طريقة عمل الزبادي في البيت
في سحورنا كل يوم في رمضان مش بنستغنى عن الزبادي ، لانها من الحاجات اللي بتساعد على منع العطش خلال الصيام ، والنهاردة من خلال موضوعنا هنعرف مع بعض طريقة عمل الزبادي السادة والزبادي بالفواكه في البيت.
طريقة عمل الزبادي السادة:
المكونات:
- لتر لبن.
- كوباية زبادي.
الطريقة:
1- حطي اللبن في حلة على نار متوسطة لحد ما يغلي.
2- بعدها ارفعيه من على النار وسيبيه على جنب لحد ما يهدى ويبقى دافي مش سخن اوي.
ضيفي له الزبادي.
3- اخفقي المكونات مع بعض بمضرب يدوي او كهربائي لحد ما يمتزجوا مع بعض كويس ، او دوبي الزبادي قي شوية لبن صغيرين وبعدها ضيفيها على باقي كمية اللبن كلها وقلبيهم مع بعض.
4- صبي الزبادي في كوبايات او طواجن صغيرة ، وغطيهم بفوطة.
5- سخني الفرن لمدة 20 دقيقة ، وبعدها اطفيها ، وحطي طواجن الزبادي على صينية ودخليها الفرن وسيبيها لحد ما تتماسك ، وبعدين احفظيها في التلاجة لوقت الاكل.
طريقة الزبادي اللايت:
المكونات:
- لتر لبن.
- كوباية زبادي.
الطريقة:
1- حطي اللبن في حلة على النار لحد ما يغلي.
2- ارفعيه من على النار وسيبيه على جنب لحد ما يبرد ، وبعدها دخليه التلاجة لمدة 24 ساعة.
3- خرجيه من التلاجة وشيلي طبقة القشطة اللي اتكونت على الوش ، حطي اللبن على نار متوسطة لحد ما يبقى دافي بس.
4- سيبيه يهدا شوية ، وبعدها ضيفي له الزبادي وامزجيهم مع بعض كويس.
5- صبي الخليط في كوبايات او في طواجن الزبادي وغطيه بفوطة ، ودخليه فرن دافي لحد ما تتماسك ، وبعدين احفظيها في التلاجة.
طريقة عمل الزبادي بالفواكه:
المكونات:
- لتر لبن.
- كوباية زبادي.
- كمية مناسة من الفاكهة ، اي نوع تفضليه زي الفراولة او الخوخ.
الطريقة:
1- اغلي اللبن ، وبعد الغليان ارفعيه من على النار وسيبيه على جنب لحد ما يبقى دافي بس.
2- ضيفي له الزبادي والفاكهة ، واضربي الخليط في الخلاط الكهربائي لحد ما يتمتزج كويس مع بعض.
3- صبي الخليط في كوبايات او طواجن الزبادي وغطيهم ، ودخليهم في فرن دافي لحد ما تتماسك ، بعدها احفظيها في التلاجة.
