3 نقط من السيروم ده هتخليكي ماتحتاجيش للمكياج
كل البنات دايما بتدور على منتج ممكن يوفر توهج ونضارة طبيعية لبشرتهم ، نقط بسيطة من السيروم اللي معانا النهاردة هتحققلك ده ، من خلال تغذية البشرة ، وفي المقال بتاعنا هنشارك معاكم طريقة تحضير السيروم بمكونات طبيعية.
طريقة عمل سيروم لبشرة صحية خالية من العيوب:
هتحتاجي:
- 6 معالق كبيرة من عصير الخيار.
- 2 كبسولة فيتامين E.
- 1 معلقة كبيرة من زيت الزيتون.
- 2 معلقة كبيرة من جل الصبار.
- 3 معالق كبيرة ماية ورد.
- ازازة فاضية.
طريقة التحضير:
1- في طبق صغير اخلطي كل المكونات مع بعض.
2- وباستخدام ابره افتحي كبسولة فيتامينE وضيفي الزيت على باقي المكونات.
3- قلبي المكونات لحد ما تمتزج مع بعض كويس.
4- انقلي السيروم لازازة فاضية ويفضل تكون بقطارة لسهولة الاستخدام.
طريقة الاستخدام:
- خدي كام نقطة من السيروم ووزعيهم على بشرة نضيفة.
- دلكي البشرة بلطف في حركات دائرية لمدة 2 – 3 دقايق.
- حطي السيروم ده كل يوم قبل النوم ، وسيبيه على بشرتك طول الليل.
- تاني يوم الصبح اغسلي بشرتك بماية باردة.
فوايد السيروم:
- السيروم ده هيعمل طبقة واقية على بشرتك لحمايتها من اضرار اشعة الشمس.
- جل الصبار الموجود فيه هيساعد على تجديد بشرتك وهيعزز ملمس البشرة العام وهيحسن جودتها.
- زيت فيتامينE معروف انه بيمنع الاضرار الجذرية اللي ممكن تحصل لبشرتك ، وبيعزز انتاج الكولاجين في البشرة.
- الخيار هيساعد على توحيد لون البشرة وتفتيحها وعلاج البقع الغامقة.
- زيت الزيتون وماية الورد هيساعدوا على منع فقدان الرطوبة من بشرتك وبالتالي منعها من الجفاف.
وبالتالي انتي بالسيروم ده هتقدري تعالجي كل علامات الشيخوخة, التجاعيد, الجروح, الندبات, والبقع الغامقة ، والمحتوى الغني المضاد للاكسدة الموجود في السيروم ده هيخلي بشرتك خالية من اي بكتيريا, فطريات, او اي جراثيم تانية ، وهيوفرلك توهج طبيعي وهيحسن مظهر بشرتك.
