كريم الجسم السحري لتفتيح الاماكن الغامقة
كريمات تفتيح البشرة المتوفرة في السوق بتكون مليانة بالمواد الكيميائية الصناعية الضارة والمواد الحافظة ، وده ممكن يضر البشرة على المدى الطويل ، عشان كده النهاردة هنشارك معاكم طريقة عمل كريمات لتفتيح الجسم من مكونات طبيعية من غير اي مكونات كيميائية ضارة.
كريمات طبيعية لتفتيح الجسم:
كريم زيت جوز الهند والجلسرين:
المكونات:
- 1 كوباية من زيت جوز الهند.
- 1 معلقة كبيرة جلسرين.
- 30 نقطة من زيت الليمون.
طريقة التحضير والاستخدام:
1- هاتي زيت جوز الهند وسيحيه لو متجمد ، وضيفي له الجلسرين امزجيهم مع بعض كويس وبعدين ضيفي لهم زيت الليمون.
2- قلبي كل المكونات مع بعض ، وكده يبقى عندك لوشن لتفتيح الجسم جاهز للاستخدام ، خزنيه في علبة او برطمان زجاجي.
3- بعد الاستحمام استخدميه كلوشن للجسم وكمان الايدين وكمرطب للقدمين.
زيت جوز الهند هو مكون مثالي لترطيب البشرة ، بيحبس الرطوبة ، بيرطب الجسم بشكل مكثف ، وبيدي الجسم نعومة ونضارة.
الجلسرين بيساعد على الحفاظ على الرطوبة واصلاح الاضرار وحماية بشرتك من الالتهابات ، وبيساعد كمان على تفتيح البشرة وتقليل فرط التصبغ.
زيت الليمون غني بفيتامين C, B1, B2 ، وكتير من المعادن التانية ، وهو فعال جدا لتفتيح البشرة.
كريم جل الصبار وزيت اللوز:
المكونات:
- 1 كوباية من اللبن الرايب.
- 2 معلقة كبيرة من جل الصبار.
- 1 معلقة صغيرة من زيت اللوز الحلو.
- رشة كركم مطحون.
طريقة التحضير والاستخدام:
1- هاتي اللبن الرايب واضربية بالخلاط اليدوي ، بمجرد ما يبقى قوامه ناعم ضيفي له جل الصبار وزيت اللوز وشوية من الكركم المطحون.
2- امزجي المكونات كلها مع بعض كويس ، وكده يبقى عندك لوشن للجسم جاهز للاستخدام.
3- بعد الاستحمام استخدميه كلوشن للجسم ، وكمرطب للايد والقدم.
اللبن الرايب بيساعد على تفتيح البشرة ، بيقلل التصبغات ، بيزيل الاسمرار ، بيحسن ملمس الجلد.
جل الالوفيرا يعتبر وسيلة سهلة ورخيصة لتفتيح البشرة بشكل طبيعي وسهل.
الكركم بيساعد على تحسين لون البشرة وتوحيدها وتفتيحها.