ازاي تعتني بشعرك في ايام الرطوبة؟
الجو والشعر مش دايما بيتفقوا مع بعض ، مع دخول الصيف والرطوبة واجواء البحر الشعر بيتأثر وبيتعرض للهيشان ، والنهاردة من خلال موضوعنا هنشارك معاكم نصايح وعلاجات منزلية للعناية بالشعر في الجو الرطب.
علاجات منزلية للعناية بالشعر في الجو الرطب:
السبب الرئيسي ورا ملمس الشعر اثناء الجو الرطب هو العرق, الرطوبة, الاوساخ الموجودة في الهوا ، ولو ماهتمتيش بشعرك خلال الموسم ده ، ده هيأدي لتلف بصيلات الشعر.
ايه اللي بيسبب هيشان الشعر؟
الهيشان بيحصل بسبب الرطوبة العالية في الهوا ، لما جزئيات الماية الموجودة في الهوا بتدخل للشعر ده بيتسبب في هيشانه ، وكل نوع شعر بيتفاعل بشكل مختلف مع رطوبة الهوا ، بعض انواع الشعر بتكون معرضة اكتر للهيشان اكتر من غيرها ، خلينا نشوف العوامل المسؤولة عن هيشان الشعر.
- الجفاف:
لو بالفعل شعرك جاف ، الرطوبة هتخلي خصلات شعرك اكتر جفاف ، والشعر هيبقى جاف وهايش وخشن.
الافراط في غسيل الشعر:
كثرة غسل الشعر بتجرد الشعر من الزيوت الطبيعية ، وده بيأدي لجفافه وهيشانه.
- البيئة الخارجية:
لو شعرك بيتعرض باستمرار للهوا والشمس والتلوث ، فاكيد هيكون جاف وهايش لان العوامل الخارجية دي بتجفف خصلات الشعر وبتضره.
طرق للعناية بالشعر في الجو الرطب:
- غيري الشامبو الخاص بيكي حسب الجو:
ضروري تغيير الشامبو بتاعك حسب الجو ، لان اثناء الجو الرطب بيتغير هيكل شعرك وشكله ، وبالتالي هيكون ضروري استخدام شامبو مرطب اكتر للحفاظ على شعرك من الهيشان.
- استخدمي بلسم جديد:
ماتتخطيش استخدام البلسم ابدا ، لانه بينعم خصلات الشعر ، ولو البلسم بتاعك مش فعال كفاية ، يبقى جيه الوقت انك تغيريه ، ولما تيجي تختاري بلسم جديد دوري على المكونات دي السيليكون الاميني, المواد الخافضة للتوتر السطحي الكاتيوني ، لان المكونين بيحاربوا هيشان الشعر وبيصلحوا الضرر.
- استخدمي Leave-in conditioner:
استخدام المرطب اللي بيتساب على الشعر من غير غسيل بيمنع فقدان الرطوبة من شعرك وبيحافظ على نعومته ومرونته ، اختاري المرط المناسب لنوع شعرك ، بعد تجفيف شعرك بالفوطة ، حطي عليه البلسم.
- اتجنبي استخدام الحرارة على شعرك:
استخدام الحرارة في الجو الرطب هيخلي شعرك جاف وهايش اكتر ، لكن مع ذلك لو عايزة تستخدمي الحرارة ومضطرة ، الافضل استخدام واقي من الحرارة ، هيمنع خصلات الشعر من فقدان الرطوبة.
- استخدمي Leave- in oils:
بالظبط زي البلسم اللي بيتساب على الشعر ، ممكن تستخدمي الزيوت اللي بتتساب على الشعر ، زي زيت الارجان, او الزيت المغربي بتساعد على السيطرة على هيشان الشعر وبتحافظ على نعومته ومرونته.
كل اللي هتعمليه خدي كمية صغيرة جدا من الزيت ، وافركيها على راحة ايدك ، ووزعيها على الشعر.
- جففي شعرك بلطف:
سبب تاني لهيشان الشعر هو الطريقة اللي بتجففي بيها شعرك ، فرك الشعر بقوة لتجفيفه ، بيسبب تقصف الشعر وهيشانه ، عشان كده الافضل انك تسيبي شعرك ينشف بشكل طبيعي قدر الامكان لتقليل الهيشان.
ولو ضروري عايزة تستخدمي السيشوار لتجفيف الشعر حطي في اعتبارك الحاجات دي:
- خدي اجزاء صغيرة من الشعر وجففي خصلة خصلة.
- استخدمي دايما ال Diffuser لتجفيفه.
- جففي شعرك بالمجفف واتجاهه لتحت للسيطرة على الهيشان.
- ماتسرحيش شعرك اكتر من اللازم:
التمشيط مفيد لفك تشابك الشعر ، لكن الافراط في التمشيط بيأدي لاستنزاف الزيوت الطبيعية من الشعر ، التمشيط بيسبب الاحتكاك وده بيسبب تقصف الشعر وهيشانه ، حاولي استخدام مشط اسنانه واسعة او مشط خشبي.
- قصي شعرك:
يمكن مش كتير منكم بيحب يقص شعره ، لكن قص الشعر في كتير من الاوقات بيكون علاج وبيجافظ على الشعر صحي ، لان القص بيساعد على ازالة جميع الاطراف المقصفة وبيدي شعرك مظهر جديد.
ماسكات للشعر لترطيبه وتقليل التقصف والهيشان:
- ماسك الالوفيرا:
جل الصبار هيرطب شعرك ويعمل طبقة واقية عليه لحمايته ومنع فقدان الرطوبة.
خدي 2 معلقة كبيرة من جل الصبار ، ضيفي له كام نقطة من زيت الارجان ، امزجيهم مع بعض كويس , ووزعي الماسك على الشعر ، وسيبيه حوالي 30 دقيقة ، وبعدها اغسليه بالشامبو والبلسم.
- ماسك الموز:
الموز مفيد جدا للشعر ، غني بالزيوت الطبيعية اللي بتساعد على ترطيب الشعر ، الفيتامينات والمعادن الموجودة في الموز بتساعد على تقوية الشعر وتحسين مرونة الشعر وتقليل القشرة.
خدي موزة واهرسيها ناعم ، ضيفي لها 2 معلقة كبيرة عسل ، امزجيهم مع بعض للحصول على عجينة ناعمة ، وزعي العجينة على شعرك وسيبيها لمدة 30 دقيقة ، وبعدها اغسليه بالماية الباردة.
