وصفات لتفتيح تحت الابطين من اول استخدام
النهاردة من خلال موضوعنا هنشارك معاكم مجموعة وصفات فعالة لتفتيح الابطين من اول استخدام ، وكلها وصفات طبيعية بمكونات من مطبخك.
وصفات لتفتيح الابطين:
1- ماسك دقيق الحمص:
هتحتاجي:
- 2 معلقة كبيرة من دقيق الحمص.
- 1 معلقة كبيرة زبادي.
- 1 معلقة صغيرة عصير ليمون.
- ذرة كركم.
طريقة التحضير والاستخدام:
اخلطي المكونات كلها مع بعض ، امزجيها كويس للحصول على عجينة ناعمة ، وزعيها على منطقة تحت الابطين ، وسيبيها 30 دقيقة ، وبعدها اغسليها بالماية.
الماسك ده بيساعد على تنضيف وترطيب وتبييض منطقة الابطين من اول استخدام ، استخدمي الماسك يوميا لمدة اسبوعين وبعدين مرتين بس في الاسبوع للحصول على نتايج اسرع.
2- ماسك العرق سوس:
هتحتاجي:
- مستخلص العرق سوس.
- مستخلص التوت.
طريقة التحضير والاستخدام:
- امزجي المكونات مع بعض ، وادهني بيها منطقة الابطين ، سيبيها لمدة 30 دقيقة تقريبا ، وبعدها اغسلي بشرتك بالماية.
استخدمي الماسك يوميا اول اسبوعين ، وبعدها مرة او مرتين بس في الاسبوع للتخلص من غمقان تحت الابطين.
- لو انتي مش عايزة تعملي ماسكات او بتكسلي ، ممكن تاخدي مكملات عشبية ، زي كبسولات القرفة او الحلبة تعتبر علاجات فعالة لو اخدتيها يوميا لعلاج منطقة غمقان الابطين.
3- تبييض الابطين بالليمون:
الليمون بيحتوي على خصائص مضادة للبكتيريا ومطهرة ، وخصائصه الحمضية بتساعد بشكل كبير في تفتيح البشرة بالاضافة لتقشير خلايا الجلد الميتة.
- خدي شريحة سميكة من الليمون وافركي بيها منطقة تحت الابطين يوميا قبل الشاور ، وبعد الشاور حطي مرطب على المكان لان الليمون بيجفف البشرة شوية.
- وممكن عشان تتجنبي جفاف البشرة ممكن تضيفي لليمون كركم او عسل او زبادي ، ووزعي الخليط على منطقة الابطين وسيبيه لمدة 10 دقايق تقريبا ، وبعدها اغسليه بالماية.
4- البطاطس:
البطاطس كمان بتحتوي على عوامل تبييض طبيعية وخصوصا للي بشرتهم حساسة ومش بيستحملوا الليمون البطاطس هتكون انسب بديل ليهم ، لان البشرة احماضها خفيفة ومش بتهيج البشرة.
- خدي شريحة رقيقة من البطاطس وافركي بيها منطقة الابطين لمدة 5 – 10 دقايق وبعدها اغسلي المنطقة بماية فاترة.
- او ممكن تبشري البطاطس وتعصريها ، وادهني منطقة الابطين بعصير البطاطس باستخدام قطعة قطن ، سيبيه لمدة 10 دقايق تقريبا ، وبعدها اغسليه بالماية.
استخدمي البطاطس مرتين على الاقل يوميا لنتايج اسرع ، هتشوفي نتايج خلال 7 ايام.
5- الخيار:
الخيار كمان بيحتوي على خصائص تفتيح للبشرة ، وتقدري تجمعي ما بين الليمون وعصير الخيار ، الليمون هيساعد على التفتيح والخيار هيهدي البشرة وهيمنع اي تهيج او حكة.
- اخلطي كميات متساوية من عصير الليمون وعصير الخيار وضيفي لهم رشة كركم ، ووزعي الخليط على منطقة تحت الابطين.
- او ممكن تفركي منطقة تحت الابطين بشريحة خيار.
- او حطي عصير الخيار لوحده على منطقة تحت الابطين ، ده هيساعدك على تفتيح المنطقة خلال ايام قليلة.
6- ماسك الزعفران:
خدي كام خيط من الزعفران وضيفي له لبن ، ادهني منطقة الابطين بالخليط وسيبيه لمدة 15 – 20 دقيقة وبعدها اغسليه بالماية.
7- ماسك اللبن:
هتحتاجي:
- 2 معلقة كبيرة لبن.
- 1 معلقة كبيرة لبن رايب.
- 1 معلقة كبيرة دقيق.
طريقة التحضير والاستخدام:
اخلطي المكونات للحصول على عجينة ، وزعيها على منطقة تحت الابطين ، سيبيها لمدة 15 دقيقة ، وبعدها اغسلي المنطقة بالماية.
- مقشرات لتفتيح منطقة الابطين:
مشكلة غمقان منطقة تحت الابطين ممكن يبقى بسبب تراكم خلايا الجلد الميتة وفي الحالة دي انتي محتاجة لمقشر ، هنقولك بعض وصفات المقشرات الطبيعية اللي ممكن تستخدميها.
- مقشر السكر ، اخلطي عصير الليمون مع السكر ، ووزعيه على المنطقة وسيبيه لمدة 5 – 10 دقايق وبعدين بصوابع مبللة افركي المنطقة بلطف بحيث تحسي بحبيبات السكر وبعدها اغسليه بالماية ، ده هيقشر بشرتك بشكل ممتاز وهيفتحها.
- مقشر الفول السوداني ، هاتي فول سوداني اطحنيه وخدي منه معلقة وضيفي له معلقة كبيرة عصير ليمون, معلقة صغيرة عسل ، امزجيهم لعمل عجينة ، وزعي الخليط على منطقة الابطين وسيبيه لمدة 10 دقايق وبعدين اغسليه بالماية.
- مقشر صودا الخبز ، امزجي كمية من صودا الخبز والماية لعمل عجينة سميكة ، وزعي الخليط على منطقة الابطين وافركي المنطقة بلطف وبعدها اغسليها بالماية ، او ممكن تعملي محلول من صودا الخبز والماية وتدهني بيها منطقة الابطين بقطعة قطن.
- مقشر قشر البرتقان ، جففي قشر البرتقان واطحنيه ناعم ، خدي معلقة كبيرة من قشر البرتقان المطحون وضيفي لهم ماية ورد ولبن واخلطيهم للحصول على عجينة سميكة ، وزعي العجينة على منطقة الابطين وافركي المنطقة بلطف لمدة 10 دقايق ، وبعدها اغسليها بماية باردة.
- تفتيح الابطين بالزيوت:
1- زيت الزيتون:
زيت الزيتون بيحتوي على مضادات اكسدة ومكونات تانية مفيدة لبشرتك.
هتحتاجي:
- 3 معالق كبيرة من زيت الزيتون.
- 1 كوباية سكر.
طريقة التحضير والاستخدام:
امزجي السكر مع زيت الزيتون ، بلي منطقة تحت الابطين الماية ، وزعي الخليط على المنطقة ، سيبيه لمدة 5 دقايق تقريبا ، وبعدها اغسليه بالماية.
استخدمي الماسك ده مرتين على الاقل في الاسبوع.
2- زيت جوز الهند:
زيت جوز الهند بيحتوي على فيتامين E اللي بيساعد على تفتيح البشرة ، ادهني منطقة تحت الابطين بزيت جوز الهند قبل الاستحمام وبعدها اغسليه بصابون خفيف وماية فاترة ، زيت جوز الهند يعتبر كمان مزيل عرق طبيعي.
3- زيت فيتامينE:
هاتي كبسولة فيتامين E افتحيها وادهني منطقة تحت الابطين بالزيت يوميا وسيبيه شوية وبعدها اغسليه.
4- خليط الزيوت:
هتحتاجي:
- 3 نقط زيت زيتون.
- 3 نقط زيت جوجوبا.
- 3 نقط من زيت جنين القمح.
- 3 نقط من اي زيت حمضي من اختيارك ممكن تستخدمي زيت الليمون.
- شوية ماية.
طريقة التحضير والاستخدام:
اخلطي كل الزيوت والماية مع بعض ، ادهني منطقة الابطين بالخليط وسيبيه شوية وبعدها اغسليه بالماية ، وممكن تعملي كمية اكبر من الخليط وتخزنيها في ازازة وكل يوم تاخدي منه على قد استخدام مرة واحدة وتضيفي له الماية.
- نصايح مهمة لمنع والحفاظ على منطقة تحت الابطين فاتحة:
الوقاية دايما خير من العلاج ، الافضل اننا ناخد الاحتياطات لتجنب اسوداد منطقة الابطين ، هنقولك بعض الحاجات اللي المفروض تتجنبيها لمنع غمقان منطقة الابطين.
- ماتحلقيش الابطين: الحلاقة بتشيل الشعر من السطح بس وبتسيب الجذور بتدي مظهر غامق للابطين ، بالاضافة ان البشرة بتبقى خشنة مع الوقت مع تكرار الحلاقة ، بدل الحلاقة استخدمي الشمع لازالة الشعر من منطقة الابطين ، لانه بيزيل الشعر من الجذور وبيزيل خلايا الجلد الميتة وده بيسيب البشرة ناعمة وفاتحة.
- ماتستخدميش كريمات ازالة الشعر: الكريمات كلها تقريبا بتحتوي على مواد كيميائية قاسية بتضر البشرة ، وبتأدي لطفح جلدي, حكة, تهيج, واضطرابات جلدية خطيرة ، والاستخدام المستمر للكريمات دي هيسبب ضرر دائم لبشرتك ، افضل اختيار هو استخدام الشمع لازلة الشعر من منطقة الابطين.
- ماتعمليش طريقة التحليل الكهربائي لازالة الشعر: التحليل الكهربائي هو من الطرق المستخدمة لازالة الشعر بشكل دائم ، ولكن لو انتي بشرتك فاتحة فانتي معرضه لخطر فرط التصبغ بسبب التحليل الكهربائي.
- ماتستخدميش مزيلات العرق ومضادات التعرق: او على الاقل قللي من استخدامها لو مقدرتيش تتوقفي عن استخدامها تماما ، المواد الكيميائية الموجودة فيها ممكن تسبب اسمرار منطقة الابطين وتخليها خشنة ، وممكن تسبب تصبغ ، عشان كده الافضل تستخدمي مزيلات العرق ومضادات التعرق الطبيعية زي صودا الخبز, زيت جوز الهند, زيت خشب الصندل, وماية الورد.
- ماتتخطيش الاستحمام: لو الجو حر ، ضروري الاستحمام عدد مرات اكتر ، لان عدم الاستحمام ممكن يأدي لتراكم البكتيريا اللي بتسبب ريحة العرق والتصبغات ، ممكن مع اخر شطفة للجسم تخلطي مع الماية كام نقطة من زيت الحمضيات زي زيت الليمون ، ده هيديكي ريحة حلوة طول اليوم وهيمنع اسمرار منطقة تحت الابطين.
- ماتلبسيش ملابس ضيقة اوي: لو تقدري اتجنبي الملابس الاصطناعية ، الملابس الضيقة والاصطناعية بتأدي للاحتكاك وده بدوره بيأدي للطفح الجلدي والتصبغات ، كمان الملابس الصناعية مش بتسمح لبشرتك تتنفس وبتحبس العرق وده بيولد البكتيريا اللي ممكن تسبب اسمرار الجلد ، بقدر الامكان البسي ملابس قطنية او اي نوع قماش مش مضر لبشرتك ، والبسي ملابس واسعة كفاية عشان تدي منطقة الذراعين وتحت الابطين مساحة كافية للحركة من غير احتكاك.
- حافظي على وزنك: قللي وزنك لو بتعاني من السمنة ، لان الدهون المتراكمة في جسمك تحت الابطين بتحتك بالملابس وبتأدي لظهور اسمرار تحت الابطين.
- اتجنبي حبوب منع الحمل: في وسائل منع حمل تانية ممكن تستخدميها بدل الحبوب ، لان الحبوب بتأدي في بعض الاوقات لاختلالات هرمونية ممكن تأدي لاسمرار منطقة الابطين.
- حافظي على اساسيات النظافة الشخصية: عدم تنضيف الابطين بشكل صحيح ، هيأدي لتراكم خلايا الجلد الميتة تحت الابطين وده هيسبب بقع غامقة ، قشري منطقة الابطين بانتظام ولكن بلطف لان البشرة في المنطقة دي رقيقة اتجنبي الفرك القاسي او التعامل بعنف اثناء الفرك لان ده ممكن يسبب ندوب وطفح جلدي.
- سيطري على مستويات السكر: لو بتعاني من مرض السكر من النوع 2 ، ارتفاع مستويات الانسولين ممكن تأدي للافراط في انتاج خلايا الجلد اللي ممكن تسبب التصبغ.
