طريقة عمل كيك الصفوف اللبنانية
كيك الصفوف اللبنانية او كيكة الكركم ، من انواع الحلويات سهلة التحضير ، وكمان خالية من البيض والزبدة ، ومش بتحتاج مجهود ولا وقت في تحضيرها ، تابعي معانا السطور الجايه واتعرفي على طريقتها بالخطوات.
كيك الصفوف اللبنانية:
المكونات:
- 1 ½ كوباية دقيق سامولينا (دقيق سميد ناعم).
- ½ كوباية دقيق عادي.
- 1 معلقة كبيرة كركم مطحون.
- 1 كوباية سكر.
- 1 ½ معلقة صغيرة بيكنج بودر.
- ½ كوباية زيت نباتي.
- 1 كوباية لبن او ماية.
- حفنة من اللوز او الصنوبر للتزيين.
طريقة التحضير:
1- سخني الفرن على درجة حرارة 200 درجة مئوية ، هاتي صينية مقاس 9 في 9 بوصة وادهنيها بالزيت وحطي ورق زبدة.
2- في طبق كبير اخلطي دقيق السميد الناعم, الدقيق العادي, السكر, البيكنج بودر, الكركم ، امزجيهم مع بعض كويس باستخدام المضرب اليدوي الشبكي.
3- ضيفي الزيت, اللبن واخفقي كويس لحد ما المكونات كلها تمتزج تماما ، لو لقيتي الخليط سميك اوي بعد الخلط ، ممكن تضيفي كام معلقة لبن كمان بالتدريج لحد ما يبقى الخليط قوامة متوسط ولا سايل ولا سميك اوي.
4- صبي الخليط في الصينية وزينيه من فوق باللوز او الصنوبر او الاتنين مع بعض حسب المتوفر عندك.
5- دخليها الفرن لمدة 30 – 35 دقيقة لحد ما تستوي واللوز ياخد لون دهبي.
6- سيبيها تبرد تماما ، قبل ما تقطعيها.
7- قدميها مع الشاي او اي مشروب سخن.
للتخزين: اخفظيها في علبة محكمة الغلق ، هتقعد عندك لحد 7 ايام في درجة حرارة الغرفة ، او حوالي 10 ايام في التلاجة.
