علاج الايورفيدا للبشرة في البيت في 3 خطوات سهلة
النهاردة هنشارك معاكم طريقة علاجية طبيعية للبشرة هتدي نضارة فورية للبشرة الباهتة ، وهو علاج الايورفيدا للبشرة ، في 3 خطوات سهلة تقدري تعمليهم بنفسكفي البيت ، تابعي معانا السطور الجاية واتعرفي على الخطوات.
علاج الايورفيدا للبشرة:
الخطوة 1: التنضيف العميق
عشان تعملي منظف عميق هتحتاجي:
- 1 معلقة صغيرة ماية ورد.
- 1 معلقة صغيرة عسل.
- 1 معلقة صغيرة زيت للبشرة ، ممكن تستخدمي زيت الجوجوبا او زيت اللوز الحلو.
في طبق صغير اخلطي ماية الورد والعسل والزيت ، امزجيهم كويس مع بعض ، اغمسي قطعة قطن في الخليط ده ، وادهني بيه بشرتك بالكامل ، اعملي مساج للوش والرقبة لمدة 5 دقايق ، الخليط ده هينضف البشرة بعمق وهيزيل كل الاوساخ والدهون الزيادة.
الخطوة 2: مقشر البشرة
في طبق خدي كمية من الشوفان ، ضيفي له كمية من اللبن لحد ما تحصلي على عجينة ناعمة ، وزعي العجينة على وشك ورقبتك وافكريها في حركات دائرية تصاعدية لطيفة لمدة دقيقتين لازالة الطبقة الميتة من البشرة ، سيبيه على بشرتك لمدة 10 – 15 دقيقة ، حمض اللاكتيك الموجود في اللبن هيدوب كل خلايا الجلد الميتة على بشرتك ، ، بعد 15 دقيقة ، رشي شوية من ماية الارز ودلكي البشرة لمدة 5 دقايق ، وبعدها اشطفي بشرتك بالماية.
الخطوة 3: ماسك تفتيح البشرة
هتحتاجي:
- 1 معلقة كبيرة من دقيق الارز.
- 1 معلقة صغيرة من خشب الصندل المطحون.
- 1 معلقة صغيرة كركم مطحون.
- ماية ورد.
في طبق اخلطي كل المكونات مع بعض لحد ما تحصلي على عجينة ناعمة قوامها مناسب ، ولو بشرتك جافة ممكن تضيفي للخليط شوية لبن ، وزعي الخليط على بشرتك وسيبيه لمدة 20 دقيقة ، وبعدها اشطفي البشرة بماية باردة.
بعد ما تخلصي كل الخطوات حطي على البشرة كان نقطة من سيروم فيتامين سي ، فيتامين سي غني بمضادات الاكسدة ، اللي بتحارب الجذور الحرة ، فيتامين سي كمان بيعزز انتاج الكولاجين في الجلد ، وبالتالي هيخلي حاجز بشرتك اكتر صحة.
