خطوتين بس هيساعدوا على زيادة نمو شعرك بسرعة وتكثيفه
في المتوسط الشعر بينمو حوالي ½ بوصة كل شهر ، يعني حوالي 6 بوصات سنويا ، ولكن اكيد في عوامل كتير بتأثر على نمو الشعر زي العمر (الشعر بيميل للتساقط مع التقدم في السن) ، والصحة العامة (زي نقص الفيتامينات) ، وعوامل زي التوتر والعادات اليومية (زي التدخين) ، وفي المقابل في كمان طرق ممكن تساعد على تعزيز نمو شعرك ، وتدليك فروة الراس ببعض المكونات الطبيعية الرئيسية تعتبر طريقة مثبتة لتعزيز نمو الشعر ، والنهاردة من خلال موضوعنا هنشارك معاكم طريقتين رئيسيتين ممكن تساعدك على نمو الشعر بشكل اسرع ، وهتخلي خصلات شعرك اقوى واكتر لمعان.
خطوتين لزيادة نمو الشعر:
الخطوة 1: تدليك فروة الراس
زي ما التربة الكويسة ضرورية لنمو نباتات صحية ، كمان فروة الراس الصحية هي الاساس لنمو شعر صحي ، ممكن تعملي تدليك لفروة راسك وشعرك جاف ، ولكن الافضل اضافة زيت غني بالمغذيات ، ده هيضاعف الفوايد ، ولو انتي شعرك جاف ممكن تعملي التدليك بالزيت مرتين في الاسبوع ، اما لو فروة راسك دهنية ، هيكون كافي انك تعملي التدليك مرة واحدة في الاسبوع.
العلاج بزيت الخروع السخن:
- للاستخدام ، دفي كمية من الزيت في راحة ايدك ووزعيه على جذور الشعر مع التدليك وسرحيه بالمشط عشان توزعيه على الشعر كله لحد الاطراف.
- سيبيه على شعرك لمدة 15 – 20 دقيقة على الاقل ، بعدها اغسلي شعرك بالشامبو.
ملحوظة: ممكن تبلي شعرك قبل استخدام الزيت عشان يتم امتصاصه بشكل افضل.
الخطوة 2: ماسك البيض
زي ما قولنا في البداية الشعر بينمو بمعدل من 1/4 - 1/2 بوصة تقريبا كل شهر ، ولو احنا مش هنقدر نسرع العملية دي ، لكن نقدر نأثر على جودة اعمدة الشعر اللي بتنتجها كل بصيلة ، في حاجات نقدر نعملها لتحفيز نسبة اعلى من بصيلات الشعر في فروة الراس ، وده هيخلي الشعر ينمو شكل اكبر واكتر كثافة وصحة.
البيض بيحتوي على الليسيثين والبروتين اللي بيقوي ويغذي ويعالج خصلات الشعر ، بالاضافة ان محتواه العالي من الكبريت هيساعد في علاج قشرة الراس.
- لتحضير الماسك ، اخلطي بيضتين مع 2 معلقة كبيرة زيت زيتون.
- ضيفي ½ كوباية من الماية لتخفيف الخليط ، ويبقى اقل لزوجة.
- وزعي الماسك على شعر جاف وسيبيه لمدة 30 دقيقة.
- بعدها اغسلي شعرك بالشامبو والبلسم بالطريقة المعتادة.
