وصفات سناكس صحية من غير زيت
اكتر حاجة ممكن تزود الوزن هي الوجبات الخفيفة غير الصحية اللي بناكلها بين الوجبات ، لكن اكيد مش هتحرمي نفسك من السناكس او تاكلي وجبات خفيفة طعمها مش احسن حاجة ، النهاردة جمعنالكم ما بين الطعم اللذيذ والفوايد الصحية من خلال وصفات سناكس صحية من غير زيت تقدري تاكلي منها من غير ما تقلقي على وزنك.
وصفات سناكس صحية:
1- كرات البروكلي:
المكونات:
– 1 ½ كوباية بروكلي مبشور.
– ½ كوباية بصل مفروم ناعم.
– ½ معلقة صغيرة زعتر مجفف.
– 1 معلقة صغيرة ريحان مجفف.
– ¼ معلقة صغيرة فلفل اسود.
– ½ معلقة صغيرة ثوم بودر.
– 1 معلقة صغيرة بذور الشيا منقوعة في الماية.
– ½ كوباية من فتات الخبز.
– ¼ كوباية دقيق لوز.
– 1 معلقة كبيرة خميرة غذائية.
– ملح حسب الذوق.
الطريقة:
1- سخني الفرن على درجة حرارة 200 درجة مئوية.
2- حطي البصل في الطاسة على النار وشوحيه من غير اي زيت.
3- ضيفي له البروكلي المبشور والملح وقلبيهم مع بعض لحد ما كل الرطوبة تتبخر ، ارفعيه من على النار.
4- ضيفي لها كل البهارات, فتات الخبز, دقيق اللوز ، وقلبيهم مع بعض كويس.
5- ضيفي بذور الشيا المنقوعة واخلطي كويس.
6- قسمي الخليط من 10 – 15 كورة.
7- رصيهم في صينية مش مدهونة ودخليهم الفرن لمدة 25 دقيقة.
8- بعد 15 دقيقة ، اقلبي الصينية واخبزيها لمدة 10 دقايق كمان.
2- مقرمشات الحبوب الكاملة:
المكونات:
– 1 كوباية دقيق قمح كامل.
– 2 معلقة صغيرة سمسم.
– 2 معلقة صغيرة اعشاب مشكلة زي الزعتر والريحان او اي اعشاب تفضليها.
– ماية للعجن
الطريقة:
1- اخلطي الدقيق, السمسم, الاعشا واعجنيهم بالماية بالتدريج بحيث يبقى عندك عجينة قاسية مش طرية.
2- افرديها بالنشابة على سطح مستوي بسمك رقيق ، وقطعيها شرايح رفيعة.
3- حطيهم في صينية خبز ودخليهم الفرن على درجة حرارة 220 درجة مئوية لمدة 10 – 15 دقيقة لحد ما تبقى مقرمشة.
3- فطاير محشية:
المكونات:
– 1 كوباية دقيق.
– ماية للعجن.
– ملح حسب الذوق.
– ½ معلقة صغيرة فلفل اسود.
– 1 راس بروكلي مفرومة ناعم.
– 1 كوباية فاصوليا خضرا متقطعة.
الطريقة:
1- في طبق اخلطي البروكلي والفاصوليا وتبليهم بالملح والفلفل الاسود.
2- اعملي عجينة ناعمة ومرنة بالدقيق والماية.
3- قسميها لكرات متساوية ، افردي كل كورة واحشيها بخليط البروكلي والفاصوليا واقفليها بجع كل الحروف بتاعتها مع بعض.
4- حطيهم في مصفى فوق حلة فيها ماية وغطيهم ، وسيبيهم يستوا على البخار.
4- سلطة العدس:
المكونات:
– 1 كوباية عدس اصفر مسلوق.
– ملح حسب الرغبة.
– ¼ كوباية جزر مبشور.
– ¼ كوباية رمان.
– خليط من الكزبرة الخضرا واوراق النعناع المفرومة.
– البهارت المفضلة.
– 4 معالق صغيرة عصير ليمون.
الطريقة:
في طبق اخلطي كل المكونات مع بعض ، وكده السلطة تبقى جاهزة.
5- سلطة الحمص:
المكونات:
– 1 كوباية حمص مسلوق.
– ¼ كوباية بصل مفروم.
– ¼ كوباية طماطم متقطعة.
– ½ كوباية خيار متقطع.
– 3 معالق كبيرة كزبرة خضرا مفرومة ناعم.
– 3 معالق كبيرة عصير ليمون.
– ½ معلقة صغيرة ملح.
– ½ معلقة صغيرة شطة.
– ½ معلقة صغيرة من الفلفل الاخضر الحار المفروم.
– ½ معلقة صغيرة كمون مطحون.
الطريقة:
في طبق كبير اخلطي كل المكونات مع بعض ، واستمتعي بالسلطة اللذيذة.
6- وصفة الشوفان والسميد:
المكونات:
– ½ كوباية شوفان مطحون.
– ½ كوباية سميد (دقيق السيمولينا).
– ¼ كوباية زبادي.
– ½ معلقة صغيرة فلفل اخضر حار مفروم.
– ½ كوباية سبانخ متقطعة.
– ½ معلقة صغيرة ملح.
– ¾ كوباية ماية.
الطريقة:
1- اعملي عجينة بخلط الشوفان, السميد, الزبادي والفلفل الاخضر المفروم والملح والماية.
2- ضيفي السبانخ ومعلقتين كبار ماية للحصول على عجينة ناعمة.
3- صبي الخليط في صينية وسويه على البخار لمدة 7 – 8 دقايق.
4- سيبيه يبرد وقطعيه لقطع بالاحجام اللي تفضليها.
7- الحمص مع اصابع الجزر:
المكونات:
– 3 كوبايات حمص مسلوق.
– 6 معالق صغيرة ثوم مفروم.
– 3 معالق صغيرة شطة (او حسب الرغبة).
– 1 معلقة صغيرة كمون.
– 2 ½ معلقة صغيرة مسطردة.
– 6 معالق كبيرة عصير ليمون.
– ½ معلقة صغيرة فلفل اسود.
– ملح حسب الذوق.
الطريقة:
1- امزجي كل المكونات في البلندر واضربيهم كويس لحد ما الخليط يبقى ناعم.
2- ضيفي 2 – 3 معالق كبيرة ماية اثناء الخفق عشان تظبطي القوام ويبقى ناعم وخالي من اي تكتلات.
3- قدميها في طبق مع اعواد الجزر.
8- كرات الفراخ:
المكونات:
– 1 كيلو فراخ من غير عضم متقطعة مكعبات.
– 4 بيضات.
– 1 معلقة كبيرة ماية.
– ½ معلقة صغيرة زعتر مجفف.
– 2 كوباية دقيق.
– ½ معلقة صغيرة شطة.
– 1 معلقة صغيرة بابريكا.
– 8 كوبايات ارز كريسبي مطحون ، ممكن تستخدمي بداله فتات الخبز.
– ملح حسب الذوق.
الطريقة:
1- اخفقي البيض مع معلقة كبيرة من الماية.
2- في طبق عميق اخلطي الدقيق, الشطة, البابريكا, الملح, الزعتر.
3- دحرجي قطع الفراخ في خليط الدقيق ، وبعدها اغمسيها في خليط البيض ، وبعدين دحرجيها في الارز الكريسبي المطحون او فتات الخبز.
4- حطيهم في الاير فراير على درجة حرارة 180 درجة مئوية لمدة 10 دقايق لحد ما الفراخ تستوي.
9- اسياخ الفاكهة:
المكونات:
– 6 شرايح سميكة كيوي.
– 6 حبات فراولة متقطعة نصين.
– 8 حبات عنب.
– 8 مكعبات بطيخ.
– 6 قطع خوخ.
– 4 حبات توت.
– 2 معلقة كبيرة زبادي.
– ¼ كوباية لبن.
– 1 معلقة صغيرة فانيليا سايلة.
– ½ معلقة صغيرة كاكاو او اي نوع مشروب شوكليت بودر بتفضليه.
الطريقة:
1- في طبق اخلطي الزبادي واللبن والفانيليا والشوكليت البودر.
2- هاتي الاسياخ الخشب ودخلي فيها الفاكهة ، وحطي فوقيها الصوص.
تقدري تغيري وتختاري اي انواع فاكهة تفضليها او على حسب فاكهة الموسم المتوفرة.
10- توت احمر محشي زبادي:
المكونات:
– 10 – 15 حبة توت.
– ½ كوباية زبادي.
– 2 معلقة كبيرة عسل.
– ½ معلقة صغيرة فانيليا سايلة.
– شوية جوزة الطيب مطحون.
الطريقة:
1- في طبق اخلطي الزبادي, الفانيليا, العسل, جوزة الطيب.
2- انقلي خليط الزبادي في كيس تزييين ، وافتحيه من الطرف فتحة صغيرة.
3- املي حبات التوت بخليط الزبادي ، واستمتعي بالطعم اللذيذ.
11- شيبسي التفاح :
المكونات:
– 1 تفاحة متقطعة شرايح رفيعة.
– ¼ معلقة صغيرة شطة.
– ½ معلقة صغيرة اي بهارات تفضليها.
– رشة ملح.
الطريقة:
1- اخلطي البهارات مع التفاح.
2- اخبزيها في الفرن على درجة حرارة 220 درجة مئوية لمدة 10 – 15 دقيقة.
12- فشار بالكزبرة والليمون:
المكونات:
– ½ كوباية ذرة فشار.
– 2 معلقة صغيرة عصير ليمون.
– ½ معلقة صغيرة شطة.
– ملح حسب الذوق.
– 2 معلقة كبيرة كزبرة خضرا مفرومة.
الطريقة:
1- في الميكروويف او في حلة على النار حطي الفشار وسيبيه لحد ما يفرقع.
2- بعدها انقليه في طبق كبير وضيفي له عصير الليمون, الكزبرة, الملح, الشطة وقلبي لحد ما كل المكونات تمتزج مع الفشار كويس.
13- مشروم بورتوبيلو المحشي:
المكونات:
– 4 حبات مشروم بورتوبيلو .
– ½ كوباية طماطم مشوية على النار او الفرن ومفرومة.
– ½ كوباية جبنة موتزاريلا.
– ½ معلقة صغيرة زعتر.
– ½ معلقة صغيرة شطة.
– ملح حسب الذوق.
– سبراي الطبخ.
الطريقة:
1- سخني الفرن على درجة حرارة 180 درجة مئوية.
2- رشي صينية الفرن بسبراي الطبخ.
3- حطي معلقة من الطماطم المفرومة جوه المشروم وفوقيها الجبنة الموتزاريلا المبشورة والزعتر والشطة والملح.
4- كرري مع كل حبات المشروم بنفس الطريقة.
5- دخليهم الفرن لمدة 20 دقيقة.
14- بطاطس شيبسي:
المكونات:
– 1 حبة بطاطس متقطعة شرايح رفيعة.
– ½ معلقة صغيرة فلفل اسود.
– ملح حسب الذوق.
الطريقة:
اخلطي التوابل مع البطاطس ورصيها على صينية ، واخبزيها في الفرن لحد ما يبقى لونها دهبي ومقرمشة ، وممكن تعمليها في الميكروويف لو متوفر حطيها لمدة 30 ثانية لحد ما تتحمر وتقرمش.
15- الاناناس بالتوابل:
المكونات:
– 1 كوباية اناناس متقطع شرايح رفيعة.
– 2 معلقة كبيرة عصير ليمون.
– ½ معلقة صغيرة فلفل اسود.
– ½ معلقة صغيرة ملح.
– 1/6 معلقة صغيرة قرفة مطحونة.
الطريقة:
في طبق قلبي شرايح الاناناس مع عصير الليمون والفلفل الاسود والملح والقرفة.
16- كرات البطاطس:
مكونات عجينة البطاطس:
– 1 كوباية بطاطس مسلوقة ومهروسة.
– 2 معلقة صغيرة فلفل اخضر حار مفروم.
– 1 معلقة كبيرة كزبرة خضرا مفرومة.
– 2 معلقة صغيرة عصير ليمون.
– ملح حسب الذوق.
– ¼ معلقة صغيرة كركم مطحون.
– 8 – 7 من اوراق الكاري المطحونة.
للطبقة الخارجية:
– 1/3 كوباية دقيق.
– ¼ معلقة صغيرة كركم مطحون.
– ½ معلقة صغيرة شطة.
– ملح حسب الذوق.
الطريقة:
1- في طبق كبير اخلطي كل مكونات عجينة البطاطس ، لحد ما تتكون عندك عجينة ناعمة.
2- في طبق تاني اخلطي كل مكونات الطبقة الخارجية.
3- قسمي خليط البطاطس كرات ودحرجيها في خليط الدقيق.
4- حطيها في الاير فراير على درجة حرارة 180 درجة مئوية لمدة 15 دقيقة.
17- مكعبات الشوفان والقرع:
المكونات:
– ½ كوباية قرع مسلوق.
– ¾ كوباية سكر.
– 1 معلقة صغيرة من بذور الكتان منقوعة في 3 معالق كبيرة ماية.
– ½ معلقة صغيرة من صودا الخبز.
– ½ معلقة صغيرة ملح.
– 1 معلقة صغيرة قرفة مطحونة.
– 1 معلقة صغيرة فانيليا سايلة.
– ½ معلقة صغيرة زنجبيل مطحون.
– 1/8 معلقة صغيرة جوزة الطيب مطحونة.
– ¾ كوباية شوفان مطحون.
– ¾ كوباية دقيق لوز.
– ½ كوباية اي نوع مكسرات تفضليه مفروم.
– 2 معلقة كبيرة شوكليت شيبس.
الطريقة:
1- سخني الفرن على درجة حرارة 180 درجة مئوية ، وغلفي صينية الفرن بورق زبدة.
2- اخلطي القرع والسكر مع بعض ، ضيفي لهم الفانيليا, بذور الكتان المنقوع واخلطيهم كويس.
3- ضيفي صودا الخبز. القرفة, الملح, جوزة الطيب, الزنجبيل ، واخلطي كويس.
4- ضيفي الشوفان المطحون, دقيق اللوز, المكسرات المفرومة ، واخلطيهم كويس مع بعض.
5- حطي الخليط ده في صينية الفرن ورشي فوقيه الشوكليت شيبس.
6- سيبيه في الفرن لمدة 15 – 18 دقيقة لحد ما لونه يبقى بني دهبي.
7- خرجيه من الفرن وسيبيه يبرد لمدة 10 دقايق.
8- وباستخدام السكينة قطعيه لمكعبات صغيرة.
18- كرات الكزبرة:
المكونات:
– 1 كوباية كزبرة خضرا مفرومة.
– 1 كوباية دقيق حمص.
– ½ معلقة صغيرة شطة.
– 1 معلقة صغيرة كمون مطحون.
– 1 معلقة صغيرة زنجبيل مفروم.
– 1 معلقة صغيرة زبادي.
– الملح حسب الذوق.
الطريقة:
1- اخلطي كل المكونات مع بعض لحد ما تشكل عندك عجينة ناعمة.
2- شكليها على شكل كرات صغيرة ، وسويها على البخار لمدة 5 – 10 دقايق.
