طريقة عمل الفلفل المحشي باللحمة المفرومة على الطريقة الايطالية
لو عايزة طريقة جديدة ومختلفة لمحشي الفلفل ، تابعي معانا السطور الجايه واتعرفي على طريقة عمل الفلفل المحشي باللحمة المفرومة على الطريقة الايطلية.
الفلفل المحشي الايطالي:
المكونات:
- ½ كوباية ارز.
- 3 حبات فلفل رومي كبيرة.
- 1 معلقة كبيرة زيت زيتون ، او اي زيتنباتي.
- 1 بصلة كبيرة مفرومة.
- 455 كيلو جرام لحمة مفرومة ، بنسبة دهون 85%.
- 400 جرام صلصة المارينارا "صلصة المكرونة".
- 1 كوباية جبنة موتزاريلا مبشورة.
- 1 كوباية بارميزان مبشورة.
- 1 معلقة صغيرة فلفل اسود او حسب الذوق.
- 1 معلقة صغيرة ملح او حسب الذوق.
- 170 جرام جبنة موتزاريلا طازة متقطعة شرايح.
طريقة التحضير:
1- سخني الفرن على درجة حرارة 200 درجة مئوية ، اطبخي الارز بالطريقة العادية ، ولكن اطبخيه ¾ سوا عشان مايعجنش ، وخليه على جنب ، اقطعي الفلفل بالنص بالطول ، وزيلي منه البذور.
2- في طاسة سخني معلقة كبيرة من الزيت ، وضيفي له البصل المفروم ، قلبيه لحد ما يطرى ويبقى شفاف.
ضيفي اللحمة المفرومة.
3- ضيفي صلصة المكرونة, الارز, الجبنة الموتزاريلا المبشورة, الجبنة البارميزان المبشورة ، تبلي الخليط بالملح والفلفل ، قلبي المكونات كلها مع بعض ، وسيبيه لحد ما اللحمة تستوي.
4- املي كل نص حبة فلفل بخليط الارز واللحمة ، وحطي على الوش شرايح الموتزاريلا ، ولو مش متوفرة ممكن تستخدمي موتزاريلا مبشورة.
5- رصي الفلفل في صينية ، وسيبي مسافة صغيرة بين كل حبة فلفل ، غطيه بورق فويل ، ودخليه الفرن على درجة حرارة 200 درجة مئوية لمدة 30 دقيقة تقريبا.
نصايح للوصفة:
- لو عايزة الفلفل يبقى طري ممكن تسلقيه قبل الحشو ، اغلي ماية ونزلي فيها الفلفل يطبخ لمدة 3 – 5 دقايق بس ، اما لو بتحبيه يبقى في قرمشة شوية احشيه ني زي ما هو.
- ممكن تستبدلي اللحمة المفرومة في الوصفة بأي نوع بروتين تاني ، ممكن تستخدمي فراخ مفرومة, لحم الديك الرومي, او سجق ، وممكن تستخدمي بروتين نباتي زي الفاصوليا وتستغني عن اللحمة خالص.
- ممكن تستبدلي الارز العادي المصري بارز بسمتي, او برغل, او كينوا.
- بدل الجبنة الموتزاريلا ممكن تستخدمي جبنة شيدر.
- ممكن تخلطي توابل ايطالية للحشوة عشان تعززي النكهة الايطالي في المحشي ، ممكن تضيفي رشة شطة لو بتحبي الاكل الحراق ، ولو بتحبي نكهة الثوم في المحشي ، ممكن تضيفي فصوص ثوم مفرومة مع البصل اثناء تحضير الحشوة.
- ممكن كمان تضيفي اعشاب مختلفة زي الريحان الطازة, البقدونس, او الكزبرة لاضافة نكهة منعشة للحشوة.
- الافضل ان اللحمة المفرومة يكون فيها نسبة دهون عالية عشان تدي نكهة غنية اكتر للمحشي.
- اتجنبي الافراط في طبخ الفلفل عشان مايبقاش طري اوي ويفقد قوامه ، واتجنبي اضافة اي سوائل اضافية للحشوة.
- وللوصفة دي افضل اختيار هو الفلفل الالوان الاصفر, الاحمر, وخلي الفلفل الاخضر اخر اختيار لانه بيكون في نسبة مرارة شوية.
- لو في اي بواقي من المحشي ممكن تخزنيها في التلاجة في علبة محكمة الغلق لحد 4 ايام ، لو عايزة تخزنيه فترة اطول حطيه في الفريزر هيقعد معاكي لحد 3 شهور ، ولاعاداة التسخين خرجيه من الفريزر يفك تماما وحطيه في صينيه وغطيه بورق فويل ودخليه الفرن على درجة حرارة 150 درجة مئوية لمدة 15 – 20 دقيقة ، وممكن تسخنية في الميكروويف او الايرفراير.