15 حيلة للبنات الكسولة لخسارة الوزن من غير تمارين
كتير من البنات بيكونوا كسولين وده اللي بيقف قصاد خسارتهم لوزنهم ، ولكن اسلوب الحياة الصحي مش لازم يبقى معقد ، المهم اكتر هو انك تعملي تعديلات بسيطة على نظامك الغذائي لو عايزة تخسري وزنك بسرعة وتحافظي عليه ، وحيل انقاص الوزن اللي هنعرفها مع بعض النهاردة مش محتاجة مجهود كبير ، او انك تعملي تمارين مكثفة بشكل يومي ، كل المطلوب بس شوية تنظيم وتخطيط.
حيل لانقاص الوزن:
1- شرب كوباية ماية قبل الوجبات:
الحفاظ على رطوبة الجسم هو مفتاح الشعور بالشبع ، هل لاحظتي في بعض الاوقات انك بتحسي انك جعانة ولكن مجرد مجرد ما تشربي كوباية كبيرة من الماية الباردة احساس الجوع بيقل؟
الماية بتحسسك بالشبع من غير ما تكسبي سعرات حرارية زيادة ، احرصي على شرب الماية طول اليوم ، وانتظمي على شرب كوباية ماية قبل كل وجبة ، دي طريقة مثالية جدا لتقليل كمية الاكل اللي ممكن ناكلها في الوجبة.
2- كلي بروتين اكتر:
البروتين اولا ، دي من اكتر الحيل اللي ممكن تخدعي بيها نفسك للشعور بالشبع مع تناول سعرات حرارية اقل ، لما تخططي لوجبتك الجايه ، اتأكدي ان فيها بروتين كتير ، الفراخ, الاسماك, الفاصوليا, البيض, اللبن, الزبادي اليوناني كلها تعتبر مصادر مثالية للبروتين اللي ممكن تساعدك على الوصول لهدفك في انقاص الوزن.
3- احتفظي بوجبات صحية في الفريزر:
في البداية بيكون سهل انك تلتزمي بالعادات الجديدة في نظامك الغذائي لانك بتكوني لسه متحمسة ولسه مش حاسه بالرغبة الشديدة في انك تاكلي اكلات غير صحية ، ولكن مع الوقت الحماس ده بيقل وعاجلا او اجلا هتحسي باغراء ناحية اكلات معينة وغالبا هتستسلمي لاغراءات الوجبات السريعة.
ولتجنب اغراء الوجبات السريعة والاكلات غير الصحية ، في الايام اللي انتي بتحسي انك مكسلة تعملي اكل فيها ، اتأكدي ان دايما في عندك في الفريزر وجبات صحية واللي تقدري في اي وقت تطلعيها وتسخنيها وتاكليها على طول.
اثناء الطبخ تقدري تزودي في الكميات ، وتقسميها على اكياس وتحفظيها في الفريزر ، وكده هيبقى عندك وجبات عشا صحية جاهزة على التسخين على طول في دقايق.
4- استخدمي اطباق حجمها اصغر:
التحكم في الكمية مهم جدا لو بتحاولي تقللي وزنك ، ولو انتي كسولة ومش بتقدري تلتزمي بحساب السعرات الحرارية ، فالنصيحة دي ليكي.
استخدام طبق اصغر هتحسسك انك كمية الاكل كبيرة ، ده هيخدع عقلك وهيساعدك على تقليل كمية الاكل ، والحقيقة اننا لما بنسخدم اطباق كبيرة بنملاها اوي اكتر من احتياج جسمنا وبالتالي جسمنا بيدخله سعرات حرارية زيادة ، واستخدام الاطباق الصغيرة طريقة سهلة لتقليل كمية الاكل وفقدان الوزن.
5- احتفظي دايما بالاطعمة الحلوة الصحية في البيت:
لو انتي من محبين الحلويات ، ودايما بيبقى عندك رغبة تاكلي اي حاجة حلوة ، خزني الاطعمة الحلوة الصحية كبديل.
خلي دايما في تلاجتك عنب, توت, اي انواع فواكه طازة تفضليها زي التفاح, البرتقان, الموز ، ده هيساعدك كتير وقت ما تحسي انك عايزة تاكلي سكريات ، تتجهي على طول للفاكهة ، وممكن تخلطي الفواكه المجففة او التوت المجمد للزبادي اليوناني كوجبة خفيفة حلوة وصحية.
6- شرب القهوة والشاي الاخضر:
القهوة تعتبر مثبط رائع للشهية وبتديكي دفعة من الطاقة من غير اي سعرات حرارية زيادة ، ولو القهوة مش مناسبة ليكي جربي الشاي الاخضر ، الاتنين يعتبروا من افضل الحاجات اللي ممكن تعتمدي عليهم لو جسمك محتاج شوية نشاط من غير ما تضيفي سعرات حرارية.
7- احتفظي بالوجبات الخفيفة منخفضة السعرات الحرارية في متناول ايدك:
خدعة تانية هتساعدك على فقدان الوزن ، وهي تخزين وجبات خفيفة صحية منخفضة السعرات الحرارية ، اكل وجبات خفيفة صحية ومنخفضة السعرات الحرارية هيساعدك على تجنب الاغراءات.
من الوجبات الخفيفة الصحية: اصابع الجزر, الفشار, الزبادي, المكسرات (كمية صغيرة), الفواكه, لوح البروتين, الجبنة القريش, التوت, او حتى بيضة مسلوقة.
8- نامي عدد ساعات كافية:
عدم النوم بشكل كافي ممكن يسببلك زيادة في الوزن ، لما بنكون تعبانين ومرهقين بتزيد رغبتنا في الاكل اكتر وهتنجذبي بشكل اكبر للاطعمة المصنعة والدهنية والسكرية.
النوم بشكل كافي هيساعدك على تقليل الشعور بالجوع.
9- تجهيز الوجبات:
خصصي وقت كل اسبوع لتجهيز وجبات على قد ما تقدري ، لو انتي بتحتفظي بوجبات الاسبوع في الاسبوع ، ده هيخليكي ماشية على النظام الغذائي الصحي وهيساعدك تفضلي ملتزمة بخطتك.
تجهيز كل حاجة بشكل مسبق هي افضل طريقة للالتزام بالنظام الغذائي ، لانه مش هيخليكي تقعدي تجهزي اكل بشكل يومي.
10- كلي الياف كتير:
الالياف هي خدعة مذهلة تخليكي تحسي بالشبع لفترة اطول من غير استهلاك سعرات حرارية زيادة ، الاطعمة الغنية بالالياف مفيدة جدا وضروري انك تدخليها في نظامك الغذائي بقدر الامكان.
من الاطعمة الاساسية الغنية بالالياف هي: الخضروات, الشوفان, العدس, الفاصوليا, الحمص, الكينوا, الفواكه, المكرونة المصنوعة من الحبوب الكاملة.
11- تخطي وجبة الفطار (الصيام المتقطع):
الصيام المتقطع يعتبر وسيلة فعالة لانقاص الوزن والحفاظ على وزن صحي ، حاولي تتخطي وجبة الفطار والحصول على وجبة في الجزء التاني من اليوم ، ولكن انتي تقدري تظبطي وقت اكلك على حسب المناسب لاسلوب حياتك.
12- المشي لمدة 30 دقيقة كل يوم:
التمارين الرياضية اكيد مفيدة ، ولكن لو انتي مش بتقدري تنتظمي على التمارين او مرهقة بالنسبة لك ، حاولي انك تمارسي المشي بس كل يوم.
المشي اليومي البسيط لمدة 30 دقيقة هيساعدك على انقاص الوزن.
13- تخطي السعرات الحرارية الفارغة:
كتير مننا بيستهلك بانتظام المشروبات اللي بتحتوي على كمية كبيرة من السعرات الحرارية ولكن مش بتحتوي على اي قيمة غذائية ، ابعدي عن الحاجات دي لو هدفك انقاص وزنك.
المشروبات الغازية السكرية, الكوكتيلات, مشروبات الطاقة ، لو الحاجات دي جزء من نظامك الغذائي ، فانتي بتشربي سعرات حرارية بشكل اساسي من غير الحصول على القيمة الغذائية منها.
اتجنبي كل الحاجات اللي بتضيف سعرات حرارية كتير ومش بتوفر اي تغذية لجسمك.
14- احصلي على ملابس رياضية لطيفة:
اكيد في البداية وعدناكي بحيل كسولة لفقدان الوزن من غير ممارسة تمارين قوية ، ولكن لو انتي حابه تضيفي بعض النشاط البدني اختاري ملابس رياضية لطيفة تشجعك على ممارسة الرياضة.
ممكن حتى تلبسي ملابس التمارين الرياضية لتنضيف البيت كشكل من اشكال التمارين الرياضية ، لبس الملابس الرياضية هيشجعك في التحرك اكتر ، وده اكيد مفيد لفقدان الوزن ، وده بدوره هيشجعك في اكل طعام صحي وده هيخلق لك اسلوب حياة صحي.
15- حضري قايمة تسوق وانتي رايحة السوبر ماركت:
ماتروحيش ابدا تشتري مستلزمات البيت من غير قايمة التسوق ، فكري في اللي هتطبخيه الاسبوع الجاي ، وايه الوجبات الصحية الخفيفة اللي محتاجاها ، وايه اللي ناقصك؟
حضري قايمة تساعدك على الالتزام بالمسار الصحيح لنظامك الغذائي ، والتزمي بيها.
