طريقة تدميس الفول في البيت لسحور رمضان
الفول من الاكلات اللي كلنا تقريبا بناكلها طول السنة في كتير من الايام كوجبة فطار ، ولكن في شهر رمضان بشكل خاص هو طبق اساسي يوميا على سفرة السحور لانه مغذي ومشبع ، والنهاردة من خلال موضوعنا هنشارك معاكم طريقة تدميس الفول في البيت وهيطلع معاكي زي فول المحلات والعربيات بطعمه المميز ، بالاضافة انه تدميسه في البيت هيوفرلك في الميزانية ، وكمان نضافته وجودته افضل من فول المحلات.
طريقة تدميس الفول في البيت:
المكونات:
- كوباية فول ، منقوع ليلة كاملة.
- 2 معلقة كبيرة عدس اصفر ، بيحسن طعم ولون الفول.
- بصلة متقطعة مكعبات.
- 2 فص ثوم.
- طماطم متقطعة ، بتدي لون مميز للفول.
- عصير ليمونة او ليمونة متقطعة شرايح ، بتخلي الفول يحافظ على لونه وما يغمقش.
- جزرة "اختياري" ، كمان بتدي لون مميز للفول.
طريقة التحضير:
1- صفي الفول من ماية النقع ، هاتي قدرة الفول ولو مش متوفرة استخدمي اضيق حلة عندك ، حطي الفول, العدس, البصل, الثوم, الليمون ، خلي كمية الفول لنص القدرة او الحل ، وضيفي ماية سخنة بحيث تغطي كل المكونات.
2- غطي القدرة كويس حطي عليها ورقة زبدة وفوقيها ورق فويل ، وحطي فوقيهم الغطا واكبسية كويس ، عشان الماية ماتتبخرش منها بسهولة.
3- حطي الفول على نار عالية لحد ما يغلي ، بعدها خفضي النار لاقل حاجة.
4- سيبيه على نار هادية وماتفتحيش عليه كتير ، قلبيه تقريبا كل ساعة وكل ما يحتاج ماية زودي له ماية سخنة لحد ما يستوي.
5- سيبي الفول على النار تقريبا من 6 – 8 ساعات لحد ما يستوي تماما.
6- بعد ما يستوي تقدري تاكليه زي ما هو او تضربيه في الخلاط او بالهاند بلندر.
لو الكمية اللي انتي عملاها هتاكليها خلال اسبوع احفظيه في التلاجة عادي ، ولو هتقعد اكتر من كده قسميه في علب او اكياس كل كيس يكفي وجبة واحدة واحفظيه في الفريزر ، عند الاكل طلعي منه يفك وسخنيه وضيفي عليه الاضافات اللي تحبيها.
مكونات خلطة الفول:
الخلطة دي حاجة اضافية لو حابة تعمليها بتدي الفول لون وقوام حلو وسميك.
- 2 معلقة دقيق.
- 1 معلقة كركم.
- 1 معلقة بابريكا.
- 1 معلقة صلصة طماطم.
- شوية ماية.
الطريقة:
1- اخلطي المكونات مع بعض وقلبيهم كويس ، بحيث يبقى قوامها متوسط ، مش سايلة ولا سميكة.
2- ضيفي الخلطة للفول في الاخر بعد ما يكون استوى خلاص ، قلبيه لحد ما تحسي قوامه بقى سميك شوية.
3- ارفعي الفول من على النار ، وكده يكون جاهز للاكل ، وبالهنا والشفا.