طريقة عمل التمرية النابلسية من اشهر الحلويات الفلسطينية
التمرية النابلسية من اشهر الحلويات الفلسطينية التقليدية ، وهي بشكل خاص من مدينة نابلس زي ما هو باين من اسمها ، وهي تعتبر من الحلويات الشتوية ، والوصفة سهلة وسريعة التحضير ، تابعي معانا السطور الجاية واعرفي الطريقة بالخطوات والفيديو.
وصفة التمرية النابلسية:
مكونات العجينة:
– 3 كوبايات دقيق (او حسب الكمية اللي انتي عايزة تعمليها).
– 1 ¼ كوباية ماية (او حسب العجينة ما تحتاج حسب نوع الدقيق اللي مستخدماه).
– 1 معلقة صغيرة ملح.
– 1 معلقة صغيرة زيت نباتي.
مكونات الحشوة:
– 3 كوبايات ماية.
– ½ كوباية سكر.
– ¾ كوباية سميد خشن.
– 1 معلقة صغيرة ماء زهر او ماء ورد.
– سكر بودرة للتزيين.
طريقة التحضير:
1- لتحضير العجينة ، اخلطي الدقيق مع الملح وقلبيهم مع بعض ، ضيفي الماية بالتدريج وابدأي اعجنيها لحد ما تلم معاكي ، ضيفي معلقة الزيت واعجنيها كويس لحد ما يبقى قوامها ناعم وطري ومش بتلزق.
2- قسمي العجينة لقطع متساوية على شكل كور وحطيها على طبق كبير او صينية مدهونة زيت ، وسيبيها ترتاح من ساعة لساعتين.
3- لتحضير الحشوة ، في حلة ضيفي الماية والسكر والسميد ، قلبيهم مع بعض على البارد الاول ، وبعدين حطي الحلة على نار عالية مع التقليب المستمر واول ما الخليط يغلي قللي النار وماتوقفيش تقليب لحد ما الخليط يبقى قوامه سميك تقريبا لمدة 5 دقايق ، ضيفي له ماء الزهر او ماء الورد وقلبي.
4- ارفعي الخليط من على النار وصبيه في صينية مدهونة زيت ، سيبيه على جنب يبرد تماما في درجة حرارة الغرفة لحد ما يتماسك ، قطعيه بالسكينة مربعات بحجم متوسط.
5- هاتي العجينة ، خدي كورة وافرديها بايدك على سطح مستوي ، بعدها اقسميها نصين ، وخدي كل جزء وافرديه بايدك كويس خلي سمكها رقيق ، في نص العجينة حطي قطعة من الحشوة اللي جهزناها واقفلي عليها العجينة من كل الاطراف، واضغطي عليها بايدك عشان توزعي الحشوة في العجينة كلها من جوه ، كرري نفس الخطوات مع باقي العجينة كلها.
6- في زيت غزير على النار وسكون سخن ، ابدأ اقليهم على الناحيتين لحد ما تاخد لون دهبي ، طلعيها على مناديل مطبخ.
7- كده التمرية تبقى جاهزة ، رصيها على طبق التقديم ورشي فوقيها سكر بودرة ومكسرات حسب الرغبة.
