طريقة عمل حلوى اللدو الهندية
حلوى اللدو الهندية هي من اشهر الحلويات في الهند ، طرية ولذيذة وبتدوب في الفم ، وبيتم عملها بشكل اساسي في المناسبات الخاصة والاعياد والمهرجانات ، ومن الحلويات المناسبة جدا كمان لشهر رمضان ، تابعوا معانا المقال بتاعنا واتعرفوا على طريقة عملها بالخطوات.
حلوى اللدو الهندية:
مكونات السيرب (الشربات):
- 1 كوباية سكر.
- ½ كوباية ماية.
- ¼ معلقة صغيرة حبهان مطحون.
- رشة زعفران بودر او زعفران مجروش.
- رشة الوان طعام برتقاني (اختياري).
مكونات العجينة:
- 1 كوباية دقيق حمص.
- ¾ كوباية ماية.
- ¼ معلقة صغيرة حبهان مطحون.
- رشة زعفران بودر او زعفران مجروش.
- رشة الوان طعام برتقاني (اختياري).
- زيت للقلي.
للتزيين:
- فسدق مجروش.
طريقة التحضير:
لعمل السيرب:
1- في حلة حطي السكر والماية وسيبيه لحد ما يغلي.
2- ضيفي الزعفران والحبهان المطحون ، وسيبي الخليط على نار متوسطة لحد ما يتقل شوية ، وممكن تخنبريه بانك تاخدي منه نقطة تبرديها وتحطيها بين صوابعك الابهام والسبابة وتضطي عليه وتفركيه ، لما تفكي صوابعك من بعض المفروض يعمل خيط متصل في الحالة دي يبقى جاهز خلاص.
3- ارفعيه من على النار وسيبيه على جنب.
لعمل العجينة:
4- في طبق ضيفي دقيق الحمص, الحبهان المطحون, الزعفران, الوان الطعام (لو هتستخدميها) ، واخلطيهم وضيفي الماية بالتدريج مع التقليب باستمرار لتكوين عجينة ناعمة وقوامها خفيف وخالية من الكتل.
5- في طاسة على النار سخني زيت غزير ، بمجرد ما يسخن هاتي مغرفة من اللي بتكون فيها ثقوب ضيقة ، وعلى ارتفاع 3 – 4 بوصات فوق الزيت صبي الخليط ، بحيث ان الخليط ينزل من ثقوب الغرفة على شكل قطرات او كور صغيرة.
6- اقليها لمدة دقيقة تقريبا لحد ما تتحمر ، وتاخد لون دهبي.
7- باستخدام مغرفة تانية مثقوبة طلعي القطرات من الزيت وصفيه كويس.
8- انقليها على ورق مطبخ وغطيها بورقة مناديل تانية عشان ماتنشفش لحد ما تحمري باقي كمية العجينة.
9- قبل ما تبدأي تقلي دفعة تانية في الزيت امسحي المغرفة بمنديل مطبخ لتنضيفها من اي عجينة ممكن تكون ساده الثقوب وابدأي اقلي باقي الكمية.
10- بعد ما تخلصي الكمية كلها نزليهم في السيرب يكون دافي ، وحطيه على النار على اقل درجة حرارة لمدة 2 – 3 دقايق ، الخطوة دي بتضمن ان اللدو يفضل طري ومتحلي كويس ، ولكن ماتبالغيش في طبخ كرات اللدو في السيرب.
11- اطفي النار ، وغطيه وسيبيه على جنب لمدة 2 – 3 دقايق.
12- لما الخليط يبقى دافي ، ادهني ايديكي بالسمنة او بالزيت ، وخدي كمية صغيرة من الخليط واضغطي عليها وشكليها على شكل كورة ، وكرري مع باقي الكمية كلها.
13- رصيها في طبق التقديم وزينيها بالفسدق المجروش.