وصفة شوربة الفاصوليا البيضا
الفاصوليا البيضا من البقوليات اللي متعودين دايما نطبخها بالطريقة العادية او نعملها كسلطة ، لكن النهاردة هنشوف مع بعض طريقة مختلفة للفاصوليا وهي وصفة شوربة الفاصوليا البيضا بطريقتين مختلفين.
وصفة شوربة الفاصوليا البيضا بالطماطم:
المكونات:
- 2 معلقة كبيرة زيت زيتون.
- 1 بصلة صفرا صغيرة متقطعة مكعبات.
- 4 فصوص ثوم مفروم.
- ½ معلقة صغيرة شطة.
- ½ معلقة صغيرة ملح او حسب الذوق.
- فلفل اسود.
- 3 معالق كبيرة بقدونس طازة مفروم ، او معلقة كبيرة بقدونس مجفف.
- 1-2 معلقة صغيرة ريحان طازة مفروم ، او ½ - 1 معلقة صغيرة ريحان مجفف.
- 1-2 معلقة صغيرة زعتر طازة ، او ½ - 1 معلقة صغيرة زعتر مجفف.
- 3 كوبايات فاصوليا بيضا مسلوقة نص سلقة.
- 4 – 5 كوبايات شوربة خضار او شوربة فراخ.
- 400 جرام طماطم متقطعة.
- 1 معلقة صغيرة بشر قشر ليمون.
اضافات اختيارية:
- سبانخ متقطعة.
- جبنة بارميزان.
- خبز بالثوم او باجيت.
طريقة التحضير:
1- على النار حطي طاسة على نار متوسطة مع معلقتين صغيرين زيت زيتون ، ضيفي البصل وقلبيه في الزيت لمدة 5 دقايق ، وبعدين ضيفي الثوم المفروم, الشطة, الملح, الفلفل الاسود, الاعشاب الطازة او المجففة ، قلبيهم مع بعض لمدة دقيقة.
2- ضيفي الفاصوليا, الشوربة, الطماطم ، سيبي الخليط لحد ما يغلي وبعدها قللي الحرارة وسيبيها لحد ما تستوي ، لمدة 15 دقيقة تقريبا.
3- ضيفي بشر قشر الليمون ، دوقي الشوربة وظبطي الملح والفلفل والاعشاب حسب الذوق.
4- وكده الشوربة تبقى جاهزة ، ممكن ترشي عليها على الوش في طبق التقديم زيت زيتون وجبنة بارميزان مبشورة ، واي اضافات اختيارية تفضليها.
شوربة الفاصوليا البيضا بالخضروات:
المكونات:
- 1 بصلة كبيرة صفرا متقطعة مكعبات.
- 2 حبة جزر متقطعين مكعبات.
- 1 – 2 عود كرفس.
- 3 – 4 فصوص ثوم مفرومين.
- 2 معلقة كبيرة زيت زيتون.
- 1 معلقة كبيرة زبدة.
- 2 معلقة صغيرة توابل ايطالية.
- ¼ - ½ معلقة صغيرة ملح.
- ¼ معلقة صغيرة فلفل اسود.
- 4 – 5 كوبايات شوربة خضار او شوربة فراخ.
- 3 كوبايات فاصوليا بيضا مسلوقة نص سلقة.
- 1 كوباية جبنة بارميزان مبشورة (اختياري).
- ½ كوباية جبنة بارميزان مبشورة (topping).
- بقدونس مفروم طازة للتزيين.
طريقة التحضير:
1- حطي طاسة على نار متوسطة فيها الزيت والزبدة ، وضيفي البصل, الجزر, الكرفس وقلبيهم لحد ما المكونات تطرى.
2- ضيفي الثوم والتوابل الايطالية والملح والفلفل الاسود ، وقلبيهم مع بعض لمدة دقيقة تقريبا.
3- ضيفي الشوربة والفاصوليا والجبنة البارميزان لو هتستخدميها ، سيبي الشوربة تغلي وبعدها قللي الحرارة ، وسيبيها لحد ما تستوي حوالي 15 دقيقة تقريبا لحد ما كل الخضروات تستوي.
4- دوقيها وضيفي لها اي اعشاب او توابل اضافية حسب الذوق.
5- كده الشوربة تبقى جاهزة ، قدميها في الاطباق ورشي على وشها جبنة بارميزان مبشورة.