي 10 سم.
14- سيبيها ترتاح لمدة 15 دقيقة ، وبعدين ارجعي افردي العجينة مرة تانية وشكليها دواير.
15- حطي كل قطعة من عجينة البسكويت على عجينة الخبز اللي حضرناها.
16- رشي على الوش سكر بالتساوي ، او حطي شوية سكر في طبق صغيرة واغمسي سطح الكور فيها.
17- وباستخدام مكشطة العجين شكلي السطح بتاعها على شكل خطوط عكس بعض.
18- رصي الكور على صينية خبز عليها ورق زبدة وغطيها بغطا بلاستيك ، وحطيها في مكان دافي ترتاحي لمدة 20 – 25 دقيقة.
19- اثناء الوقت ده سخني الفرن على درجة حرارة 180 درجة مئوية.
الخبز:
20- دخلي الصينية الفرن على درجة حرارة 180 درجة مئوية لمدة 10 دقايق ، وبعدها خفضي الحرارة ل 160 درجة مئوية واخبزيها لمدة 5 دقايق كمان لحد ما تستوي.
ملحوظة: هتعرفي انها استوت لما الجزء اللي تحت من الخبز يتحول للون البني الفاتح ، لو لقتيه لسه ابيض اخبزيه لمدة 1 – 2 دقيقة كمان.
21- وكده يبقى الMelon pan جاهزة ، ولو عايزة تخزني اي بواقي منها حطيها في كيس وخزنيها في الفريزر هتقعد لحد 2 – 3 اسابيع ، ووقت الاكل طلعيها في وسخنيها في الميكروويف لمدة 30 – 50 ثانية او في الفرن لمدة دقيقة او دقيقتين لحد ما تبقى مقرمشة.