حكاية وتاريخ فانوس رمضان
الفانوس يعتبر من اكتر الرموز المميزة لشهر رمضان ، ولكن هل نعرف ايه حكاية فانوس رمضان وتاريخه وامتى وازاي ظهر ، تابعي معانا المقال بتاعنا واتعرفي على تاريخ ظهور فانوس رمضان.
تاريخ ظهور فانوس رمضان:
فكرة فانوس شهر رمضان بترجع لعصر الدولة الفاطمية من اكتر من الف سنة ، وبعدها انتشر لكل الدول العربية ولكل دول العالم ، وفي قصص وروايات كتير عن سبب ظهوره.
- اول حكاية منهم انه لما المعز لدين الله الفاطمي دخل القاهرة بالليل جاي من المغرب في 5 رمضان سنة 358 هجرية ، المصريين خرجوا في موكب كبير شارك فيه كل فئات الشعب نساء, رجال, اطفال على اطراف الصحرا عشان يرحبوا بيه ، وهما شايلين المشاعل والفوانيس الملونة والمزينة لاضاءة الطريق ، ومن اليوم ده بقت الفوانيس بتنور الشوارع لحد اخر شهر رمضان ، وبقت عادة عند المصريين كل سنة.
- وفي قصة تانية بتقول ان واحد من الخلفاء الفاطميين حب انه ينور شوارع القاهرة طول شهر رمضان ، فأمر كل شيوخ المساجد بتعليق فانوس قدام كل مسجد ووضع شموع جواها لاضاءتها، وواحدة واحدة بقى الفانوس طقس من طقوس شهر رمضان ، ورغم انتهاء عصر الفاطميين الا انه من بعدهم فضل الفانوس ليه سحر خاص واحساس مختلف عن اي حاجة تانية ارتبط وجودها برمضان.
- في رواية كمان ، بتقول ان الفانوس ظهر في رمضان في عهد الحاكم بأمر الله الفاطمي حفيد المعز في القرن العاشر الميلادي ،واللي ماكنش مسموح فيه للنساء انهم يخرجوا من بيوتهم ، وشهر رمضان هو كان الشهر اللي سمح فيه للنساء بالخروج من بيوتهم دونا عن باقي شهور السنة ، واللي بيحصل فيه ان طفل صغير بيمشي قدام النساء ماسك في ايده فانوس منور عشان ينبه الرجالة اللي في الطريق ان في نساء ماشية ويوسعوا لهم الطريق.
- في قصة كمان بتقول ان الخليفة الفاطمي كان بيخرج للشوارع بالليل لاستطلاع هلال شهر رمضان ، وكانوا الاطفال بيخرجوا معاه عشان ينوروا له الطريق وكان كل طفل بيبقى شايل الفانوس بتاعه ، مع غناء بعض الاغاني تعبيرا عن فرحتهم باستقبال شهر رمضان.
تطور شكل الفانوس:
بدأت صناعة الفوانيس زمان باستخدام الصفيح الرخيص ، وبعدها الموضوع اتطور وصناعته بقت فن حرفي ، وخامته وشكله اتطور وبقى بيتصنع من النحاس, الزجاج الملون مع شمعة للاضاءة ، وبعدها اتغيرت احجام الفوانيس ، وبقت تتنور بالفتيل والزيت بدل الشموع ، ومن وقتها لحد دلوقتي صناعة الفوانيس مرت بتغيرات كتير واتطورت وبقى يستخدم لصناعة الفوانيس مواد كتير مختلفة منها اللي من خشب الارابسيك, المعدن, النحاس, والبلاستيك ، وحتى كمان الفوانيس القماش المعروف بالخيامية.
