تاريخ وبداية الاحتفال بيوم المرأة العالمي
يوم المرأة العالمي هو يوم احتفال سنوي بيكون يوم 8 مارس ، لكن يمكن معظمنا مايعرفش ايه هو يوم المرأة العالمي ، وليه بنحتفل بيه ، وامتى بدأ ، النهاردة من خلال موضوعنا هنتعرف على كل حاجة عن يوم المرأة العالمي.
ايه هو يوم المرأة العالمي؟
هو احتفال عالمي بيكون يوم 8 مارس من كل سنة ، وهو يوم بالنسبة لنا عبارة عن توحيد الاصوات مع كل الناس في جميع انحاء العالم والتعبير عن رسالتنا بهدف المساواة في الحقوق بصوت عالي وواضح.
بيتم الاحتفال فيه بكل النساء ، بكل تنوعهم واختلافهم ، بكل جوانب اختلافهم في العرق, الجنسية, الهوية ، بنحتفل بكل اللي سبقونا ، واللي واقفين جنبنا لحد دلوقتي ، وباللي هيجوا بعدنا.
هو يوم الاحتفال بانجازات المرأة ، سواء كانت اجتماعية, سياسية, ثقافية, او اقتصادية.
تاريخ اليوم العالمي للمرأة:
في سنة 1908 ، وعلى خلفية ظروف العمل الرهيبة والاستغلالية للمرأة ، خرجت حوالي 15000 امرأة للشوارع في نيويوك للاحتجاج والمطالبة بعدد ساعات عمل اقصر ، واجور افضل وحقوق التصويت.
وفي السنة اللي بعدها اعلن الحزب الاشتراكي الامريكي عن يوم وطني للمرأة لتكريمها ، وفي سنة 1910 بقى اليوم ده عالمي ، الحزب الاشتراكي صوت لانشاء يوم للمرأة للدفاع عن حق التصويت ، واول احتفال لليوم العالمي للمرأة تم سنة 1911 ، وشارك فيه اكتر من مليون شخص في مسيرات في اوروبا.
وخلال القرن العشرين تم الاعتراف باليوم العالمي للمرأة والاحتفال بيه على المستوى الشعبي ، وهو يعتبر نقطة تجمع من اجل العدالة الاجتماعية ، وفي سنة 1975 كانت هي السنة الدولية للمرأة ، واعتمدت الامم المتحدة اليوم العالمي للمراة في 8 مارس ، وهو اليوم اللي مازال بيتم الاحتفال بيه لحد دلوقتي.
ايه اهمية يوم المرأة العالمي؟
اليوم العالمي للمرأة هو يوم الاعتراف بالانجازات اللي تمت في المساواة بين الجنسين ، وبنشوف ايه اللي ممكن نوصل له بعد كده ، في سنة 1911 ، سمحت 8 دول بس للنساء بالتصويت ، ولم يسمح للمساواة في الاجر عن العمل المتساوي ، وكانت الحقوق الانجابية معدومة.
ومن وقتها قطعنا شوط كبير جدا ، وفي حين ان النساء ماكنش ليهم حق بالتصويت ، دلوقتي المرأة بقت بتقود دول ، وكانت المرأة بتواجه قيود على مكان العمل ، دلوقتي المرأة بتدير شركات ، ودلوقتي في دول كتير حصلت فيها المرأة على حقوق ماكنتش تحلم بيها ، ولكن لسه مازال في دول النساء فيها لسه مش قريبة حتى من تحقيق اي اهداف للمساواة وحقوق المرأة.
وفي بعض الاحيان حتى بعد انشاء القوانين والحقوق بيتم تجاهلها على اي حال ، ومازال لسه في حالات عنف منزلي ضد المرأة, الاتجار بالبشر, الاعتداء الجنسي, التحرش, العنف ضد المدافعات عن الحقوق البيئية.
اليوم العالمي للمرأة هو فرصة بتتكرر مرة واحدة في العالم كل سنة لتذكير الحكومات والشركات وكل اللي شايفين ان المرأة لسه ماحققتش اي حاجة في بلده بحقوق المرأة.
اليوم العالمي للمرأة هو فرصة للاعتراف بالتحديات اللي بتواجهها النساء باختلافهم على مستوى العالم ، وهو كمان يوم اظهار للتضامن مع النساء اللي بيعيشوا في بلدان ممكن مايقدروش يخرجوا في مسيرات خوفا على سلامتهم.
وفي اليوم العالمي للمرأة ، افتكري دايما ان مادام امرأة واحدة بتواجه التمييز او المضايقة او عدم المساواة او القمع ، فاحنا كلنا بنواجه ده ، لانه في بعض الاحيان بحتاج نفتكر اننا مش لوحدنا.
واليوم العالمي للمرأة يعتبر طريقة رائعة لاعادة الالهام او اعادة النشاط للاستمرار ، وتذكير نفسنا ان في ملايين من النساء واقفين معانا ، وكلنا بنواجه وبنفوز في نفس المعركة.
هل الرجال مرحب بيهم في اليوم ده؟
اكيد ، اليوم العالمي للمرأة هو الوقت المناسب للجميع ، بغض النظر عن الهوية الجنسية ، التحالف مع الرجال ، خصوصا لو هما على استعداد لاستخدام امتيازاتهم لدعم المساواة بين الجنسين ، هو تضخيم لاصوات النساء في العالم ، وافتكري ان الحركة النسوية هي مش بس لتحسين حياة النساء ، ولكن كمان بتتعلق بتفكيك كل الصور النمطية والادوار الضارة بين الجنسين ، تحقيق المساواة بين الجنسين لازم يكون مهم بالنسبة للرجال زي النساء.
ايه علاقة اللون الارجواني باليوم العالمي للمرأة؟
الاتحاد النسائي الاجتماعي والسياسي في المملكة المتحدة استخدموا اللون الارجواني والاخضر والابيض ، رمز لمساواة المرأة من سنة 1908 ، اللون الارجواني هو لون بيدل على العدالة والكرامة وبيستخدم دلوقتي لتمثيل المرأة ، واللون الاخضر هو لون الامل ، والنهاردة اللون الارجواني بيمثل اليوم العالمي للمرأة ، واللون الارجواني مع الاخضر بيمثل الحركة النسوية.
